Read Makassar Version – KITTA' MATANGKASA EZRA 10 Bible Online

EZRA 10 - Makassar Version – KITTA' MATANGKASA bible

EZRA 10

¹Lalang appala' doanna Ezra siagang angngarru' appala' popporo' ri dallekanna Balla'Na Batara, sanna' jaina tu Israel battu a'rappungang, bura'ne, baine, siagang ana'-ana'. Nakulilingi ke'nanga anjo Ezra nampa angngarru' lompo ngaseng.

²Nampa nakanamo Sekhanya ana'na Yehiel battu ri golongang Elam, ri Ezra, “Dorakami ikambe ri Batara lanri a'buntingi ikambe siagang baine bansa maraeng. Mingka nia' ija panrannuang mae ri bansa Israel.

³Umba kissumpa ri Allata'ala, angkanaya lanibongka ngasengi anjo bainea siagang ana'-ana'na ke'nanga. Lamannuruki ikambe ri kananta siagang pappakainga'na tu maraenga, ia tu ampakala'birikai parentaNa Allata'ala. Lamannuruki ikambe ri HukkunNa Allata'ala.

⁴Ikattemi musti angngalle tindakang. Nampa ikambe lambantuki' sipakkulle-kullena ikambe. Terassi tojeng-tojengi tindakanta.”

⁵Jari appakkaramulami Ezra angngalle tindakang. Nasuromi imang-imang kapalaya, sikamma tu Lewia, kammayatompa tu Israel maraengannaya untu' assumpa angkanaya lanagaukangi ke'nanga sangkamma anjo napakkanaya Sekhanya.

⁶Le'baki ke'nanga assumpa, a'lampami Ezra battu ri dallekanna anjo Balla'Na Batara nampa antama' ri tampa' pammantanganna Yohanan ana'na Elyasib, nampa a'bangngi anjoreng. Taerokai angnganre siagang angnginung napakamma si'na pa'mai'na annawa-nawai panggaukanna anjo sikamma tu le'baka nipela'.

⁷Nampa nipa'la'bang nipabattu mae ri sikontu Yerusalem siagang Yehuda, iamintu ri sikontu tau ammotereka battu ri pa'rasangang pammelakkanga, sollanna asse're ngaseng ke'nanga ri Yerusalem.

⁸Inai-nai tena nabattu lalanna tallungalloa, lanialleang ngasengi sikontu barang-baranna siagang tenamo nanibilangi anggota masaraka'. Anjo apa nipa'la'banga nipabattu nitekengi ri sikamma pamimpinna ra'yaka.

⁹Le'baki tallungallo, ri tanggala' ruampulo, sikontu tu bura'ne niaka ammamtang ri daera Yehuda siagang Benyamin, battumi mange ri Yerusalem nampa a'rappungang ke'nanga ri parang lakkenna Balla'Na Batara ri Yerusalem. Anjo wattua bosi sannaki. Annekkere' ngasemmi taua napakamma dinging siagang napakamma paralluna anjo passirapakkanga.

¹⁰Nampa ammentemmo Ezra a'bicara mae ri ke'nanga. Nakanamo, “Doraka ngaseng mako siagang nutambaimi kasalanna tu Israel lanri a'buntinnu siagang baine bansa maraenga.

¹¹Lanri kammana, akuimi sikamma dosanu ri Allata'ala, ia nasombaya boe-boeta, nampa nugaukang apa appakasannanga ri pa'mai'Na. Pakabellai kalennu battu ri bansa maraeng niaka ammantang ri pa'rasanganta siagang bongkai anjo sikamma bainennu battua ri bansa maraenga.”

¹²Assa'ra lompomi ke'nanga appiali angkana, “Lanaturukimi ikambe anjo kananta.”

¹³Nampa nakana pole ke'nanga, “Mingka ia niaka hadere' anrinni sanna' jaina tau, siagang teai sipato' sarrinna bosia. Tanatahangngai ikambe ammenteng kamma anne pantarang anrinni. Nampa pole anne passalaka takkulleai nipa'le'ba' lalang siallo yareka ruangallo bawang, nasaba' jai sikali ri kambe anggaukangi anjo dosa kammaya.

