Read Makassar Version – KITTA' MATANGKASA 2 PATTOTTORANG 27 Bible Online

2 PATTOTTORANG 27 - Makassar Version – KITTA' MATANGKASA bible

2 PATTOTTORANG 27

¹Wattunna a'jari Karaeng Yotam ri Yehuda, 25 taung umuru'na, siagang ammarentai ri Yerusalem 16 taung sallona. Amma'na iamintu Yerusa ana'na Zadok.

²Ningai Yotam ri Batara, sangkamma todong manggena. Iaji bawang katena nattunu dupa ri Balla'Na Batara, sangkamma nagaukanga manggena. Mingka manna nakamma, tuli a'gau' dosana ra'yaka.

³Iaminne Yotam ambangungi Pakke'bu' Lompo Bageang Wara'na Balla'Na Batara, siagang ampakajarreki tembo'na Yerusalem ri daera niarenga Ofel.

⁴Ambangungi kota-kota ri daera monconna Yehuda siagang tembo'-tembo' pattahangnganga kammayatompa menara-menara niaka ri romanga.

⁵Nabunduki nampa nabeta karaeng Amon siagang tantarana, nampa napassa tu Amon assare pa'bayara'. Tassikali lalang tallun taung musti a'bayara' ke'nanga 3.400 kilogarang pera', ruang rupa gandung, massing-massing 1.000 kilogarang tassirupa.

⁶Pila' a'jari jarre'mi kakoasanna Yotam lanri majarre'na tappa'na siagang mannurukinna mae ri Karaeng Allata'alana.

⁷Kajariang-kajariang maraengannaya ri wattu pamarentahanna Yotam, pa'bundukang-pa'bundukang nagaukanga siagang antekamma akkala'na lalang pa'bundukanga, kabusu'na niaki nicata' lalang ri kitta' “Pau-pauanna Sikamma Karaeng Israel siagang Yehuda.”

⁸Wattunna a'jari Karaeng Yotam, 25 taung umuru'na, siagang 16 taung sallona ammarenta ri Yerusalem.

⁹Matemi siagang nitarawang ri Kota Daud, nampa ana' bura'nena niarenga Ahas ansambeangi a'jari karaeng.