Read Makassar Version – KITTA' MATANGKASA 2 PATTOTTORANG 18 Bible Online

2 PATTOTTORANG 18 - Makassar Version – KITTA' MATANGKASA bible

2 PATTOTTORANG 18

¹Ri wattunna akkalumanynyammo siagang masahoro'mo arenna Yosafat a'jari karaeng ri Yehuda, napa'buntimmi kalase'renna anggota kaluargana siagang kalase'renna anggota kaluargana Ahab karaeng Israel.

²Siapa are taung ribokoanganna, a'lampai Yosafat mange angkunjungi Ahab ri kota Samaria. Appare'mi passua'-suarrang Ahab untu' ampakala'biriki Yosafat siagang rombonganna; siagang nasuroi taua ammolong jai gimbala' siagang sapi. Napakei anjo kasampatanga angkioki Yosafat untu' ambunduki kota Ramot ri Gilead.

³Angkanai, “Erokko nakia'lampa siagang mange ambunduki Ramot?” Appialimi Yosafat angkana, “Baji'mi. La'gabungi tantaraku siagang tantaranu. Sipa'rurungangki' a'bundu'.

⁴Mingka bajiki punna akkuta'nangki' rolong mae ri Batara.”

⁵Jari appasse'remi Ahab kira-kira nia' 400 na'bi, nampa akkuta'nang ri ke'nanga angkana, “Maka akkulleja' mange ambunduki Ramot yareka tena?” Appialimi ke'nanga angkana, “Akkullei! LaNapassareangi Allata'ala anjo kotaya mae ri katte.”

⁶Mingka akkuta'nammi pole Yosafat angkana, “Apaka tenamo anrinni na'bi maraeng akkullea akkuta'nang mae ri Allata'ala untu' ikatte?”

⁷Appialimi Ahab angkana, “Nia' ija sitau, iamintu Mikha ana'na Yimla. Mingka birisikka' mae ri ia, lanri tale'bakai kabajikang natappu untu' kalengku; sangnging tenaya nabaji'.” Appialimi Yosafat angkana, “Ah, teako akkana kammai anjo!”

⁸Jari akkio'mi Ahab sitau pagawe balla' karaeng nampa nasuro akkaro-karo mange ambuntuli Mikha.

⁹Anjo wattua massing napakei Ahab siagang Yosafat pakeang kalompoanna, ammempo ri empoang kakaraenganga ri ampi'na panggilingang gandunga ri dallekanna pakke'bu' lompona Samaria, nampa battu sikamma na'bia ampabattui kana tappuna ke'nanga.

¹⁰Kalase'renna anjo na'bi-na'bia, iamintu niarenga Zedekia ana'na Kenaana, appareki tanru'-tanru' bassi nampa nakana ri Ahab, “Iaminne kananNa Batara, ‘Iaminne tanru'-tanru' kammaya lakipake andengkai tu Siria nampa kiancuru' ke'nanga.’ ”

¹¹Sikontu na'bi maraenga situju kabusuki siagang nakana, “Bundukimi Ramot, ma'nassa lammetaki'. LaNasareki' pammetang Batara.”

¹²Lalanna anjo wattua anjo tunisuroa mange ambuntuli Mikha, nakanamo ri Mikha, “Sikontu na'bi maraenga natappui angkanaya lammetai karaenga. Poro baji' kamma tongi anjo ke'nanga bateta antappui bapa'.”

¹³Mingka appialimi Mikha angkana, “Lanri Batara mattallasaka, inakke iaji bawang lakutappu apa Napaua Allata'ala mae ri nakke!”

¹⁴Battuna Mikha mange ri dallekanna Karaeng Ahab, akkuta'nammi Karaeng Ahab angkana, “Maka akkulleja' siagang Karaeng Yosafat a'lampa mange ambunduki Ramot yareka tena?” Appialimi Mikha angkana, “Bundukimi! Tantu lammetata. Batara lassareki' pammetang.”

¹⁵Appialimi Ahab angkana, “Punna lanri arenNa Batara nu'bicara mae ri nakke, paumi kontutojenga. Pissiapako musti kupakainga' ri anjo passala' kammaya?”

¹⁶ Appialimi Mikha angkana, “Kuciniki tantarana Israel tassimbung-simbung irate ri moncong-monconga. Rapangi ke'nanga gimbala' tenaya pakalawakinna; Nakana Batara ri passala'na ke'nanga, ‘Anne taua tena pamimpinna. Lappassammi ammotere' ke'nanga siagang salama'.’ ”

¹⁷Nampa nakanamo Ahab ri Yosafat, “Kammatojengi kanangku. Tena le'bakai natappu apa bajika untu' kalengku! Tuli kodia mami!”

