Read Makassar Version – KITTA' MATANGKASA 2 PATTOTTORANG 33 Bible Online

2 PATTOTTORANG 33 - Makassar Version – KITTA' MATANGKASA bible

2 PATTOTTORANG 33

¹Wattunna a'jari karaeng Manasye ri Yehuda, umuru'na 12 taung, siagang ammarentai 55 taung sallona ri Yerusalem.

² A'gau' dosai mae ri Batara sangkamma kaja'dallang nagaukanga bansa-bansa le'baka Nabongka Batara assulu' battu ri butta Kanaan ri wattunna napantamakki tu Israel anjo pa'rasanganga.

³Sikamma tampa'-tampa' panynyombang barhala le'baka naputta Hizkia, manggena, nabangungi ammotere'. Ambangungi tampa'-tampa' pakkoro'bangngang untu' anynyomba ri Baal, siagang appareki patung-patung Dewi Asyera, kammayatompa anynyombai ri bintoeng-bintoenga.

⁴ Napaui Batara angkanaya anjo Yerusalem la'jari tampa' panynyombang mae ri KalenNa sa'genna satunggu-tungguna, mingka anjoreng, ri Balla'Na Batara, ambangummi Manasye tampa'-tampa' pakkoro'bangngang mae ri rewata-rewataya.

⁵Anjoreng ri ruaya paranglakkeng Balla'Na Batara ambangungi tampa'-tampa' pakkoro'bangngang untu' anynyomba mae ri bintoeng-bintoenga.

⁶Ana'-ana' kalenna napassareang nipa'jari koro'bang nitunu ri Ka'bung Lappara' Hinom. Nagaukang tongi jama-jamang sanroa, pacinika, pangngissenganga, siagang appalaki pangngunju' mae ri roh-roh tanicinika. Teai sipato' dorakana mae ri Batara, sa'genna napakalarromo Batara.

⁷ Naboliki patung barhalaya lalang ri Balla'Na Batara, padahala' le'ba'mi angkana Allata'ala mae ri Daud siagang Salomo ana'na, angkanaya, “Anne BallakKu ri Yerusalem, le'baka Kupile, battu ri alla'na sampuloa anrua daera ri Israel, le'ba'mi Kupattantu a'jari tampa' panynyombang mae ri KalengKu sa'genna satunggu-tungguna.

⁸Punna naturuki umma' Israel sikontu parentaKu siagang hukkung-hukkung napassareanga Musa atangKu mae ri ke'nanga, tena nalaKulappassang ke'nanga nibongka assulu' battu ri pa'rasangang le'baka Kupassareang mae ri ke'nanga.”

⁹Naerangi Manasye ra'ya' Yehuda mange ri panggaukang dosaya, la'bi ja'dallangnganga nadosa nagaukanga bansa-bansa le'baka Nabongka assulu' Batara battu ri Kanaan ri wattunna napantamakki umma'Na Batara anjo pa'rasanganga.

¹⁰Nipakaingaki Manasye siagang ra'ya'na ri Batara mingka taerokai ke'nanga mappilangngeri.

¹¹Lanri kammana anjo Napabattumi Batara sikamma panglima tantarana Asyur untu' ambunduki tu Yehuda. Nijakkala'mi Manasye siagang pakkai', nampa nisikko' siagang nierang mange ri Babel.

¹²Lalang nakasia'namo anjo sessaya napakatunami kalenna ri dallekanNa Karaeng Allata'alana, nampa appala' doang appala' pannulung.

¹³Naturukiammi Allata'ala pappala'na Manasye siagang nipoterammi mange ri Yerusalem untu' ammarenta poleang. Passala' anjo kajarianga a'jari tappa'mi Manasye angkanaya Iaminjo Batara, Allata'ala matojenga.

¹⁴Nampa napakatinggi Manasye tembo' pantaranga ri bageang rayana Kota Daud. Napakaramulai ri se'reang tampa' ri ka'bung rampi'na timbuseng je'neka ri Gihon nampa tulusu' wara' sa'genna Pakke'bu' Lompo Juku' siagang bageang kota niarenga Ofel. Ri tunggala' kota niaka pattahanganna ri Yehuda, nia' todong naboli' sitau panglima tantara.

¹⁵Napakabellai sikamma patung-patung rewata bansa maraenga siagang sikamma barhala le'baka niboli' lalang ri Balla'Na Batara. Nabongkaraki tampa'-tampa' pakkoro'bangngang mae ri barhalaya niaka ri bontona Balla'Na Batara, siagang ri tampa'-tampa' maraengannaya ri Yerusalem. Kabusu'na anjo naerangi assulu' nampa napela'.

¹⁶Nampa napakabaji' tampa' pakkoro'bangngang panynyombanga mae ri Batara, nampa assare anjoreng koro'bang pappasiama' siagang koro'bang sukkuru'. Sikontu tu Yehuda nasuro kabusuki anynyomba mae ri Karaeng Allata'alana Israel.

¹⁷Assare iji ra'yaka koro'bang ri tampa'-tampa' panynyombang maraenga, mingka anjo passarea untu' mae ri Batara.

¹⁸Pau-pau maraengannaya ri passala' pamarentahanna Manasye siagang ri passala' pappala' doanna mae ri Allata'ala, kammayatompa pasang-pasang Napabattua Allata'ala mae ri ia tete ri na'bia siagang lalang arenNa Batara, Allata'alana Israel, kabusu'na niaki nicata' lalang ri kitta' Pau-pauanna Sikamma Karaeng Israel.

¹⁹Lalang ri kitta' Pau-pauanna Na'bi-na'bia nia' tongi nicata' pappala' doanna Manasye siagang papialinNa Allata'ala mae ri anjo pappala'na, kammayatompa carita ri passala'na dosa-dosa nagaukanga lalang tenanapa natoba', tampa'-tampa' panynyombang barhala siagang patung-patung Dewi Asyera napareka, siagang barhala-barhala nasombaya.

²⁰Matemi Manasye nampa nitarawang ri balla' karaenga. Nampa ana'na niarenga Amon ansambeangi a'jari karaeng.

²¹Wattunna a'jari Karaeng Amon ri Yehuda, 22 taung umuru'na, siagang ruan taungi sallona ammarenta ri Yerusalem.

²²Sangkamma todong manggena, ia doraka tongi mae ri Batara. Anynyombai mae ri barhala-barhala nasombaya manggena siagang assarei koro'bang mae ri anjo barhala-barhalaya.

²³Mingka tena nasangkamma manggena anne Amon, lanri tena naero' ampakatunai kalenna siagang taerokai ammotere' mae ri Batara; ba'lalo la'bi lompoangngangi dosana na dosana manggena.

²⁴Pagawe-pagawena Amon assikongkoloki angngewai Karaeng Amon nampa nabuno lalang ri balla' karaenga.

²⁵Mingka nibuno tongi ri ra'ya' Yehuda anjo sikamma tau ambunoai Karaeng Amon; nampa naangka' ke'nanga ana'na Amon niarenga Yosia a'jari karaeng.