Read Makassar Version – KITTA' MATANGKASA 2 PATTOTTORANG 4 Bible Online

2 PATTOTTORANG 4 - Makassar Version – KITTA' MATANGKASA bible

2 PATTOTTORANG 4

¹ Assuro pareki Karaeng Salomo se're tampa' pakkoro'bangngang tambaga, la'buna siagang sangkara'na massing-massing 9 metere', siagang tinggina 4,5 metere'.

²Appare' tongi se're gumbang tambaga a'bundalaka, nampa ukkuranna kammai anne: lantanna 2,2 metere', garisi' tangngana 4,4 metere', siagang bundala'na 13,2 metere'.

³Attammu biring pantara'na nibelo-beloi siagang ruang barrisi' gambara' sapi, nipasitembo' siagang anjo gumbanga.

⁴Anjo gumbanga nipadongkoki irate ri dongko'na sampulo anrua sapi tambaga, tallu a'dalle' wara', tallu a'dalle' timboro', tallu a'dalle' kalau' siagang tallu a'dalle' anrai'.

⁵Kapala'na anjo gumbanga 75 milimetere'. Birinna sangkammai biring cangkiri' appakkoka assulu' sangkamma bunga ta'be'reka. Anjo gumbanga akkullei ammone kira-kira 60.000 litere'.

⁶ Appare' tongi Karaeng Salomo 10 katoang lompo, lima untu' niboli' ri timboranna Balla'Na Batara, siagang lima untu' ri warakkanna. Ia matu-matunna anjo katoanga iamintu ambissai kere'-kere'na olo'-olo' eroka nitunu a'jari koro'bang. Je'ne' niaka ilalang ri anjo gumbang lompoa nipasadiakangi sikamma imanga untu' antangkasi kalenna.

⁷ Appare' tongi 10 pa'dongkokang kanjoli bulaeng sangkamma modele' le'baka nirancanakang, siagang 10 meja. Sikontu anjo pa'dongkokang kanjolia siagang mejanga niboliki lalang ri kamara' makase'rea ri Balla'Na Batara, lima ri kairi siagang lima ri sa'ri kananna. Appare' tongi 100 mangko' bulaeng.

⁹Appare' tongi Salomo se're paranglakkeng bageang lalang untu' sikamma imanga, siagang se're paranglakkeng bageang pantarang. Sikamma pakke'bu' lompoa ri alla'na anjo ruaya paranglakkeng nilapisi kabusuki tambaga.

¹⁰Gumbanga niboliki ri panyingkulu' ri alla'na bageang rayana siagang bageang timboro'na Balla'Na Batara.

¹¹Huram, iamintu kapalana sikontu pajama paukirika, appareki pamaja'-pamaja', sikopang-sikopang, siagang mangko'-mangko'. Jari napa'le'ba' kabusu'mi napare' sikontu pakkakasa'na Balla'Na Batara situru' janjinna mae ri karaeng Salomo. Iaminne sikamma pakkakasa' le'baka napare': Rua benteng lompo Rua ulu benteng sangkammaya mangko' nibolika irateanna anjo ruaya benteng lompo Anyang-anyang rante massing ri ulunna anjo bentenga 400 rappo delima tambaga nisusunga rua a'jijiri' ri tammulilina anyang-anyang rantea ri tunggala' ulu bentenga 10 kareta 10 katoang lompo Gumbang tambaga 12 sapi tambaga napa'dongkoki anjo gumbanga Pamaja'-pamaja', sikopang-sikopang siagang garpu-garpu. Sikontu anjo pakkakasaka napareka Huram untu' Balla'Na Batara sangnging tambaga nipare' nampa nikeso' sa'genna accilla'. Kabusu'na anjo napareki Huram situru' apa naparentakanga Karaeng Salomo.

¹⁷Nasuro pareki karaenga anjo barang kammaya ri tampa' papparekang ri alla'na Sukot siagang Zereda ri Lappa'ra' Yordan.

¹⁸Lanri teai sipato' jaina anjo barang-barang kammaya sa'genna tena manna sitau akkulle angngassengi angkanaya siapa kilogarang tambaga nipake.

¹⁹Assuro pare' tongi Karaeng Salomo pakkakasa'-pakkakasa' bulaeng ti'no' maraengannaya untu' Balla'Na Batara. Iaminne areng-arenna anjo pakkakasa'-pakkakasa' napareka: Tampa' pakkoro'bangngang Meja untu' roti nipatala Sikontu pa'dongkokang kanjoli bulaeng siagang kanjoli bulaenna untu' niparinra ri dallekanna Kamara' Kaminang Matangkasaka, situru' nirancanakanga Belo-belo sangkammaya bunga Kanjoli-kanjoli Pangngepe'-pangngepe' Pakkakasa' untu' antangkasi sumbu kanjolia Mangko'-mangko' Panne-panne untu' dupa Panne-panne untu' bara pepe' Sikontu pakke'bu' antamaya ri Balla'Na Batara siagang pakke'bu' Kamara' Kaminang Matangkasaka nilapisi' ngasengi bulaeng.