Read Makassar Version – KITTA' MATANGKASA NEHEMIA 12 Bible Online

NEHEMIA 12 - Makassar Version – KITTA' MATANGKASA bible

NEHEMIA 12

¹Iaminne sikamma imanga siagang tu Lewia, ammotereka battu ri pa'rasangang pammelakkanga siaganga a'rurung Zerubabel ana'na Sealtiel siagang Imang Lompo Yesua:

²Sikamma imang-imanga Seraya, Yeremia, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Miyamin, Maaja, Bilga, Semaya, Yoyarib, Yedaya, Salu, Amok, Hilkia, siagang Yedaya. Yangaseng minne ke'nanga kapala imang ri jammang Yesua.

⁸Tu Lewi Pamimping kelong sukkuruka: Yesua, Binui, Kadmiel, Serebya, Yehuda, siagang Matanya.

⁹Anggota pakelong angkelongangai kelong pappialia iamintu: Bakbukya, Uni, siagang agang-aganna se're golongang.

¹⁰Iaminne garisi' turunganna imang lompo Yesua: Yesua, Yoyakim, Elyasib, Yoyada,

¹¹Yonatan, Yadua.

¹²Iaminne dattara' areng-arenna imang kapalaya siagang golonganna ke'nanga ri wattunna Yoyakim tugasa' a'jari imang lompo: [Imang] — [Golongang] Meraya — Seraya Hananya — Yeremia Mesulam — Ezra Yohanan — Amarya Yonatan — Melikhu Yusuf — Sebanya Adna — Harim Helkai — Merayot Zakharia — Ido Mesulam — Gineton Zikhri — Abia … — Minyamin Piltai — Moaja Samua — Bilga Yonatan — Semaya Matnai — Yoyarib Uzi — Yedaya Kalai — Salai Heber — Amok Hasabya — Hilkia Netaneel — Yedaya

²²Dattara' ri sesena sikamma kapala kaluarga tu Lewi siagang kaluarga imanga le'ba'mi nicata' ri jammang sikamma imang lompoa, iamintu: Elyasib, Yoyada, Yohanan, siagang Yadua. Anjo catatanga le'baki ri wattunna Darius ammarenta salaku karaeng Persia.

²³Mingka ri sesena kapala-kapala kaluarga golongang Lewi, sa'gennaji bawang ri jammang Yonatan, cucunna Elyasib nicata'.

²⁴Nibage-bagei tu Lewi lalang siapa area kalompo', nipimping ri Hasabya, Serebya, Yesua, Binui, siagang Kadmiel. Massing ta'rua kalompo' anggaukangi tugasa' mammuji ri Batara siagang appala' sukkuru' ri Ia. Assibalasa'-balasaki ke'nanga, situru' paratorang Karaeng Daud, anjo atanNa Allata'ala.

²⁵Sikamma pajaga pakke'bu' lompona Balla'Na Batara ri Yerusalem nisarei tugasa' anjagai sikamma kamara' parsadiaanga ri ampi'na pakke'bu' lompona iamintu: Matanya, Bakbukya, Obaja, Mesulam, Talmon, siagang Akub.

²⁶Wattu attallasa'na ke'nanga iamintu ri jammang Yoyakim ana'na Yesua, cucunna Yozadak, siagang ri jammang guburnur Nehemia, kammayatompa Imang Ezra panrita Hukkunga.

²⁷Ri wattunna niresmikang tembo' kalli'na kota Yerusalem, nikio' ngasengi sikamma tu Lewia battu ri sikamma tampa' pammantanganna ke'nanga, sollanna akkulle ke'nanga amminawang ampakasuaraki anjo kajarianga siagang kelong-kelong appala' sukkuru', siagang gambusu' na kacapi.

²⁸Jari a'rappungammi sikamma anjo pakelong battua ri kaluarga Lewi, baji' nabattua ri pammantanganna ri tammulilina Yerusalem, kammayatompa battua ri kota-kota tammulilina Netofa,

²⁹battu ri Bet-Gilgal, Geba siagang Asmawet.

³⁰Sikamma anjo imanga siagang tu Lewia appareki upacara mannangkasi kale, nampa mae ri ra'yaka, mae ri sikamma pakke'bu' lompoa siagang anjo tembo' kalli'na kotaya.

³¹Kusuromi sikamma pamimpinna Yehuda nai' ri temboka untu' angngatoro' rua barisang lompo, untu' a'barrisi' angkulilingi kotaya, akkelong-kelong, mammuji appala' sukkuru' mae ri Allata'ala. Barisang se'rea a'barrisi' irate ri temboka, a'lampa mange ri kanang, ri Pakke'bu' Lompo Pa'loroang.

³²Hosaya a'jappa ri bokona sikamma pakelonga, nipinawang ri sipa'gang pamimping tu Yahudi.

