Read Makassar Version – KITTA' MATANGKASA 2 PATTOTTORANG 25 Bible Online

2 PATTOTTORANG 25 - Makassar Version – KITTA' MATANGKASA bible

2 PATTOTTORANG 25

¹Wattunna a'jari Karaeng Amazia, 25 taung umuru'na, siagang ammarentai 29 taung sallona ri Yerusalem. Amma'na iamintu Yoadan battu ri Yerusalem.

²Nagaukangi Amazia gau' Nangaia Batara, mingka sitangngaji pa'mai'na.

³Tena nasallo ri wattunna kassa'mo empoanna, nahukkung matemi sikamma pagawe-pagawe le'baka ambunoi manggena.

⁴ Mingka tena nabunoi ana'na ngaseng anjo pagawe-pagawea lanri naturuki parentaNa Batara niaka lalang ri Kitta'na Musa angkanaya, “Teako hukkung matei tau toaya lanri kaja'dallang nagaukanga ana'na ke'nanga, siagang teako hukkung matei ana'-anaka lanri kaja'dallang nagaukanga tau toana ke'nanga. Tunggala' taua iapa nakkulle nihukkung mate punna lanri kaja'dallang nagaukang kalenna.”

⁵Napa'rappungi Karaeng Amazia sikontu tau battua ri suku Yehuda siagang Benyamin nampa nasuro ke'nanga ammenteng situru' passilokoang bijanna, nipimping ri komandang tassisa'bu tau siagang komandang tassibilangngang tau. Nampa napilei sikamma tau umuru' 20 taung narateanganna, akkullea a'bundu' siagang cara'deka ammake sanjata poke siagang pannangkisi'. Nia' 300.000 jaina ke'nanga.

⁶Pantaranganna anjo assewa tongi 100.000 tantara battu ri Israel na nabayara' kira-kira 3.400 kilogarang pera'.

⁷Mingka nia'mo sitau na'bi battu mae ri karaenga nanakana, “Teaki' pakei anjo tantara-tantara battua ri Israel, lanri tena Naero' Batara antulungi umma' Israel battua ri kakaraengang bageang waraka.

⁸Mingka punna kammaji erotta ampakei ke'nanga, lanicini'-cinikiki' ri Allata'ala nibeta ri musunta manna pole nakassa' siagang barani tantarata. Nasaba' Allata'alaji bawang makoasa assare pammetang yareka kanibetang.”

⁹Akkuta'nammi Amazia angkana, “Mingka antekammami anjo sikontu pera' le'bakamo kupassareang mae ri ke'nanga?” Appialimi anjo na'bia angkana, “Akkullei Napoterang Batara mae ri katte la'bi jaiangngang pole naanjo.”

¹⁰Lanri kammana anjo nalappassammi Amazia anjo sikontu tantara nisewaya nampa nasuro ke'nanga ammotere' mange ri pa'rasanganna. Ammotere'mi ke'nanga, mingka teai sipato' larrona.

¹¹Napa'baraniammi kalenna Amazia nampa napimping tantarana mange ri ka'bung lappara' niarenga Ka'bung Asin. Anjoremmi ke'nanga a'bundu', na nia' 10.000 jaina tantara Edom nabuno ke'nanga.

¹²Nia' 10.000 tau maraengannaya natahang. Naerangi anjo ke'nanga nai' ri coppo'na moncong batua ri kota Sela nampa napasambila kabusu' naung sa'genna mate.

¹³Lalanna anjo wattua, anjo tantara Israel nisuroamo ammotere' ri Amazia, siagang tenaya nipa'biangi amminawang a'bundu', nabundukimi kota-kota niaka ri alla'na Yehuda siagang Samaria kammayatompa Bet-Horon. Nia' 3.000 tau nabuno ke'nanga siagang jai barang-barang narampasa' ke'nanga.

¹⁴Le'baki nabeta tantara Edom, ammotere'mi Amazia angngerang patung-patung barhalana tu Edom nampa naboli' ri Yehuda. Nampa attunu dupa untu' anjo patung-patunga siagang anynyomba ri anjo patung-patunga.

