Read Makassar Version – KITTA' MATANGKASA 2 PATTOTTORANG 16 Bible Online

2 PATTOTTORANG 16 - Makassar Version – KITTA' MATANGKASA bible

2 PATTOTTORANG 16

¹Ri taung makatallumpulo angngannang ammarentana Karaeng Asa ri Yehuda, battumi Baesa karaeng Israel ambunduki tu Yehuda; napakajarreki kota Rama untu' antongkoki oloang assulu' antamaya ri Yehuda.

²Jari naallemi Karaeng Asa bulaenga siagang peraka battu ri pammolikang barang-baranna Balla'Na Batara siagang balla' karaenga, nampa nakiring mange ri Damsyik iamintu mange ri Benhadad karaeng Siria, siagang appasang angkana,

³“Umba kippare' passari'battangngang sangkamma todong le'baka nagaukang tau toata. Anne nia' kukiringangki' bulaeng siagang pera' salaku hadia; kukellaiki' antappuki passisambunganta siagang Baesa karaeng Israel, sollanna napaunduru' ammotere' pasukanna battu ri daeraku.”

⁴Nasitujui Karaeng Benhadad anjo pappala'na Karaeng Asa. Nasuromi perwira-perwira tantarana siagang pasukanna a'lampa mange ambunduki kota-kotana Israel. Nabetami ke'nanga kota-kota Iyon, Dan, Abel-Bet-Maakha siagang sikontu kota-kota pammolikanga ri Naftali.

⁵Nalangngere'na Baesa anjo kabaraka, napammarimi ampakajarreki kota Rama nampa nabokoi anjo kotaya.

⁶Nampa napagio' Karaeng Asa sikontu taua battu ri sikontu Yehuda untu' allalingi batua siagang kayu le'baka napake Baesa ri Rama untu' ampakajarreki anjo kotaya. Anjo bahang-bahanga napakei Asa untu' ampakajarreki kota Geba siagang Mizpa.

⁷Anjo wattua niaki Na'bi Hanani battu mange ri Karaeng Asa na nakana, “Lanri tanjeng maeko ri karaeng Siria, tena nutanjeng mae ri Karaeng Allata'alanu, tappela'mi kasampatannu untu' ambetai tantarana karaeng Israel.

⁸Sai anjo tantarana tu Sudan siagang Libia la'bi lompoangangi siagang la'bi jaiangangi kareta bundu'na siagang tantara pajaranna? Na manna kamma mamo Nasarejako pammetang Batara mae ri ke'nanga, lanri tanjengko mae ri Ia.

⁹Naparhatikangi Batara sikontu linoa untu' ansarei kagassingang tau majarreka tappa'na mae ri Ia. Toloko ri anjo panggaukannu; lanri kammana anjo appakkaramula kamma-kamma anne tuli lanukasiaki pa'bundukanga.”

¹⁰Sanna' larrona Karaeng Asa allangngereki anjo kananna Na'bi Hanani sa'genna napantama' anjo Na'bia ri tarungkua. Iatommi anjo wattua nanasessa Asa siapa are tau battu ri ra'ya'na.

¹¹Sikontu apa kajarianga lalang ri pamarentahanna Karaeng Asa battu ri pakaramulanna sa'genna kala'busang, le'baki nicata' lalang ri kitta' “Pau-pauanna sikamma Karaeng Yehuda siagang Israel.”

¹²Ri taung makatallumpulo assalapang ammarentana Asa, natabami garring lompo rua-rua bangkenna. Mingka manna nakamma tena nappala' pannulung mae ri Batara, passangalinna mae ri dottoroka.

¹³Narapiki ruan taung garrinna, matemi Karaeng Asa.

¹⁴Nisarei rampa-rampa maya'na iamintu rampa-rampa mabau', nampa nitarawang ri pa'jerakkanna sikamma karaenga ri Kota Daud. Nampa untu' tanra pappakalompo mae ri ia, apparinrai pepe' sannaka lompona ra'yaka.