Read Makassar Version – KITTA' MATANGKASA EZRA 9 Bible Online

EZRA 9 - Makassar Version – KITTA' MATANGKASA bible

EZRA 9

¹Ri le'ba'namo nigaukang ngaseng sikammaya anjo, nia'mo siapa are tutoa-toana bansa Israel battu mae ri nakke. Napauanga' ke'nanga angkanaya ra'ya' Israel, kammayatompa sikamma imanga, siagang sikamma tu Lewia, tena nanasa'laki kalenna ke'nanga battu ri bansa-bansa maraeng niaka a'reppese' anjoreng, iamintu bansa Amon, Moab, Mesir, Kanaan, Het, Feris, Yebus siagang Amori. Ba'lalo manna sikamma imanga siagang tu Lewia appakamma ngaseng tongi. Nagaukang ngaseng tongi ke'nanga panggaukang-panggaukang sannaka ja'dala'na, ia nagaukanga anjo bansa-bansa maraenga.

²Tubura'-bura'ne Yahudia a'buntingi siagang baine bansa maraenga, sa'genna umma'Na Batara le'baka Nasa'la', tenamo natangkasa'. Ba'lalo ia kaminang rioloa anggaukangi anjo kammaya, iamintu sikamma tutoa-toana siagang pamarentana Israel.

³Kulangngere'na anjo kammaya, sanna'mi lussa'na nyawaku, sa'genna kukekke' pakeangku nampa kubi'bu' uukku siagang janggokku nampa ammempo naung, ancuru' kusa'ring pa'maikku.

⁴Tulusu' ammempoma' sa'genna narapi' wattu passare koro'bang karuenga. Nampa battumo taua angkulilingia'. Nabattuimi malla' ke'nanga nau'ranginna ancanganna Allata'alana Israel mae ri dosana anjo sikamma tau ammoterekamo battu ri pa'rasangang pammelakkanga.

⁵Ri wattunna appakkaramulamo nipassareang koro'bang karuenga, ammentemma' ri tampakku si'na. Lalang ammakeang kekke' su'juka' nakupatara limangku mae ri Karaeng Allata'alaku.

⁶Kukanamo, “O, Allata'alaku, siri'-sirika' angngangkaki ulungku ri dallekanTa. Dosa-dosana ikambe attambung-tambungi irate ri ulunna ikambe sa'genna narapi' langika.

⁷Battu ri boe-boena ikambe sa'genna kamma-kamma anne, ikambe ummatTa dorakai ri Katte. Lanri kammana anjo, nasikamma karaenna siagang imanna ikambe nibetami ri karaenna bansa-bansa maraenga. Nibunoi ikambe, niellaki, siagang nierangi mange nipela'. Nihina tojeng-tojemmi ikambe, sangkamma kaadaanga anne alloa.

⁸Mingka kamma-kamma anne o Karaeng Allata'alana ikambe, silalonTa le'ba' lammoro' pa'mai' mae ri kambe. Nilappassangi siapa are jaina tau ri kambe battu ri nipare' ataya untu' attallasa' lalang salewangang ri anne tampa' tassa'laka. Kisarei ikambe katallassang beru.

⁹Ri wattunna ikambe nipare' ata, tena Kibokoi ikambe. IKatte ampagilingi nyawana sikamma karaeng Persia, sa'genna mangngamaseang ke'nanga mae ri kambe, nampa nasare ising ikambe untu' attallasa' siagang ambangungi ammotere' Balla' Passambayanganga mae ri Katte, ia a'jariamo rumbangngang ancuru'. Kijagai ikambe anrinni, ri Yehuda siagang Yerusalem.

¹⁰Mingka kamma-kamma anne o Karaeng Allata'ala, ri le'ba'na ngasemmo kajarianga, apami lakkulle nakana ikambe? Le'ba'mi pole nabalang parekang ikambe sikamma parentaTa,

¹¹ia Kipassareanga mae ri kambe tete ri sikamma na'bia, ata-atanTa. Napaumi ke'nanga ri kambe angkanaya tenamo natangkasa' anjo pa'rasangang eroka napammantangngi ikambe lanri sikontu pandudu'na appakkaramula battu ri cappa' se'rea mange ri cappa'-cappa' maraenganga, a'gau' ra'masa' siagang a'gau' ja'dala' ngasemmi.

¹² Anjo na'bi-na'bia napisangkaimi ikambe a'bunting assicampuru' siagang sikamma anjo taua, yareka ambantui ke'nanga a'jari kalumanynyang siagang salewangang. Ebara' angkana mannuruki ikambe, la'jari kassaki ikambe siagang akkullei nakasia' baji' kammayatompa nasossorang turunganna ikambe wassele'na anjo buttaya, sa'genna satunggu-tungguna.

¹³Dorakami ikambe siagang nadakkaimi hukkunTa, kammayatompa Kihukkummi ikambe. Mingka naassengi ikambe, o Allata'alana ikambe, angkanaya anjo hukkunganTa mae ri kambe tenapa nasambattala' siratanga siagang battala'na dosana ikambe, ba'lalo Kipasalama' iji ikambe.

¹⁴Jari, antekamma lakkulle ija ikambe lambalang parekang iji sikamma anjo parentaTa, siagang la'buntinga pole siagang sikamma anjo tu ja'dalaka? Punna nagaukang ija ikambe anjo sikammaya, mattantu lateai sipato' larroTa, sa'genna Kiancuru' taba sikalimo ikambe siagang talaniakkamo manna sitau laKilappassang attallasa'.

¹⁵O, Batara, Allata'alana Israel. IKatte adelekki', mingka Kilappassang iji attallasa' ikambe. Namangakuimi kasalanna ikambe mae ri Katte, tasiratangami ikambe untu' andallekang ri dallekang mala'biritTa.”