¹⁵Anjo sikamma panggaukanna Napakalarroi Batara. Assuroi sitau na'bi mange ri Amazia. Nakana anjo na'bia, “Angngapa kinynyomba mae ri rewatana bansa maraenga tenaya nakkulle ampasalamaki bansa kalenna battu ri kakoasanta?”

¹⁶Nakanamo Amazia, “Tongkoki bawanu! Punna tena kubunokontu! Tena le'bakaki' anne angngangkakko a'jari guru mae ri karaenga!” Jari a'merekimi anjo na'bia. Mingka rioloanganna anggappai kasampatang angkana, “Kamma-kamma anne kuassemmi angkanaya le'ba'mi Napattantu Allata'ala angkanaya laNaancurukki' lanri anjo panggaukanta, siagang lanri tenana kijampangi pappakaingakku.”

¹⁷Assikongkoloki Amazia karaeng Yehuda siagang sikamma tumailalanna angngewai tu Israel. Akkiringi tunisuro mange ri Yoas karaeng Israel, ana'na Yoahas, cucunna Yehu, untu' ampa'ngarai a'bundu'.

¹⁸Mingka akkirimmi Karaeng Yoas pappiali kamma anne, “Nia' se're wattu sallang nakkiring rompo' akkatintinga ri monconna Libanon tuntutang kammaya anne mae ri poko' camaraya, ‘He poko' camara, passareangi ana' tulolonnu mae ri anakku untu' a'jari bainenna.’ Mingka ribokoanganna nia'mo sikayu olo'-olo' battu ri romang ammalo anjoreng, nampa naonjo'-onjokang anjo rompo' akkatintinga.

¹⁹Ikau Amazia, lompomi je'ne' bawanu angkanaya le'ba'mi nubeta tu Edom, mingka bajikangngang ammantang mako ri balla'. Apa matu-matunnu a'boya pa'bettesang lanri poro ero'nu bawang ancilakai kalennu siagang ra'ya'nu?”

²⁰Mingka anjo Amazia karaeng Yehuda, tena najampangi kana-kananna Yoas karaeng Israel. Siagang Nakaerokang memang tongi Allata'ala sollanna nibeta Amazia lanri le'ba'namo anynyomba ri patung barhalana tu Edom.

²¹Lanri kammana anjo a'lampami Yoas siagang ana' buana mange ri Bet-Semes nampa a'bundu' siagang Amazia anjoreng.

²²Nibetai tantara Yehuda siagang lari kabusu'mi ke'nanga ammotere' massing ri balla'na.

²³Nijakkala'mi Amazia ri Yoas nampa nierang mange ri Yerusalem, siagang naruntung tembo'na anjo kotaya kira-kira nia' 200 metere' la'buna, appakkaramula battu ri Pakke'bu' Lompo Efraim sa'genna mange ri Pakke'bu' Lompo Panyingkulu'.

²⁴Sikontu bulaenga siagang peraka kammayatompa sikontu pakkakasa' nibuntuluka lalang ri Balla'Na Batara siagang niaka nijagai ri Obed-Edom, kammayatompa sikontu barang-barang niaka ri balla' karaenga, siagang siapa are jaina tunitahang, nilalingi ri Yoas a'lampa mange ri Samaria.

²⁵Ri wattunna matemo Yoas karaeng Israel, attallasa' iji Amazia karaeng Yehuda 15 taung sallona pole.

²⁶Baku' a'bokona Amazia ri Batara, assikongkolo'mi taua angngewai ri Yerusalem. Lanri kammana anjo larimi mange ri kota Lakhis; mingka niondangi ri musu-musunna mange anjoreng nampa nibuno. Nierangi maya'na siagang jarang mange ri Yerusalem, nampa nitarawang ri pa'jerakkanna sikamma karaenga ri Kota Daud. Pau-pau maraengannaya ri passala'na Karaeng Amazia battu ri pakaramulanna sa'genna ri kala'busang pamarentahanna, niaki nicata' lalang ri kitta' “Pau-pauanna Sikamma Karaeng Yehuda siagang Israel.”