Read Makassar Version – KITTA' MATANGKASA NEHEMIA 10 Bible Online

NEHEMIA 10 - Makassar Version – KITTA' MATANGKASA bible

NEHEMIA 10

¹Uru-urua annekeng iamintu guburnur Nehemia ana'na Hakhalya. Nampa amminawang Zedekia. Le'baki anjo sikamma anne tau nitappua irawa annekeng tongi:

²Sikamma imanga Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgai siagang Semaya.

⁹Tu Lewi Yesua ana'na Azanya, Binui turungang golongang Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani, siagang Beninu.

¹⁴Sikamma pamimping bansaya Paros, Pahat-Moab, Elam, Zatu, Bani, Buni, Azgad, Bebai, Adonai, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim siagang Baana.

²⁸Ikambe, ra'ya' Israel, sikamma imanga, tu Lewi, sikamma pajaga pakke'bu' lompona Balla'Na Batara, sikamma pakarena musika, siagang sikamma pajamaya ri Balla'Na Batara ri Yerusalem, kammayatompa bainenna ikambe siagang ana'-ana' anggannakamo umuru'na untu' ammahang, sikamma tau mannurukia mae ri hukkunNa Allata'ala siagang ia le'bakamo ansa'laki kalenna battu ri bansa maraeng ammantanga ri pa'rasanganna ikambe.

²⁹Nipasse're ngasemmi kalenta siagang sikamma pamimpinna ikambe untu' assumpa lattallasa' situru' hukkunNa Allata'ala, ia le'baka Napassareang tete ri atanNa iamintu Musa. Poro nitunrai ikambe punna tanarupaia ikambe anne parjanjianga. Assumpai ikambe lamannuruki ri sikontu parentaNa, hukkunNa siagang paratoranNa Batara, Allata'alana ikambe.

³⁰ Assumpami ikambe untu' tala'buntinga accampuru' siagang bansa-bansa maraeng niaka ammantang ri pa'rasanganna ikambe.

³¹ Punna nia' bansa maraeng ero' ambalukangi gandunna yareka barang-barang apa mamo mae ri kambe ri allo Pammari-marianga yareka allo nipakatangkasaka maraengannaya, talanaballiai ikambe. Punna narapi' taung-taung makatujua, talanjamayai ikambe ri kokoa siagang talanasingarai pangnginranganna ikambe.

³² Taung-taungi ikambe massing anynyumbang lima garang pera' untu' angngongkosi kaparalluanga ri Balla'Na Batara ri Yerusalem.

³³Lanapasadiai ikambe sikamma kaparalluanga untu' panynyombang ri Balla'Na Batara ri Yerusalem, iamintu: roti lanipatalaya, gandung passare allo-alloa, olo'-olo' untu' koro'bang nitunu allo-alloa, passare matangkasa' maraengannaya, koro'bang-koro'bang untu' nipammopporanna dosa Israel, siagang sikontu apa niparluanga untu' Balla'Na Batara ri Yerusalem.

³⁴Ikambe ra'yaka, imang-imanga, siagang tu Lewia, lanigoccangi taung-taung untu' appattantui angkanaya inai musti appasadia kayu tunu untu' sikamma koro'banga, lanipassareanga mae ri Karaeng Allata'alana ikambe, manuru' paratorang Hukkunga.

³⁵ Taung-taungi ikambe langngerang mange ri Balla'Na Batara ri Yerusalem iamintu gandung wassele' uru-urua siagang rappo-rappoang uru ti'noka ri poko' lamung-lamunna ikambe.

³⁶ Lanaerangi ikambe sikamma ana' toana ikambe mae ri imanga ri Balla'Na Batara ri Yerusalem untu' nipassareang mae ri Allata'ala, situru' paratorang Hukkunga. Lanapassareang tongi ikambe ana' sapi, ana' gimbala', yareka ana' bembena ikambe, ia uru lassuka.

³⁷ Lanaerangi ikambe mae ri imanga ri Balla'Na Batara ri Yerusalem gandung nileoka, ia uru niallea taung-taung, kammayatompa apa-apa nipassareang maraengannaya kammayami anggoro', minynya' zaitun siagang sikamma rappo-rappoanga. Passare bage sampuloa battu ri wassele' kokonna ikambe, lanaerangi ikambe mange ri tu Lewi, ia ampasse'reai anjo passare bage sampuloa ri kota-kotana pamarria.

³⁸ Mingka nia' sitau imang turungang battua ri Harun musti anrurungangi ke'nanga anjo tu Lewia, punna napasse're ke'nanga anjo sikamma passarea. Nabage sampulona anjo sikamma passarea musti nierangi ri tu Lewia mange ri kamara'-kamara' parsadiaanga ri Balla'Na Batara ri Yerusalem.

³⁹Ra'ya' Israel siagang tu Lewi musti angngerangi sumbangang attantu iamintu a'rupa gandung, anggoro', siagang minynya' zaitun mange ri kamara' parsadiaanga untu' pammolikang pakkakasa'-pakkakasa' Balla'Na Batara ri Yerusalem. Anjoreng tommi ammantang sikamma imang tugasaka, sikamma pajaga pakke'bu' lompona Balla'Na Batara ri Yerusalem kammayatompa sikamma pakelonga. Tena natakkaluppa ikambe amparakai Balla'Na Batarana ikambe ri Yerusalem.