Read Makassar Version – KITTA' MATANGKASA 2 PATTOTTORANG 21 Bible Online

2 PATTOTTORANG 21 - Makassar Version – KITTA' MATANGKASA bible

2 PATTOTTORANG 21

¹Matemi Yosafat na nitarawang ri pa'jerakkanna sikamma karaenga ri Kota Daud. Nampa ana' bura'nena niarenga Yehoram ansambeangi a'jari karaeng.

²Yehoram ana' bura'nena Yosafat, karaeng Yehuda, nia' annang bura'ne sari'battanna, iamintu: Azarya, Yehiel, Zakharia, Azariahu, Mikhail, siagang Sefaca.

³Jai sikali nagappa ke'nanga bulaeng, pera' siagang barang-barang lompoa anggaranna maraenga battu ri manggena ke'nanga; siagang massing nisare tongi ke'nanga kota niaka pattahanganna ri Yehuda. Mingka lanri Yehoram ana' bura'ne kaminang toa, iami nipattantu ri Yosafat untu' a'jari karaeng.

⁴Ri wattunna kassa'mo nasa'ring Yehoram empoanna salaku karaeng, nasuro buno kabusu'mi sari'battanna siagang siapa are pagawe tinggina.

⁵Ri wattunna a'jari Karaeng Yehoram 32 taung umuru'na, siagang ammarentai ri Yerusalem 8 taung sallona.

⁶Naturuki katallassanna Ahab siagang karaeng Israel maraenganga, lanri a'buntinna siagang kalase'renna ana' bainena Ahab. Dorakai mae ri Batara,

⁷ mingka taerokai Batara amputtai karaeng jari-jarina Daud, lanri le'baki a'janji angkanaya jari-jarina Daud tuli lammarenta.

⁸ Wattunna ammarenta Yehoram, angngewai tu Edom mae ri karaeng Yehuda siagang appaenteng kale-kalei kakaraengang.

⁹Lanri kammana anjo assulu'mi Yehoram siagang panglima-panglimana angngerang kareta-kareta bundu' untu' ambunduki Edom. Nikurungi ri pasukang Edom, mingka ri wattunna bangngi annarrusuki ke'nanga assulu' nampa lari ke'nanga.

¹⁰Baku'na anjo wattua tenamo natundu' Edom mae ri Yehuda. Iatommi anjo wattua nangngewa tommo taua ri kota Libna. Kajariang ngasengi anjo sikammaya lanri Yehoram nabokoimi Batara, Allata'ala, nisombaya ri boe-boena.

¹¹Ba'lalo ambangungi tampa'-tampa' panynyombang mae ri barhalaya ri daera-daera monconna Yehuda, na naerang ra'ya' Yehuda siagang Yerusalem mae ri gau' dorakaya mae ri Batara.

¹²Nampa anggappamo Yehoram silawara' sura' natulisika Na'bi Elia lalang attallasa'na ija. Kammami anne bonena anjo suraka, “Batara, Allata'ala nasombaya Daud, anghukkungki' lanri tena nakituruki tallasa'na manggeta siagang toata.

¹³Kabalekanna, sangkammai karaeng-karaeng Israel maraenga bateta appanggaukang ri tallasatta, siagang kierangi ra'ya' Yehuda siagang Yerusalem mae ri gau' tenaya namajarre' tappa'na mae ri Allata'ala. Appanggaukang kammaki' Karaeng Ahab siagang sikamma tau ansambeangai. Ba'lalo kibunoi sikamma sari'battanta, nampa bajikangnganja anjo ke'nanga na ikatte.

¹⁴Lanitujui ra'yaka ri hukkungang lompo battua ri Batara; sikamma anatta siagang sikamma bainenta lanihukkung tongi, kammayatompa laniancuruki sikontu barang-baranta.

¹⁵Manna kalenta lanatabaki' garring ri parru', pila' allo pila' sannaki!”

¹⁶Anjo wattua nia' tu Filistin siagang tu Arab ammantang ri ampi' pammantanganna tu Sudan ri daera biring tamparanga. Napagioki Batara anjo taua untu' a'lampa mange ambunduki Yehoram.

¹⁷Nabunduki ke'nanga Yehuda, narampasaki barang-barang niaka ri balla' karaenga, nampa naerang a'lampa sikamma ana'na siagang sikamma bainenna Yehoram a'jari tunitahang; se're mami ana'na, iamintu Ahazia ana' bura'ne bungkona tena nanierangi a'lampa.

¹⁸Le'baki anjo sikontu apa kajarianga, nihukkummi Yehoram ri Batara, iamintu nisarei garring ri bone battanna, tenaya nakkulle ammolle niballei.

¹⁹Niaki ruan taung sallona anjo garringa pila' sanna', sa'genna a'jari sessa sikali nampa mate. Tena napparinra pepe' ra'ya'na untu' pammatei ri kasusaanna ke'nanga sangkamma nagaukanga ke'nanga untu' boe-boena ke'nanga.

²⁰Tena manna sitau ampassayangi anjo kamateanna. Nitarawangi ri Kota Daud, mingka tena nalalang ri pa'jerakkanna sikamma karaenga. Ri wattunna a'jari Karaeng Yehoram 32 taung umuru'na, siagang ammarentai 8 taung sallona ri Yerusalem.