Read Makassar Version – KITTA' MATANGKASA EZRA 6 Bible Online

EZRA 6 - Makassar Version – KITTA' MATANGKASA bible

EZRA 6

¹Le'baki anjo naparentakammi Karaeng Darius, sollanna niparessa sura'-sura' niaka niboli' ri kakaraenganga ri Babel.

²Mingka tena nanjoreng ri Babel nigappa catatanna anjo passalaka, passangalinna ri kota Ahmeta ri daera Media. Anjo catatanga nitulisiki ri se'reang gulungang. Na ia bonena, iamintu,

³“Ri taung makase're ri wattu pamarentahanna Karaeng Kores, appasuluki sura' parenta sollanna nibangung ammotere' Balla'Na Batara ri Yerusalem, a'jari tampa' untu' angngerang passare siagang attunu koro'bang. Tinggina anjo Ballaka musti 27 metere' nampa sangkara'na 27 todong metere'.

⁴Rinrinna musti kamma anne pare'na: bageang irate tallu lapisi' batu musti nilapisiki silapisi' kayu. Ongkoso'na natanggongi yareka niallei battu ri doe' kakaraenga.

⁵Kammayatompa sikamma pakkakasa' bulaeng siagang pera' ia le'baka nipake ri Balla'Na Batara ri Yerusalem nampa naalle Karaeng Nebukadnezar na naerang mange ri Babel, musti nipoterang ngasengi mange ri tampa'na rioloa.”

⁶Nampa nabalasa'mo Darius anjo suraka. Ia bonena iamintu: “Mae ri Tatnai, guburnur propinsi Efrat bageang ilau', siagang Syetar-Boznai, kammayatompa sikamma pamarentaya ri Efrat bageang ilau'. Teako ganggui anjo tu Yahudia,

⁷kammayatompa teako halangi pambangunanna Balla' Sambayanna ke'nanga. Lappassammi guburnur Yehuda siagang sikamma pamimpinna tu Yahudia ambangungi ammotere' anjo Balla' Sambayanga.

⁸Kamma-kamma anne kuparentakang ngasengko sollanna nubantu ke'nanga lalang anjo pambangunanga. Kamma anne batenu ambantui: Sikontu ongkoso' pambangunanga musti nuallei battu ri wassele' paja' negaraya ri propinsi Efrat bageang ilau' nampa musti nusareangi ke'nanga silinta'-linta'na.

⁹Pantaranganna anjo, manna apa-apa mamo niparalluang manuru' sikamma imanga ri Yerusalem, alarapanna sapi laki rungka, gimbala' laki siagang ana' gimbala' untu' koro'bang passare mae ri Allata'ala makoasaya ri suruga, kammayatompa gandung, ce'la, anggoro', siagang minynya' zaitun, musti teako takkaluppai ansarei ke'nanga allo-allo.

¹⁰Gaukang ngasengi anjo kammaya sollanna akkulle ke'nanga assare koro'bang ampakate'neai nyawaNa Allata'ala makoasaya ri suruga, kammayatompa sollanna napappalakkanga' ke'nanga barakka' siagang untu' ana'-ana' bura'neku.

¹¹Kuparentakangko sollanna punna nia' andakkai anne parentaku, bi'buki sipappa' benteng balla'na nampa nuciduki cappa'na nampa nupacoka ri kalenna anjo taua sa'genna tarrusu'. Musti nibongkaraki balla'na nampa nipa'jari tampa' loro.

¹²Poro Allata'ala, Ia le'baka ampilei Yerusalem a'jari tampa' untu' manynyomba ri Ia, ampossoki sikamma karaeng yareka bansa barania andakkai anne parentaya na nacoba angngancuruki anjo Balla'Na Batara ri Yerusalem. Inakke, Darius amparentakangi anne. Gaukangi siagang baji'.”

¹³Anjo parentana Karaeng Darius nagaukang baji'mi Tatnai, guburnur Efrat bageang ilau', siagang Syetar-Boznai, kammayatompa sikamma agang-aganna ke'nanga.

¹⁴ Nibantumi ke'nanga ri Na'bi Hagai siagang Na'bi Zakharia, na napannarrusu' sikamma pamimpinna tu Yahudia pambangunanna anjo Balla'Na Batara. Napa'le'ba'mi linta' anjo pambangunanga situru' parentaNa Allata'alana Israel siagang parentana Kores, Darius, na Artahsasta, karaeng-karaenga ri Persia.

¹⁵Le'ba'mi anjo Balla'Na Batara ri tanggala' tallu bulang Adar, ri taung makaannanna pamarentahanna Karaeng Darius.

¹⁶Nampa naresmikammo tu Israel, sikamma imanga, tu Lewia, siagang sikontu tule'baka nipela', anjo Balla'Na Batara. Rannu ngasemmi pa'mai'na tu Israel.

¹⁷Lalang anjo wattua assaremi ke'nanga passare mae ri Batara, iamintu 100 kayunna sapi laki, 200 kayunna gimbala' laki, siagang 400 kayunna ana' gimbala'. Na untu' koro'bang ri nipammopporanna dosaya nipassareang tommi sampulo anrua bembe laki, tassikayu massing tasse'rea suku Israel.

¹⁸Nampa untu' angngatoroki palayananga lalang ri Balla'Na Batara nibagemi antama ri siapa area golongang sikamma imanga siagang sikamma tu Lewia manuru' paratorang niaka tattulisi' lalang ri kitta'na Musa.

¹⁹ Ri tanggala' sampulo angngappa' sitaung ribokoanganna, ri wattu ammotere'na sikamma anjo taua battu ri pa'rasangang pammelakkanga, napakalompomi ke'nanga Allo Paskaya.

²⁰Sikontu imanga siagang tu Lewia le'ba'mi nagaukang upacara pannangkasia ri kalenna, sa'genna nikana tangkasa'mi ke'nanga. Nampa anjo tu Lewia anynyamballemi olo'-olo' untu' a'jari koro'bang Paska mae ri sikamma imanga, mae ri kalenna ke'nanga, kammayatompa mae ri sikontu tau le'baka nipela'.

²¹Anjo koro'banga nikanre ngasemmi ri sikontu tu Israel, ia ammotereka battu ri pammelakkanga, kammayatompa sikamma pandudu' niaka ri anjo pa'rasanganga, ia tobakamo ri dosana siagang erokamo battu anynyomba ri Batara, Allata'alana Israel.

²²Tuju allo sallona ke'nanga a'rannu-rannu assuarri Passua'-suarrang Roti Tenaya nammake Pa'gambang. Sannang sikali nyawana ke'nanga lanri Napagio'na Batara nyawana karaeng Asyur, sa'genna a'jari lammoro' pa'mai'mo anjo karaeng Asyur mae ri ke'nanga, nampa nabantumo ke'nanga lalang anjo jama-jamang pambangunanna Balla'Na Batara, Allata'alana Israel ri Yerusalem.