¹⁸Nakanamo pole Mikha, “Kamma-kamma anne pilangngeri apa Napaua Batara! Kuciniki Batara ammempo irate ri empoang kala'biranNa ri suruga, nampa sikontu malaekaka niaki ammenteng ri ampi'Na.

¹⁹Akkuta'nangi Batara angkana, ‘Inai lanynyonyoki Ahab sollanna ero' a'lampa a'bundu' sollanna mate ri Ramot ri Gilead?’ Tena nasangkamma-kamma ngaseng pappialinna anjo malaeka'-malaekaka.

²⁰Kala'busanna nia' ammumba ri dallekang se're roh. A'reppeseki mae ri Batara nampa nakana, ‘Inakkemi lanynyonyoki.’ Akkuta'nammi Batara angkana, ‘Antekamma batena?’

²¹Appialimi anjo roh sumpaenga angkana, ‘La'lampa' mange siagang lakusuroi sikontu na'bina Ahab a'balle-balle.’ Nakanamo Batara, ‘Baji'mi, gaukammi anjo kammaya, lakkulleko anynyonyoki.’ ”

²²Nampa nasambung pole kananna Mikha angkana, “Jari, iaminjo kajarianga! Napa'jari Batara anjo na'bi-na'bia a'balle-balle mae ri katte, nasaba' le'ba'mi Napattantu Batara angkanaya lanapitujuiki' bala!”

²³Namajumo Na'bi Zedekia a'reppese' mae ri Mikha nampa natempaka'rang rupanna siagang nakana, “Antekamma olona lakkulle RohNa Batara ambokoia' siagang a'bicara mae ri mae ri kau?”

²⁴Appialimi Mikha angkana, “Nucini'ji antu sallang buttina ri wattunnu antama' ri se'reang kamara' untu' accokko!”

²⁵Naparentakammi Karaeng Ahab angkana, “Jakkalaki! Erangi mange ri walikotaya iamintu Amon siagang mange ri Pangeran Yoas.

²⁶Suroi ke'nanga ampantamaki ri tarungkua. Sike'de'mo kanre siagang je'ne' sareangi sa'gengku ammotere' siagang salama'.”

²⁷Nakanamo Mikha, “Punna ammoterekki' siagang salama', a'nassai angkanaya tena Na'bicara Batara tete ri nakke. Sikontu tau hadereka anrinni a'jari sa'bi.”

²⁸Nampa a'lampamo Ahab karaeng Israel siagang Yosafat karaeng Yehuda mange ambunduki kota Ramot ri Gilead.

²⁹Nakana Ahab ri Yosafat, “Erokka' ammakeang palusu' siagang amminawang a'bundu', mingka ikau pakemi pakeang kalompoannu.” Kammami anjo nammakeang palusu'mo karaeng Israel ri wattunna a'lampa mange a'bundu'.

³⁰Anjo wattua le'ba'mi niparentakang sikamma panglimana pasukang kareta bundu'na Siria ri karaenna sollanna karaeng Israelmo bawang nabunduki ke'nanga.

³¹Jari, ri wattunna nacini' ke'nanga anjo Karaeng Yosafat, nakapang ngasengi ke'nanga angkanaya iaminjo karaeng Israel. Lanri kammana anjo majumi ke'nanga ero' ambakkai. Mingka akkio'mi Yosafat, nampa nitulung ri Karaeng Allata'ala, siagang Napabilu' maraengi anjo tantara battua ero' ambakkai.

³²Ri wattunna naassemmo sikamma panglima tantarana Siria angkanaya anjo teai Karaeng Israel, ammarimi ke'nanga maju ambakkai.

³³Sitabangi nia' sitau tantara Siria ampalappasa' sambarangi panana, tena tau nalio-lio. Mingka anjo ana' panaya tattuju mangei ri Karaeng Ahab nanataba siagang natarrusu' baju bundu'na ri panynyambunna. Akkio'mi Ahab ri paerang kareta bundu'na angkana, “Nitaba'! Gilingi nanueranga' assulu' ri anne tampa' pa'bundukanga.”

³⁴Mingka lanri sanna'naija pa'bundukanga, tuli ammantammi Karaeng Ahab, ammenteng appatumpa' lalang ri karetana a'dalle' mange ri tantarana tu Siria. Ri wattunna labu alloa, matemi Ahab.