³³Siapa are imang a'jappa ri bokona ke'nanga annui' tarompe', iamintu: Azarya, Ezra, Mesulam, Yehuda, Benyamin, Semaya, siagang Yeremia. Nampa nipinawang ke'nanga ri Zakharia ana'na Yonatan, cucunna Semaya. Siapa area boe-boena ke'nanga iamintu: Matanya, Mikha, Zakur battu ri golongang Asaf.

³⁶Ri bokona ke'nanga ajappami anggota-anggota golonganna, iamintu: Semaya, Azareel, Milalai, Gilalai, Maai, Netaneel, Yehuda siagang Hanani. Yangaseng ke'nanga angngerangi pakkakasa' musi', sangkamma nakarenaia Karaeng Daud, anjo atanNa Allata'ala. Imang Ezra, anjo panrita HukkunNa Allata'ala, a'jappa ri ulunna anjo barisanga.

³⁷Anrapiki mange ri Pakke'bu' Lompona Je'ne' Takkioroka, a'bilu'mi ke'nanga nampa angngambi' ri tuka' kotana Daud, ammalo ri balla' lompona Daud, nampa ammotere' mange ri tembo' ri Pakke'bu' Lompo Je'ne' ri bageang rayana kotaya.

³⁸Kalompo' pakelong se'reanga pole a'barrisiki irate ri temboka a'lampa mange ri kairi, nampa kupinawang siagang sipa'gang battu ri ra'yaka. A'barrisiki ikambe ammalo ri Menara Pappepekang sa'genna mange ri Tembo' Luara'.

³⁹Nampa ammalo ikambe ri Pakke'bu' Lompo Efraim, Pakke'bu' Lompo Salloa, Pakke'bu' Lompo Juku', Menara Hananeel siagang Menara Mea sa'genna ri Pakke'bu' Lompo Gimbala'. Ammantangi barisanna ikambe ri ampi'na Pakke'bu' Lompo Pa'jagaang ri ampi'na Balla'Na Batara ri Yerusalem.

⁴⁰Jari battumi anjo ruaya kalompo' pakelong ri ampi'na Balla'Na Batara ri Yerusalem. Pantaranganna sikamma pamimpinga lalang ri kalompokku,

⁴¹nia' todong amminawang sikamma imang attui' tarompe'. Ia ke'nanga iamintu: Elyakim, Maaseya, Minyamin, Mikha, Elyoënai, Zakharia siagang Hananya;

⁴²ri bokona ke'nanga a'jappai Maaseya, Semaya, Eleazar, Uzi, Yohanan, Malkia, Elam siagang Ezer. Sikamma pakelonga akkelongi nipimping ri Yizrahya.

⁴³Anjo alloa jai koro'bang nipassareang ri Batara. A'rannu-rannui ra'yaka lanri nipakasunggui ri Allata'ala. Sikamma bai'-bainea siagang ana'-anaka amminawang tongi assua'-suara', siagang kalangngerammi sa'genna bella sa'ra karannuanna ke'nanga.

⁴⁴Anjo wattua nia' siapa are tau nisare tugasa' anjannangngi kamara'-kamara' tampa' parsadiaanga untu' amboliki sikamma sumbangang untu' Balla'Na Batara ri Yerusalem, kammayatompa passare bage sampulona siagang wassele' bungasa'na taua taung-taung. Sikamma anjo pajannanga musti napa'rappungi anjo sumbangang-sumbanganga battu ri sikamma koko niaka ri tammulilina kota-kotaya. Anjo sumbangang-sumbanganga nipassareangi mae ri sikamma imanga siagang tu Lewia, situru' paratoranna Hukkunga. Sikamma tu Yehudaya nahargai sikamma anjo imanga siagang tu Lewia,

⁴⁵ nasaba' iami ke'nanga anggaukangi upacara pannangkasia siagang upacara-upacara maraengannaya, ia le'baka Naparentakang Allata'ala. Sikamma pakarena musika siagang pajaga pakke'bu' lompona Balla'Na Batara ri Yerusalem nagaukang tommi tugasa'na ke'nanga situru' parentaNa Karaeng Daud siagang Salomo ana'na.

⁴⁶Battu ri jammanna iji Karaeng Daud siagang panrita musi' niarenga Asaf, nanagaukammo sikamma pakelonga akkelong-kelong mammujia appala' sukkuru' mae ri Allata'ala.

⁴⁷Ri jammanna Zerubabel siagang ri jammanna Nehemia, sikontu ra'ya' Israel assarei passare untu' anggannakki kaparalluang allo-allona sikamma pakelonga siagang pajaga pakke'bu' lompona Balla'Na Batara ri Yerusalem. Assare tommi ra'yaka passare poro untu' tu Lewia, nampa tu Lewia nasare tommi sikamma imanga bageang le'bakamo nipattantu.