Read Makassar Version – KITTA' MATANGKASA 2 PATTOTTORANG 8 Bible Online

2 PATTOTTORANG 8 - Makassar Version – KITTA' MATANGKASA bible

2 PATTOTTORANG 8

¹Niaki 20 taung sallona nabangung Karaeng Salomo Balla'Na Batara siagang balla' karaenga.

²Kota-kota napassareanga Karaeng Hiram mae ri ia nabangungi ammotere', nampa nasuro tu Israel ammantang anjoreng.

³Naempoi ammotere' daera Hamat siagang Zoba

⁴kammayatompa napakajarreki kota Tadmor ri parang lompoa, nampa nabangung ammotere' sikontu passe'reanna pammolikang kaparalluanga ri Hamat.

⁵Kota Bet-Horon-Ratea siagang Bet-Horon-Rawaya nabangungi ammotere' a'jari kota nia' tembo' pattahanganna siagang ammake panjoli lompo pakke'bu' lompona.

⁶Kammayatompa nabangungi ammotere' kota Baalat, siagang sikontu kota pammolikang apa-apaya, kammayatompa pammantanganna kareta bunduka siagang jaranna. Sikontu rancana pambangunanna ri Yerusalem, ri Libanon siagang ri sikontu daera kakoasanna le'ba' kabusu'mi napa'le'ba'.

⁷Sikontu jari-jarina bansa Kanaan tenaya nakkulle la'busu' nibuno ri tu Israel ri wattunna napantamakki ke'nanga anjo pa'rasanganga, napagio' ngasengi Salomo untu' anjama terasa'. Ia ke'nanga iamintu tu Het, Amori, Feris, Hewi siagang Yebus. Sa'genna kamma-kamma anne tuli a'jari atana anjo jari-jarina ke'nanga.

⁹Tena nisuroi tu Israel anjama nipassa; nisarei ke'nanga tugasa' salaku parajuri', perwira, komandang kareta bundu', siagang tantara pasukang a'jarang.

¹⁰Nia' 250 pagawe nisare tanggong jawa' mae ri tau anjama terasaka lalang a'rupa-rupa usaha pambangunang.

¹¹Napaletteki bainenna Salomo, iamintu ana' bainena karaeng Mesir, battu ri Kota Daud mange ri balla' le'baka nabangungangi. Nasaba' nakana pikkiranna Salomo, “Tena nakkulle ammantang bainengku ri balla' kakaraenganna Daud, karaeng Israel, lanri sikontu tampa' le'baka napammantangngi Patti Parjanjianga matangkasa' kabusuki.”

¹²Assarei Salomo koro'bang nitunu mae ri Batara irate ri tampa' pakkoro'bangngang nabangunga ri dallekanna Balla'Na Batara.

¹³ Anjo koro'bang-koro'banga nipassareangi situru' hukkung napassareanga Musa untu' tunggala' allo lompoa, kammayami: allo Pammari-marianga, allo lompo Bulang Beru, siagang tallua allo lompo taung-taung iamintu allo lompo Roti Tenaya Nammake Pa'gambang, allo lompo Pakkattoang, siagang allo lompo Pa'balla'-ballakang Leko'-leko'.

¹⁴Situru' paratorang-paratorang napassareanga Daud manggena, naatoroki Salomo tugasa' allo-allona sikamma imanga siagang untu' tu Lewi mustia angkelongangi kelong pammujia mae ri Batara siagang nabantu sikamma imanga anggaukangi upacara-upacara panynyombanga. Kammayatompa sikamma pangawala'na Balla'Na Batara nibage-bagei lalang regu-regu untu' tunggala' pakke'bu' lompoa, situru' pangngatoro' napassareanga Daud atanNa Allata'ala.

¹⁵Sikontu pangngatoro' napassareanga Daud mae ri sikamma imanga siagang tu Lewi ri passala'na gudang-gudanga siagang mara'-maraengannaya, naturuki kabusuki siagang baji'.

¹⁶Na le'ba'mo anjo pambangunang narancanakanga Salomo. Sikontu anjo jamanga, appakkaramula battu ri nipadongko'na batu pundasia sa'genna le'ba' anjo Balla'Na Batara, le'ba' kabusu'mi nijama siagang baji'.

¹⁷Le'baki anjo a'lampami Salomo mange ri Ezion-Geber siagang Elot, kota-kota palabuhang ri biring tamparang Teluk Akaba ri pa'rasangang Edom.

¹⁸Akkiringi Karaeng Hiram mae ri ia kappala'-kappala' nipajappaya ri ana' bua kalenna Hiram siagang ana' kappala' niaka pangalamanna. Assombalaki ke'nanga mange ri pa'rasangang Ofir siagang ana' buana Salomo nampa angngalle battu anjoreng 15.000 kilogarang bulaeng na naerang mange ri Salomo.