Read Makassar Version – KITTA' MATANGKASA EZRA 3 Bible Online

EZRA 3 - Makassar Version – KITTA' MATANGKASA bible

EZRA 3

¹Ri bulang tuju, nia'mi tu Israel massing ammantang ri kota-kotana. Ri tanggala' se're anjo bulanga a'rappungammi ke'nanga ri Yerusalem.

² Nampa Yesua ana'na Yozadak siagang sikamma agang-aganna sikamma imanga, Zerubabel ana'na Sealtiel siagang sikamma bija pammanakanna, nabangummi ammotere' tampa' pakkoro'bangnganga untu' Allata'alana tu Israel. Lanri kammana akkullemi ke'nanga attunu koro'bang irateanna, situru' sikamma pitunju' niaka tattulisi' lalang ri kitta' hukkunna Musa, atanNa Allata'ala.

³ Manna namalla' ke'nanga ri pandudu' niaka ri anjo pa'rasanganga, mingka kammaji nabangunna ke'nanga anjo tampa' pakkoro'bangnganga ri tampa'na memang riolo. Nampa appakkaramulamo ke'nanga assare pole koro'bang nitunu, ri wattu bari'basa' siagang karueng.

⁴ Nasuarri tommi ke'nanga Allo Lompo Pa'ballakang Leko'-leko' Kayua, situru' paratoranga; nampa allo-allona ke'nanga tuli assare koro'bang nipattantua untu' anjo alloa.

⁵ Pantaranganna anjo ta'atoro' tommi ke'nanga assare koro'bang nitunu siagang koro'bang ri Allo Lompo Bulang Beru, siagang ri sikontu allo lompo maraengannaya, ia nigaukanga untu' anynyomba ri Batara. Assare tommi ke'nanga pasare situlusu' pa'mai'na ke'nanga mae ri Batara.

⁶Manna tenapa nale'ba' nibangung ammotere' Balla'Na Batara, mingka ri tanggala' se're bulang tuju appakkaramulami ra'yaka attunu koro'bang untu' Batara.

⁷Anynyumbang tommi doe' ra'yaka untu' anggaji tukang batua siagang tukang kayua. Akkiring tommi ke'nanga kanre, inungang siagang minynya' zaitun mange ri kota-kota Tirus siagang Sidon untu' nipassambe siagang kayu camara Libanon battu ri anjo kota-kotaya. Anjo kayu-kayua nierangi mange ri Yafo ammalo tamparang. Yangasenna anjo nagaukangi ra'yaka situru' ising napassareanga Kores, karaeng Persia.

⁸Jari ri bulang rua, lalang taung makarua ammotere'namo Israel mange ri Yerusalem, appakkaramulami ke'nanga ambangungi Balla'Na Batara ri Yerusalem. Zerubabel, Yesua siagang sikamma julu bansana, sikamma imanga, tu Lewia, bodona kana, sikontu anjo tau le'baka nipela', massing amminawang ngasengi anjama. Tu Lewi umuru' 20 taung na rateanna nisuroi untu' anjannangngi anjo jama-jamang pambangunanna Balla'Na Batara.

⁹Jari Yesua, anjo tu Lewia, siagang ana'-ana'na, sikamma sari'battanna, kammayatompa Kadmiel siagang ana'-ana'na (golongang Hodawya), siagang ngasemmi ke'nanga anjannangngi anjo jama-jamang pambangunanna Balla'Na Batara. Nibantui ke'nanga ri tu Lewi battua ri golongang Henadad.

¹⁰ Ri wattunna appakkaramula napadongko' batu pundasina pajamaya anjo bangunang Balla'Na Batara ri Yerusalem, sikamma imanga ammakei juba siagang anna'galaki tarompe' na massing angngalle tampa'. Tu Lewi battua ri golongang Asaf ammenteng tongi anjoreng, massing anna'gala' gong-gong ca'di. Mammuji-mujimi ke'nanga ri Batara situru' paratorang le'baka nipattantu appakkaramula ri jammang Karaeng Daud.

¹¹ Akkelongi ra'yaka kelong-kelong pammuji mae ri Batara, na napa'mole-mole nakelongang bageang kelong kala'busanga angkana, “Anjo Batara mabajiki; satunggu-tungguna pangngamaseanna mae ri Israel.” Sikontu ra'yaka amminawangi akkiok-kio' ma'rannu-rannu siagang mammuji ri Batara, lanri nipadongko'mi batu pundasina Balla'Na Batara ri Yerusalem.

¹²Jai ri sikamma imanga, tu Lewia, siagang kapala-kapala golongang toa duduamo umuru'na, le'baki nacini' Balla'Na Batara rioloa. Ri wattunna nacini' ke'nanga nipadongko' batu pundasina anne Balla'Na Batara, angngarru' lompomi ke'nanga. Mingka tumaraengannaya hadereka anjoreng ammarrang-marrangi napakamma sanna' rannuna.

¹³Sa'genna taniassengami nibatei angkanaya kereanga sa'ra rannu lompo siagang sa'ra karru'. Teai sipato' lompona sa'ranna ke'nanga, sa'genna kalangngerang sa'genna bella.