Read Makassar Version – KITTA' MATANGKASA 2 PATTOTTORANG 32 Bible Online

2 PATTOTTORANG 32 - Makassar Version – KITTA' MATANGKASA bible

2 PATTOTTORANG 32

¹Le'baki nagaukang Karaeng Hizkia sikamma gau' pammatei majarre'na tappa'na mae ri Batara, battumi karaeng Asyur niarenga Sanherib ambunduki tu Yehuda. Nakurungi kota-kota niaka pattahanganna siagang naparentakangi pasukanna sollanna naalle anjo kota-kotaya.

²Ri wattunna naasseng Hizkia angkanaya eroki Sanherib ambunduki Yerusalem,

³natappukimi siagang pagawe-pagawena siagang perwira-perwirana untu' antongkoki tampa'-tampa' pammantangngang je'ne' niaka ri pantaranna kotaya, sollanna tena nanggappa je'ne' tu Asyur punna battu ke'nanga mange ri ampi'na Yerusalem. Sanna' jaina tu nipajama untu' antongko' kabusuki sikontu timbuseng je'ne' assolong assuluka ri pantaranna kotaya.

⁵Nampa nakassakki karaenga pattahanganna kotaya; napakabajiki tembo'na, appaentengi menara-menara irateanna siagang ambangungi tembo' maraeng pantarang. Pantaranganna anjo napakabaji' tongi pattahangngang nibangunga irate ri butta pannambunganga ri bageang rayana kota sallona Yerusalem. Assuro pare' tongi sanna' jaina poke siagang pannangkisi'.

⁶Angngangkaki perwira-perwira untu' ampimpingi sikontu tu bura'ne niaka lalang ri kotaya, nampa nasuroi ke'nanga asse're ri parang dallekanna pakke'bu' lompona kotaya. Nampa nakana ri ke'nanga,

⁷“Sa'barakko siagang pakajarreki tappa'nu; teako mallakki mae ri karaeng Asyur yareka mae ri pasukanna. La'bi kassakangngangki' ikatte na anjo ke'nanga.

⁸Ia ke'nanga kagassingang rupatau napake, mingka ikatte nia' Karaeng Allata'alata untu' ambantuki' siagang la'bunduka untu' ikatte.” Nalangngere'na kana-kananna karaenna ke'nanga, a'jari baranimi ra'yaka.

⁹Nia' siapa are sallona, ri wattunna nia' ija Sanherib siagang pasukanna ri Lakhis, akkirimmi tunisuro mange ri Hizkia siagang ra'ya'na iamintu tu Yehuda niaka ri Yerusalem, untu' ampabattui pasang kammana anne,

¹⁰“Inakke Sanherib karaeng Asyur, ero' akkuta'nang angkana apa saba'na nubarani kamma ammantang ri Yerusalem takkurungamo kamma-kamma anne.

¹¹Apaka nakana Hizkia angkanaya laNalappassangko Karaeng Allata'alanu battu ri kakoasangku? Teako tappakki nasaba' poro naballe-balleinuji antu. Lanabalang parekangko antu mate cipuru' siagang mate turere.

¹²Ia KalenNa angngancuruki tampa'-tampa' panynyombanga siagang tampa'-tampa' pakkoro'bangnganga mae ri Batara, nampa nasuro tu Yehuda siagang tu Yerusalem untu' anynyomba siagang attunu dupa ri se're bawang tampa' pakkoro'bangngang.

¹³Apaka tanuassengai apa le'baka kugaukang siagang nagaukang boe-boeku mae ri bansa-bansa maraenga? Tena le'bakai rewata-rewatana bansa maraenga allappasangi bansana battu ri kakoasanna karaeng Asyur.

¹⁴Inai battu ri ke'nanga le'ba' anggaukangi anjo kammaya? Tena olona lakkulle rewatanu ampasalamakko!

¹⁵Teako lappassangi karaennu amballe-balleiko siagang ampadongo'-dongokko! Teako tappaki mae ri ia. Nasaba' manna kemae tena le'bakai nia' rewatana se'rea bansa akkulle ampasalamaki bansana battu ri kakoasanna karaeng Asyur. Mattantuna anjo rewatanu tena todong nakkulle allappassangko!”

¹⁶Jai iji kana-kana maraenga napabattu anjo tunisurona karaeng Asyur untu' ampakatunai Karaeng Allata'ala siagang Hizkia, anjo atanNa Batara.

¹⁷Annulisi' tongi sura' karaeng Asyur, angngewaya ri Batara, Allata'ala nasombaya tu Israel. Kammami anne bonena anjo suraka, “Rewata-rewatana bansa maraenga takkulleai allappassangi bansana battu ri kakoasangku; kammatommi anjo rewatana Hizkia tena nalakkulle allappassangi bansana battu ri kakoasangku.”

