Read Makassar Version – KITTA' MATANGKASA 2 PATTOTTORANG 7 Bible Online

2 PATTOTTORANG 7 - Makassar Version – KITTA' MATANGKASA bible

2 PATTOTTORANG 7

¹ Le'baki Salomo appala' doang, nia'mo pepe' turung battu rate ri langika angkanrei anjo koro'bang-koro'bang nipassareanga mae ri Batara. Nampa rassimo anjo Balla'Na Batara ri singara' kahaderanNa Batara,

²sa'genna takkulleamo sikamma imanga ampantamakki.

³ Ri wattunna nacini' ra'ya' Israel anjo pepe' turunga battu rate ri langika siagang singara' kahaderanNa Batara ampantamakki Balla'Na Batara, su'ju' kabusu'mi ke'nanga naung ri daparaka, nampa anynyomba siagang ammuji ri Allata'ala, lanri baji'Na siagang mangngamaseangi satunggu-satungguna.

⁴Le'baki anjo, assaremi koro'bang Karaeng Salomo siagang sikontu tau niaka a'rappung anjoreng mae ri Batara.

⁵Untu' koro'bang pappasiamakkang assarei Salomo 22.000 sapi siagang 120.000 gimbala'. Kammami anjo batena karaenga siagang sikontu ra'yaka anggaukangi anjo upacara napassareanna anjo balla' panynyombanga mae ri Batara.

⁶Sikamma imanga ammentengi ri tampa' le'baka nipattantu untu' pammantanganna ke'nanga; assidallekangi ke'nanga siagang tu Lewi ammujia ri Batara siagang musi' le'baka napare' Daud, nampa akkelong iamintu kelongang, “Mannannungangi PangamaseanNa!” situru' napassuroanga Daud. Sikamma imanga appasa'rai tarompe' nampa sikontu ra'yaka ammenteng kabusuki.

⁷Nampa napassareang Salomo mae ri Batara paranglakkeng bageang ri tangngaya niaka ri dallekanna anjo balla' sambayanga. Nampa napassareang anjoreng koro'bang nitunua, koro'bang gandung siagang jannana olo'-olo' untu' koro'bang pappasiamaka. Kabusu'na anjorengi napassareang lanri anjo tampa' pakkoro'bangngang tambaga le'baka napare' tanaalleai untu' sikontu anjo passarea.

⁸Tuju alloi nagaukang Salomo siagang sikontu umma' Israel anjo Allo Lompo Pa'ballakang Leko'-lekoka. Teai sipato' jaina tau niaka a'rappung untu' anjo pa'gaukang kasuarranga. Nia' tau battu ri daera bellaya sa'genna oloang mange ri Hamat bageang wara' sa'genna mange ri pa'baeng-baenna Mesir bageang timboro'.

⁹Tuju alloi ke'nanga a'rappung untu' upacara niresmikanna tampa' pakkoro'bangnganNa Batara, nampa tuju allo pole untu' ansuarri Allo Lompo Pa'ballakang Leko'-lekoka. Ri allo kala'busanna nigaukammi kasuarrang pannongko'na anjo upacaraya,

¹⁰nampa ammukona ri tanggala' 23 bulang 7, nasuromi Salomo ammotere' anjo taua. Rannu kabusuki taua mae ri anjo sikontu kabajikang Nagaukanga Batara mae ri bansa Israel umma'Na, mae ri Daud, kammayatompa mae ri Salomo.

¹¹Le'baki napa'jari jama-jamanna Salomo untu' ambangungi Balla'Na Batara siagang balla' karaenga situru' rancanana,

¹²Napappicinikammi pole KalenNa Batara mae ri Salomo ri se'reang bangngi. Nakana Batara ri ia, “Kulangngere'mi papala'nu siagang Kutarimami anne Ballaka a'jari tampa' matangkasa' untu' assare koro'bang mae ri KalengKu.

¹³Punna tena Kuppaturung bosi yareka akkiringA' battu katimbang untu' ancappuki wassele' lamung-lamunga yareka appabattuA' garring mae ri UmmakKu,

¹⁴nampa napake arengKu anjo UmmakKu ampakatunai kalenna, siagang appala' doang kammayatompa battui mae ri Nakke na nabokoi panggaukang ja'dala'na ke'nanga, laKupilangngeri battu ri suruga pappala' doanna ke'nanga. LaKupammopporangi dosa-dosana ke'nanga siagang Kupa'jari coppongi pa'rasanganna ke'nanga ammotere'.

¹⁵Latuli Kuparhatikangi anne BallakKu siagang tuli sadiaKu untu' ampilangngeri pappala' doang nipanaika battu anrinni ri tampaka.

¹⁶Yangasenna anjo laKugaukangi lanri anne tampaka le'ba'mi Kupile siagang Kutangkasi untu' a'jari tampa' panynyombang mae ri Nakke sa'genna satunggu-tungguna. LaKuparhatikangi siagang Kujagai satunggu-tungguna.

¹⁷Punna sangkamma todongko Daud manggenu, iamintu nuturuki erokKu lalang tallasa'nu siagang nuturuki hukkung-hukkungKu kammayatompa nugaukangi sikontu apa Kuparentakanga mae ri kau,

¹⁸ laKurupai anjo janjingKu mae ri manggenu Daud, angkanaya tuli lania' battu ri jari-jarina a'jari karaeng mae ri tu Israel.

¹⁹Mingka punna ikau siagang ra'ya'nu nudakkai hukkung-hukkungKu siagang parenta-parentakKu, kammayatompa anynyombako mae ri rewata-rewata maraenga,

²⁰laKupasulukko battu ri pa'rasangang le'baka Kupassareang mae ri kau. LaKubokoi tongi anne ballaka, le'baka Kupattantu a'jari balla' panynyombang mae ri KalengKu. Kemae-kemaei anne ballaka lanipakatuna siagang lanikakkali ri taua.

²¹Anne Balla' sambayanga kamma-kamma anne sanna' nipakalompona, mingka anjo sallang wattua sikamma tau numaloa lalannasa' kabusuki anciniki. Lanakana ke'nanga, ‘Angngapa nanapakamma anjo Batara anne pa'rasanganga siagang anne ballaka?’

²²Nampa lappialimo sallang taua angkana, ‘Lanri nabokoina Batara, Allata'alana ke'nanga le'baka anrurungangi ke'nanga assulu' battu ri Mesir. Anynyombai siagang a'janji ke'nanga talaminraya pa'mai'na mae ri rewata-rewata maraenga. Lanri kammanami anjo naNapabattu Batara anne balaya mae ri ke'nanga.’ ”