Read Makassar Version – KITTA' MATANGKASA 2 PATTOTTORANG 20 Bible Online

2 PATTOTTORANG 20 - Makassar Version – KITTA' MATANGKASA bible

2 PATTOTTORANG 20

¹Siapa are wattu ribokoanganna, nia'mi battu tantara Moab siagang Amon, siagang kabusu' agang-aganna ke'nanga iamintu tantara Meunim, ambunduki tu Yehuda.

²Nabattumo taua ampabattui anne kabaraka mae ri Karaeng Yosafat angkana, “Nia' battu sanna' jaina tantara Edom, battu ri ba'leanna Tamparang Matea, untu' ambundukiki'. Le'ba'mi nabeta ke'nanga Hazezon-Tamar.” (Hazezon-Tamar iamintu areng maraenna En-Gedi.)

³A'jari malla'mi Yosafat nampa appala' doang untu' appala' pangngunju' battu ri Batara. Nampa naparentakang sollanna appuasa kabusu' sikontu ra'yaka.

⁴Battu ri sikontu kota niaka ri Yehuda nia' taua battu mange ri Yerusalem untu' appala' tulung mae ri Batara.

⁵Siagammi ke'nanga tau niaka ri Yerusalem asse're ri paranglakkeng beru nibangunga ri Balla'Na Batara. Ammentemmi Karaeng Yosafat ri dallekanna ngaseng ke'nanga,

⁶siagang assa'ra lompomi appala' doang angkana, “O Batara, Allata'alana boe-boena ikambe! IKatte Allata'ala ri suruga siagang ammarentaya mae ri sikontu bansa niaka ri tompo'na buttaya. IKatteji bawang makoasa siagang makassa'; tena manna sitau akkulle angngewaKi'.

⁷ IKattemi Allata'alana ikambe. Ri wattunna battu ummatTa Israel mae anrinni ri pa'rasanganga, Kibongkai sikamma tau niaka ammantang anrinni anjo wattua. Nampa Kipassareang anne pa'rasanganga mae ri jari-jarina Abraham, belata, untu' a'jari butta napatang ke'nanga satunggu-tungguna.

⁸Ammantammi anrinni ke'nanga siagang le'ba'mi ambangung se're balla' untu' tampa' anynyomba mae ri Katte. Naassengi ke'nanga

⁹angkanaya punna nihukkungi ke'nanga lanri dosa-dosana ke'nanga, siagang punna nituju ke'nanga ri pa'bundukang, garring, yareka kacipurang, akkullei battu ke'nanga mae ri Katte siagang ammenteng ri dallekanna anne balla' panynyombanga. Punna lalang kasukkarang ke'nanga, akkullei ke'nanga appala' doang mae ri Katte, siagang laKipilangngeri na Kitulung ke'nanga.

¹⁰ Kamma-kamma anne niaki bansa Amon, Moab, siagang Edom battu ambunduki ikambe. Ri wattunna battu ri Mesir boe-boena ikambe mae anrinni, tena Kipa'biangi ke'nanga angngempoi pa'rasanganna anjo bansa-bansaya. Jari a'lampami boe-boena ikambe angngalle oloang maraeng akkuliling siagang tena naKiancuruki bansa Amon, Moab siagang Edom.

¹¹Kamma-kamma anne, kammami anne panggaukanna anjo bansa-bansaya mae ri kambe. Eroki ke'nanga ambongkai ikambe battu ri anne pa'rasangang Kipassareanga mae ri kambe.

¹²IKattemi Allata'alana ikambe! Kihukkung laloi anjo ke'nanga lanri tenana pakkullena ikambe andallekangi tantara kammaya anjo jaina, eroka ambunduki ikambe. Tenamo naassengi apa lanagaukang ikambe, lanri kammanami anjo nabattu ikambe mae ri Katte untu' appala' tulung.”

¹³Lalanna anjo wattua sikontu tu bura'ne Yehuda siagang massing tubai'-bainena kammayatompa ana'-ana'na ke'nanga ammentengi ri Balla'Na Batara.

¹⁴Ri tangnga-tangngana anjo tau jaia, nia' sitau tu Lewi niarenga Yahaziel. Anjo taua ana'na Zakharia battu ri lokoang bijanna Asaf jari-jari battu ri Benaya, Yeiel, siagang Matanya. Anjo wattua nikoasai Yahaziel ri RohNa Batara,

¹⁵ nampa angkana, “O Karaeng mala'birikku siagang sikamma sari'battangku niaka hadere'. Angkanai Batara angkanaya teako tappu' minasai yareka teako mallakki andallekangi anjo tantara jaia. Nasaba' teai ikau la'bundu', passangalinna Allata'ala.

¹⁶Ammuko punna a'jappa nai' angngambi' ri agang pangngambikanga ke'nanga ri Zis, bundukimi ke'nanga. Lassidallekangko ke'nanga ri cappa'na ka'bung lapparaka ri dallekanna parang lompoa ri ampi'na Yeruel.

¹⁷Tena nuparallu a'bundu' lalang ri anne pa'bundukanga. A'lampamako mange ri tampa' le'baka nipattantuangko siagang attayang mako anjoreng. Lanuciniki antekamma bateNa Batara assareko pammetang. He pandudu' Yehuda siagang Yerusalem, teako lussakki yareka teako mallakki. Antama' mako ri anjo pa'bundukanga, na Nasareko Batara pammetang!”