¹⁸Ammarrang-marrangi anjo sikamma tunasuroa karaeng Asyur ampabattui anjo pasanga lalang bicara tu Ibrani, untu' ampakamallaki siagang untu' allammai sumanga'na tu Yerusalem niaka irate ri tompo'na tembo' kotaya, sollanna akkulle naalle gampang ke'nanga anjo kotaya.

¹⁹Lalang bicaranna ke'nanga napasangkammai anjo Allata'ala nisombaya ri Yerusalem siagang rewata-rewatana bansa maraenga, iamintu patung-patung bate pare'na rupataua.

²⁰Jari appala' doammi Karaeng Hizkia siagang Na'bi Yesaya ana'na Amos. Akkio'mi' ke'nanga appala' tulung mae ri Allata'ala.

²¹Nampa akkirimmo malaeka' Batara untu' ambunoi anjo sikamma tantarana siagang perwira-perwirana tu Asyur. Teaimi sipato' siri'-siri'na karaeng Asyur ammotere' mange ri pa'rasanganna. Ri se'reang allo, ri wattunna sitabang nia' lalang ri balla' rewatana, nia'mo siapa are tau battu ri ana' bua kalenna ambunoi siagang pa'dang.

²²Kammami anjo batena Batara allappassangi Hizkia siagang pandudu'na Yerusalem battu ri kakoasanna Sanherib karaeng Asyur, kammayatompa battu ri musu-musunna maraenga. Nisaremi ke'nanga ri Batara kasannangngang ri katallassanna ke'nanga; tenamo nigarui ke'nanga ri bansa-bansa singngampi'na ke'nanga.

²³Jaimi tau battu mange ri Yerusalem untu' angngerang passare mae ri Batara siagang hadia-hadia untu' Hizkia; sa'genna baku'na anjo wattua nikangngalikammi ri sikontu bansaya.

²⁴Anjo wattua tu'guru' garringi Karaeng Hizkia. Pammate sanna'na anjo garrinna sa'genna a'biring dudumi mate. Appala' doammi ri Batara; nampa nisaremo pammatei ri Batara angkanaya lammollei ri garrinna.

²⁵Mingka lanri tampona, tenamo nappala' sukkuru' mae ri anjo pannulunNa Batara. Lanri kammana anjo larromi Batara ri tu Yehuda siagang ri tu Yerusalem.

²⁶Mingka kale'bakkanna napakatunami kalenna Hizkia siagang tu Yerusalem; jari lalang attallasa'na ija Hizkia, tenapa nanipabattui anjo hukkunganga.

²⁷A'jarimi Karaeng Hizkia sanna' kalumanynyanna, siagang nipakalompoi ri sikontuna taua. Appare'mi kamara'-kamara' untu' pammolikang barang-baranna, iamintu: bulaeng, pera', batu-batu paramata, rampa-rampa, pannangkisi', siagang barang-barang maraengannaya.

²⁸Nia' todong gudang-gudanna untu' pammolikang wassele' lamung-lamunna kammayami: gandung, anggoro', siagang minynya' zaitun; kammayatompa nia' todong siapa are bara untu' pammantangngang sapi-sapi siagang gimbala'na sannaka jaina.

²⁹Pantaranganna anjo ambangung tongi jai kota. Anjo kakalumanynyangngang Napassareanga Allata'ala mae ri ia alla'bi-la'bi.

³⁰Iaminne Karaeng Hizkia ampapparekangi kollang je'ne' assolonga battu ri timbuseng je'neka ri Gihon, nampa napasolong je'neka battu ri solongang niaka irawanganna buttaya antama ri kota Yerusalem. Nanjari kabusu' anjo apa najamaya Hizkia.

³¹Siagang ri wattunna battu sikamma tunisuroa battu ri Babel untu' ampakkuta'nangngangi antekamma batena appakalannasa' nammolle ri garrinna, nilappassammi Hizkia ri Batara untu' a'gau' ri ero'na, lanri ero'na niso'ri pa'mai'na.

³²Pau-pau maraengannaya ri passala'na Karaeng Hizkia, siagang antekamma pangngamaseanna ri Batara, niaki nicata' lalang ri kitta' Wahyu battu ri Allata'ala mae ri Na'bi Yesaya Ana'na Amos, siagang lalang ri kitta' Pau-pauanna Sikamma Karaeng Yehuda Siagang Karaeng Israel.

³³Matemi Hizkia, nampa nitarawang ri butta pangngambikang niaka ri pa'jerakkanna sikamma karaenga. Nipakalompoi ri sikontu ra'ya' Yehuda siagang Yerusalem ri wattunna mate. Nampa ana'na niarenga Manasye ansambeangi a'jari karaeng.