¹⁴Kisaremi ising sikamma pamimpinna ikambe ammantang ri Yerusalem untu' angngurusuki anne passalaka. Nampa inai-nai tau niaka ri kotana ikambe, ia niaka bansa maraeng bainenna, musti battui ri allo nipattantua, siagang sikamma pamimping siagang sikamma hakinga massing ri kota-kotana. Lanri kammana anjo talalarroami pole Allata'ala mae ri katte lanri passabakkang anjo passalaka.”

¹⁵Tena manna sitau angkabattallangi anjo rancanaya, pantaranganna Yonatan ana'na Asael siagang Yahzeya ana'na Tikwa, nampa nibantu ri rua tu Lewi, iamintu Mesulam siagang Sabetai.

¹⁶Sikamma anjo tu le'baka nipela' siagang niakamo ammotere', akkalepumi nyawana ero' anggaukangi anjo rancanaya. Lanri kammana anjo, ammilemi Imang Ezra siapa are tau battu ri kapala-kapala golonganga, nampa nacata' arenna ke'nanga. Ri tanggala' se're bulang sampulo, assirapakkammi ke'nanga untu' ansalidiki anjo passalaka.

¹⁷Lalang tallum bulang ribokoanganna, le'ba'mi naparessa ngaseng sikamma bura'ne le'baka a'bunting siagang bansa maraenga.

¹⁸Iaminne dattara' areng-arenna tu bura'ne a'buntinga siagang baine bansa maraeng: Sikamma imanga, nidattaraka siagang golonganna: Golongan Yesua siagang sikamma sari'battanna, ana'-ana'na Yozadak, Eliezer, Yarib siagang Gedalya.

¹⁹A'janjimi ke'nanga lantallaki bainenna ke'nanga, nampa assare passare gimbala' laki untu' koro'bang pammopporang dosana ke'nanga.

²⁰Golongang Imer: Hanani siagang Zebaja.

²¹Golongan Harim: Maaseya, Elia, Semaya, Yehiel siagang Uzia.

²²Golongang Pasyhur: Elyoënai, Maaseya, Ismael, Netaneel, Yozabad, siagang Elasa.

²³Tu Lewia: Yozabad, Simei, Kelaya (niareng tongi Kelita), Petahya, Yuda, siagang Eliezer.

²⁴Sikamma pakelonga: Elyasib. Sikamma pajaga pakke'bu' lompona Balla'Na Batara ri Yerusalem: Salum, Telem, siagang Uri.

²⁵Tu Israel maraengannaya: Golongang Paros: Ramya, Yezia, Malkia, Miyamin, Eleazar, Malkia, siagang Benaya.

²⁶Golongang Elam: Matanya, Zakharia, Yehiel, Abdi, Yeremot, siagang Elia.

²⁷Golongang Zatu: Elyoënai, Elyasib, Matanya, Yeremot, Zabad, siagang Aziza.

²⁸Golongang Bebai: Yohanan, Hananya, Zabai, siagang Atlai.

²⁹Golongan Bani: Mesulam, Malukh, Adaya, Yasub, Seal, siagang Yeramot.

³⁰Golongang Pahat-Moab: Adna, Kelal, Benaya, Maaseya, Matanya, Bezaleel, Binui, siagang Manasye.

³¹Golongang Harim: Eliezer, Yisia, Malkia, Semaya, Simeon, Benyamin, Malukh, siagang Semarya.

³³Golongang Hasum: Matnai, Matata, Zabad, Elifelet, Yeremai, Manasye, siagang Simei.

³⁴Golongang Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai.

³⁸Golongang Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya, siagang Yusuf.

⁴³Golongang Nebo: Yeiel, Matica, Zabad, Zebina, Yadai, Yoël siagang Benaya.

⁴⁴Sikontu anjo taua le'baki a'bunting siagang baine battua ri bansa maraenga. Jari natalla' ngasemmi ke'nanga anjo massing bainenna nampa nabongka siagang massing ana'-ana'na ke'nanga.