Read Makassar Version – KITTA' MATANGKASA 2 PATTOTTORANG 19 Bible Online

2 PATTOTTORANG 19 - Makassar Version – KITTA' MATANGKASA bible

2 PATTOTTORANG 19

¹Ammotere'namo Yosafat karaeng Yehuda siagang salama' mange ri balla' karaenna ri Yerusalem,

²nia'mo sitau na'bi niareng Yehu ana'na Hanani battu mange andallekang ri karaenga. Nakanamo anjo na'bia ri ia, “Maka siratangki' ambantui tau ja'dalaka siagang agang mae ri tau birisika ri Batara? Larroi Batara lanri anjo panggaukang kammata.

³Mingka manna nakamma nia' tongija apa baji' ri kalenta. Le'ba'mi Kipakabella sikontu patunna Dewi Asyera nasombaya ra'yaka siagang kiusahakang tommi anggaukangi ero'Na Allata'ala lalang tallasatta.”

⁴Anjorengi ri Yerusalem ammantang Karaeng Yosafat. Mingka masarroi a'lampa angkunjungi ra'yaka ri sikontu pa'rasanganga siagang nasuroi ra'yaka sollanna ammotere' mae ri Batara, Allata'alana boe-boena ke'nanga.

⁵Ri tunggala' kota niaka tembo' pattahanganna ri Yehuda, angngangkaki haking-haking,

⁶siagang nasarei ke'nanga parenta kammaya anne, “Bajiki batenu appanggaukang, lanri punna angngadeliko teai lanri arenna rupataua, passangalinna lanri arenNa Batara. Naparhatikangko punna annappukiko se'reang kara-kara.

⁷Musti mallakko ri Batara, siagang tutuko lalang annappuki, lanri anjo Karaeng Allata'alata nakabirisi tau a'gau' jekkonga, tau battala' sialia ri se'reang kara-kara, siagang tau annarimaya doe' pacoco'.”

⁸Kamma todong ri Yerusalem angngangka' tongi Yosafat haking-haking; nia' tau battu ri suku Lewi naangka', nia' tau battu ri imang-imang, siagang nia' todong tau battu ri pamimping-pamimpinna ra'yaka. Musti natappuki ke'nanga punna nia' kara-kara passabakkang nidakkaina hukkunNa Batara siagang kara-kara maraengannaya.

⁹Naparentakangi Yosafat mae ri anjo haking-hakinga angkana, “Gaukangi tugasa'nu lalang malla' ri Batara. Turuki parentaNa lalang sikontu apa nugaukanga.

¹⁰Punna nia' agannu battu ri pa'rasangang maraeng angngerang mae ri kau se'reang kara-kara pammunoang, kara-kara andakkai hukkung yareka kara-kara andakkai undang-undang, parallui nusare kasingarang ke'nanga. Lalang kammana anjo tenamo nasala ke'nanga mae ri Batara, siagang tenamo Nalalarro Batara mae ri kau yareka mae ri ke'nanga. Gaukangi anne apa kuparentakanga, jari tenamo nulasala.

¹¹Imang Lompo Amarya kusare kakoasang kaminang tinggi mae ri sikontu kara-kara hukkung agamaya. Zebaja ana'na Ismael iamintu guburnur Yehuda, kusare kakoasang kaminang tinggi mae ri sikontu kara-kara maraengannaya. Tu Lewi kusare tanggong jawa' untu' anjagai sollanna nipajappa anjo le'baka nitappuki ri pangadelanga. Turuki anne sikamma kasingarang kupassareanga siagang teako bata-batai ampajappai tugasa'nu. Dasi-dasi nanirurungang ri Batara tau adeleka lalang panggaukanna!”