Read Makassar Version – KITTA' MATANGKASA EZRA 7 Bible Online

EZRA 7 - Makassar Version – KITTA' MATANGKASA bible

EZRA 7

¹Attaung-taung ribokoanganna, ri wattunna Artahsasta ammarenta salaku karaeng ri Persia, nia' sitau bura'ne niareng Ezra, battu ri turungang Imang Lompoa Harun. Ia garisi' turunganna punna nitotoro' battu rawa nampa nai', iamintu: Ezra Zeraya Azarya Hilkia

²Salum Zadok Ahitub

³Amarya Azarya Merayot

⁴Zerahya Uzi Buki

⁵Abisua Pinehas Eleazar Imang Lompoa Harun.

⁶Anjo Ezra tau tinggi pangngassenganna siagang jai pangngassenna ri sesena Hukkung Napassareanga Batara, Allata'alana Israel mae ri Musa. Lanri nibarakkakinna Ezra ri Karaeng Allata'alana, jari nisareammi ri karaenga sikamma napalaka. Ri taung makatuju wattu pamarentahanna Karaeng Artahsasta, a'lampami Ezra battu ri Babel mange ri Yerusalem siagang se're rombongang tu Israel; siapa are imang, tu Lewi, pakelong, pajaga pakke'bu' lompona Balla'Na Batara ri Yerusalem, siagang sikamma pajama-jamaya.

⁸Nabokoi ke'nanga Babel tanggala' se're bulang se're. Nitulungi ke'nanga ri Allata'ala, sa'genna battumo ke'nanga mange ri Yerusalem ri tanggala' se're bulang lima.

¹⁰Napakkalepumi sikontu pikkiranna Ezra mae ri usaha untu' ampappilajari HukkunNa Batara, sollanna akkulle nagaukang siagang napangngajarrang sikontu katantuanna siagang paratoranna mae ri bansa Israel.

¹¹Iaminne dokumeng napassareanga Karaeng Artahsasta mae ri Ezra, imanga siagang panrita Hukkung,

¹²“Battu ri Karaeng Artahsasta mae ri Imang Ezra, panrita HukkunNa Allata'ala makoasaya ri suruga.

¹³Kuparentakangi angkana sikontu imanga, tu Lewia siagang tu Israel maraengannaya niaka lalang ri sikontu kakaraengangku, ia eroka a'lampa mange ri Yerusalem, kusarei ising untu' a'lampa siagang ikau.

¹⁴Nasaba' inakke siagang tuju tumailalangku assuroko a'lampa mange ri Yerusalem untu' amparessai kaadaanna siagang anciniki apaka anjo HukkunNa Allata'ala nipappirannuanga ri kau, ma'nassa nituruki tojenji.

¹⁵Inakke siagang sikamma tumailalangku erokka' assare passare bulaeng siagang pera' mae ri Allata'alana Israel, Allata'ala niaka ri Yerusalem. Erammi anjo passarena ikambe.

¹⁶Erang tongi sikamma bulaenga siagang pera' le'baka nupasse're battu ri sikontu Babel siagang sikontu sumbangang battua ri bansa Israel siagang imang-imanna ke'nanga untu' Balla'Na Karaeng Allata'alana ke'nanga ri Yerusalem.

¹⁷Pakemi siagang baji' anjo doeka untu' ammalli sapi laki, gimbala' laki, ana' gimbala', gandung, siagang anggoro'. Passareang ngasemmi anjo irate ri tampa' pakkoro'bangnganga ri Balla'Na Batara ri Yerusalem.

¹⁸Ia peraka siagang bulaeng ammantanga tassesa, akkullei nupake untu' kaparalluannu siagang sikamma agang-agannu, situru' ero'Na Allata'alanu.

¹⁹Passareangi mae ri Allata'ala ri Yerusalem sikontu pakkakasa' nipassareanga mae ri kau untu' kaparalluang panynyombang ri Balla'Na Batara.

²⁰Na sikontu kaparalluang maraengannaya untu' Balla'Na Batara ri Yerusalem, akkullei nupala' battu ri doe' niaka ri pammolikang doeka ri kakaraenga.

²¹Mae ri sikontu pangngurusu' doe' pamarentaya ri propinsi Efrat bageang ilau', kuparentakangi sollanna manna apa-apa mamo napala' Imang Ezra, panrita HukkunNa Allata'ala makoasaya ri suruga, musti nisarei linta',

²²sa'genna sikamma anne jaina: pera' sa'genna 3.400 kilo battala'na, gandung 10.000 kilo, anggoro' sa'genna 2.000 litere', minynya' zaitun sa'genna 2.000 litere', siagang ce'la sa'genna siapa naparalluanga.

²³Bajiki batenu ampasadia ngasengi sikontu apa napalaka Allata'ala makoasaya ri suruga untu' Balla'Na, sollanna talarroa ri nakke yareka tau ammarentaya ri bokoangangku.

²⁴Takkulleako angngalle paja' battu ri sikamma imanga, tu Lewia, pakelonga, pajaga pakke'bu' lompoa, pajama-jamaya, yareka manna inai niaka passisambungang jama-jamanna siagang Balla'Na Batara ri Yerusalem.

²⁵Sari'battang Ezra, pa'matu-matui kacara'dekang Napassareanga Allata'ala mae ri kau, siagang angngangkakko siapa are pamimping siagang haking-haking untu' ammarenta ri sikontu taua ri propinsi Efrat bageang ilau', ia attallasaka situru' HukkunNa Allata'alanu. Parallui nupangngajarrang anjo hukkunga mae ri sikontu tau tenayapa naassengi.

²⁶Inai-nai tena namannuruki hukkung-hukkunNa Allata'alanu, yareka hukkung-hukkung kakaraenganga, musti nihukkung matei linta', yareka nipelaki, yareka nirampasaki barang-baranna, yareka nitarungkui.”

²⁷Nampa nakanamo Ezra, “Pujimi Batara, Allata'ala nisombaya ri boe-boena ikambe! Napa'gilimmi atinna karaenga, sa'genna ero' amparhatikangi Balla'Na Batara ri Yerusalem.

²⁸Lanri pannulunNa Allata'ala nanangaia' karaenga, sikamma tumailalanga siagang sikamma anjo tu ammarentaya; Nasarema' sumanga' Karaeng Allata'alaku, sa'gengku akkulle ampagioki sikamma anjo jaina kapala golongang Israel untu' ammotere' mange ri Yerusalem.”