Read Makassar Version – KITTA' MATANGKASA EZRA 1 Bible Online

EZRA 1 - Makassar Version – KITTA' MATANGKASA bible

EZRA 1

¹ Ri taung makase're ammarenta Kores, karaeng Persia, Narupaimi Batara apa le'baka Napau tete ri Na'bi Yeremia. Napagio'mi Batara nyawana Kores untu' appasulu' se're parenta, nibacaya ri sikontu kakaraenganna. Ia bonena anjo sura' parentaya iamintu:

² “Anne parentana Kores, karaeng Persia. Batara, Allata'ala makoasaya ri suruga, le'ba' angngangkaka' a'jari karaeng ri sikontu linoa, siagang nasarea' tugasa' untu' ambangung Balla' untu' KalenNa ri Yerusalem, ri daera Yehuda.

³Poro Najagai ngasengko Allata'ala, ikau ngaseng a'jaria umma'Na. Musti ammoterekko mange ri Yerusalem nampa nubangung ammotere' Balla'Na Batara untu' Allata'alana Israel, Allata'ala niaka ammantang ri Yerusalem.

⁴Punna nia' sitau battu ri umma'Na ri anne tampa' pammelakkanga parallu bantuang untu' ammotere', sikamma siampi' balla'na musti nasarei anjo bantuanga. Musti nasarei ke'nanga pera' siagang bulaeng, untu' bokong ri aganga, siagang olo'-olo' pattekekang, kammayatompa sikamma passare untu' ambangungi Balla'Na Batara ri Yerusalem.”

⁵Nampa sikamma imang kapalaya battu ri golongang suku Yehuda siagang Benyamin, sikamma imanga siagang tu Lewia, kammayatompa sikamma tau nipagioka nyawana ri Allata'ala, apparuru ngasemmi untu' ammotere' mange ri Yerusalem, ambangungi Balla'Na Batara ammotere'.

⁶Sikontu siampi' balla'na ke'nanga massing assaremi bantuang, iamintu a'rupa barang-barang, kammayami pakkakasa'-pakkakasa' pera' siagang bulaeng, untu' bokong ri aganga, olo'-olo' untu' atteke', barang-barang maraengannaya, kammayatompa passare-passare untu' ambangungi Balla'Na Batara ri Yerusalem.

⁷Napasulu'mi Kores sikamma mangko'-mangkoka siagang cangkiri'-cangkiri' le'baka nipake riolo lalang ri Balla'Na Batara ri Yerusalem. Anjo barang-baranga le'baki naerang Karaeng Nebukadnezar nampa naboli' lalang ri balla' rewata-rewatana.

⁸Nasuro urusu'mi Kores anjo barang-baranga ri Mitredat, kapalana sikamma urusang pa'barang-barangnganga ri kakaraenganga. Nampa napare'mo Mitredat dattara'na anjo sikamma barang-baranga untu' Sesbazar, guburnur Yehuda.

⁹Iaminne dattara'na: mangko'-mangko' bulaeng untu' upacara passare — 30 mangko'-mangko' pera' untu' upacara passare — 1.000 mangko'-mangko' maraengannaya — 29 mangko'-mangko' ca'di bulaeng — 30 mangko'-mangko' ca'di pera' — 410 pakkakasa' maraengannaya — 1.000

¹¹Yangasenna nia' 5.400 jaina mangko' bulaeng siagang pera' kammayatompa barang-barang maraengannaya. Yangasenna anjo naerangi Sesbazar ri wattunna a'lampa siagang sikamma tunipela' maraenganga battu ri Babel mange ri Yerusalem.