¹⁸Jari su'ju'mi Karaeng Yosafat. Nampa sikontu ra'yaka amminawang kabusu' tommi su'ju' anynyomba ri Batara.

¹⁹Nampa sikamma tu Lewi battua ri pa'lokoang bijanna Kehat siagang Korah ammenteng kabusuki, akkio' rannu mammuji ri Batara, Allata'alana Israel.

²⁰Ammukona bari'basa' dudu, assulu'mi ra'yaka nampa a'lampa mange ri daera parang lompoa ri ampi'na Tekoa. Ri wattunna ero' appakkaramula ke'nanga a'lampa, appasammi Karaeng Yosafat ri ke'nanga angkana, “He ra'ya' Yehuda siagang Yerusalem! Tappakko mae ri Karaeng Allata'alanu, sollannu akkulle attahang. Tarimai pappakainga'na na'bi-na'binu, sollannu akkulle ammeta.”

²¹Le'baki sipa'bicara siagang ra'yaka, nasuromi karaenga ampakei pakeanna sikamma pakelonga, iamintu pakeang biasaya napake ke'nanga ri upacara-upacara matangkasaka lalang ri agamaya. Anjo pakelonga musti a'barrisiki ri dallekanna barisanna tantaraya nampa akkelong suara' angkana, “Puji Batara! Mangngamaseangi satunggu-tungguna!”

²²Ri wattunna appakkaramula akkelong suara' anjo pakelonga, Napakaricumi Batara tantara musu eroka a'bakka maju a'bundu'.

²³Tantara Amon siagang Moab ambakkai tantara Edom nampa naancuru' tabasikali. Nampa a'giling ke'nanga para ia sibakkai a'bundu' lompo.

²⁴Ri wattunna battu mange anjoreng tantara Yehuda ri menara pa'jaganga ri parang lompoa siagang naparhatikang tampa'na musua, nacini'mi ke'nanga maya'-maya'na musua tassiara' mange-mange ri buttaya. Tenamo manna sitau anjo tantara musua attallasa'.

²⁵Jari a'lampami Yosafat siagang ana' buana anrampasaki barang-baranna musua. Jai sikali nagappa ke'nanga olo'-olo' niparakai, pakkakasa', pakeang, siagang barang-barang lompoa anggaranna maraenga. Le'baki napasse're lalang tallungallo anjo barang-baranga, jai iji ammantang barang-barang maraeng, sa'genna nibokoi mami.

²⁶Ri allo makaappa'na a'rappung kabusu'mi ke'nanga ri Ka'bung Lappara' Pammuji. Nampa mammujimo ke'nanga ri Batara lanri sikontu anjo apa le'baka Nagaukang. Lanri kammanami anjo naniaremmo anjo lapparaka “Pammuji.”

²⁷Nampa napimping Yosafat sikontu pasukanga ammotere' mange ri Yerusalem. Rannui nyawana ke'nanga lanri Nabetanamo Batara musunna ke'nanga.

²⁸Ri wattunna battu ke'nanga ri kotaya, a'barrisiki ke'nanga mange ri Balla'Na Batara nirurungang siagang sa'ra kacaping siagang tarompe'.

²⁹Sikontu bansa maraenga malla' kabusu'mi ri wattunna nalangngere' kabara'na antekamma bateNa Batara ambetai musu-musunna tu Israel.

³⁰Iami anjo saba'na nakkullemo ammarenta Yosafat siagang amang, siagang nisaremi kasannangngang ri Batara sikontu pa'rasanganga.

³¹Wattunna a'jari Karaeng Yosafat ri Yehuda 35 taung umuru'na; siagang 25 taung sallona ammarenta ri Yerusalem. Amma'na iamintu Azuba ana'na Silhi.

³²Sangkamma todong Asa manggena, nagaukangi Yosafat gau' bajika ri paccini'Na Batara.

³³Mingka tampa'-tampa' panynyombanga ri barhalaya tena nanaancuruki. Tenapa nattojeng-tojeng pa'mai'na ra'yaka anynyomba mae ri Allata'alana boe-boena ke'nanga.

³⁴Pau-pau maraengannaya ri passala'na Yosafat, battu ri pakaramulanna sa'genna kala'busang pamarentahanna, niaki nicata' lalang ri kitta' “Pau-pauanna Yehu ana'na Hanani”, niaka nitulisi' lalang ri kitta' “Pau-pauanna Sikamma Karaeng Israel.”

³⁵Ri se'reang wattu Yosafat karaeng Yehuda appareki passisambungang passari'battangngang siagang Ahazia karaeng Israel, jaia kaja'dallang nagaukang.

³⁶Appareki ke'nanga jai kappala' ri Ezion-Geber untu' assombala' mange ri Tarsis.

³⁷Mingka nipakaingaki Yosafat ri Na'bi Eliezer ana'na Dodawa battu ri kota Maresa, angkana, “Lanri apparekki' hubungang passari'battangngang siagang Ahazia, laNaancuruki Batara jama-jamanta.” Jari ancuru' kabusu'mi anjo kappala' le'baka napare', sa'genna takkulleamo a'lampa assombala'.