Read Makassar Version – KITTA' MATANGKASA NEHEMIA 13 Bible Online

NEHEMIA 13 - Makassar Version – KITTA' MATANGKASA bible

NEHEMIA 13

¹ Ri wattunna nibaca ri dallekanna ra'yaka hukkung Musa, nigappami kasingarang angkanaya: ‘Tu Amon siagang tu Moab, tena sikali nakkulle sicampuru' siagang umma'Na Allata'ala;

² nasaba' ri wattunna Israel lalang pa'jappang assulu' battu ri Mesir, anne ruaya bansa taerokai assare kanre siagang je'ne' ri anjo bansaya. Ba'lalo nagajimi ke'nanga Bileam untu' antunrai bansa Israel, mingka Allata'alata napinrai anjo pattunraya a'jari barakka'.’

³Ri wattunna nalangngere' bansa Israel anjo passala' kammaya, nasa'la'mi sikontu bansa maraenga battu ri ra'ya' Israel.

⁴Rioloanganna anjo Imang Elyasib, ia nisarea tugasa' untu' anjannangngi kamara'-kamara' parsadiaanga untu' Balla'Na Batara ri Yerusalem, nia' passisambungang bijanna siagang Tobia.

⁵Elyasib napassareangi mae ri Tobia se're kamara' lompo, ia sitojenna nipasadiaya poro untu' amboliki passare gandunga, kamanynyanga, sikamma pakkakasa' Balla'Na Batara, passare untu' imang-imanga, passare bage sampulona gandunga, anggoro', siagang minynya' zaitun, ia lanibage-bagea mae ri tu Lewi, sikamma pamusika siagang pajaga pakke'bu' lompona Balla'Na Batara ri Yerusalem.

⁶Ri wattunna kajariang anjo passalaka, inakke tena' ri Yerusalem, nasaba' ri makatallumpulona anrua ammarenta Karaeng Artahsasta, karaeng Babel, inakke a'lampa' mange ri Babel untu' a'laporo' mae ri karaenga. Siapa arepi allo ribokoanganna nampa nikellaia'

⁷untu' ammotere' mange ri Yerusalem. Battuku mae anrinni, ta'bangkama' kuassenna angkana napassareangi Elyasib mae ri Tobia se're kamaraka ri Balla'Na Batara ri Yerusalem.

⁸Teai sipato' larroku, sa'genna kupasambila ngaseng assulu' barang-baranna Tobia.

⁹Nampa kusuro taua appare' upacara untu' antangkasi anjo kamara'-kamaraka. Le'baki anjo kupoterammi mae anjoreng sikamma passare gandunga siagang kamanynyanga kammayatompa sikamma pakkakasaka ri Balla'Na Batara.

¹⁰ Le'baki anjo, kurapikammi sikamma pakarena musika siagang tu Lewia nabokoimi Yerusalem, nampa ammotere' mange ri massing kokonna ke'nanga, lanri tena nigannakkiangi kaparalluanna ke'nanga.

¹¹Kupakainga'mi sikamma tutoa-toana ke'nanga lanri nalappassanna ke'nanga taniurusa Balla'Na Batara. Nampa kukio' ammotere' sikamma tu Lewia siagang pakarena musika, nampa kusuro anggaukangi ammotere' tugasa'na ke'nanga.

¹² Nampa kusuro sikontu ra'yaka assare pole bage sampulo gandung, anggoro', minynya' zaitun, nampa naerang mange ri kamara' parsadiaanga.

¹³Kusuromi siapa are tau untu' anjannangngi anjo kamara'-kamara' parsadiaanga. Ia ke'nanga iamintu: Imang Selemya, Zadok iamintu tu panritaya ri Hukkunga, siagang Pedaya se're tu Lewi. Hanan ana'na Zakur siagang cucunna Matanya, kusarei tugasa' untu' ambantui ke'nanga. Kuassengi angkana sikamma anjo taua akkullei nipatappa' siagang lanaurusuki pambageanna anjo bahang-bahanga mae ri sipanjamanna ngaseng siagang lambusu'.

¹⁴O, Allata'alaku, Kiu'rangi sikontu apa le'baka kugaukang untu' BallatTa ri Yerusalem siagang palayananna.

¹⁵ Ri anjo jammanga kuciniki angkanaya nia' siapa are tu Yehuda ammacco' anggoro' ri allo Pammari-marianga. Nia' pole maraeng angngerang gandung, anggoro', rappo anggoro', rappo ara siagang barang-barang maraeng irate ri keledaina nampa naerang mange ri Yerusalem. Kupisangkai ke'nanga ambalukangi ri Yerusalem.

¹⁶Siapa are tau battu ri Tirus ammantanga ri Yerusalem angngerang juku' siagang a'rupa-rupa barang balu'-balukang mange ri Yerusalem ri allo Pammari-marianga, untu' lanabalukang mae ri tu Yahudi.

¹⁷Kupakaingaki sikamma pamimping Yehuda kukana, “Tanuassengaika kalennu angkana a'gau' ja'dalakko lanri nura'massinna allo Pammari-marianga?

¹⁸Kalanri dosa kammaya minne naNahukkung Allata'ala sikamma boeta siagang Naposso' anne kotaya. Apaka ero' ngasengko kamma-kamma anne antambai pangngalarroiNa Allata'ala mae ri Israel lanri nura'massinna allo Pammari-marianga?”

¹⁹Lanri kammana kuparentakammi sollanna punna appakaramulamo allo Pammari-marianga, iamintu ri Juma'na bangngi, nitongko' ngasengi sikontu pakke'bu' lompona kotaya punna appakkaramulamo karueng. Natakkullea nisungke ammotere' punna tenapa nallallo allo Pammari-marianga, iamintu ri allo Sattu bangngi. Kuboli'mi siapa are ana' buaku ri sikontu anjo pakke'bu' lompoa, untu' anjannangngi sollanna punna allo Pammari-mariang, tena barang balu'-balukang nierang antama' ri kotaya.

²⁰Mingka nia' todong wattu nania' siapa are pabalu' barang-barang a'bangngi ri pantaranganna temboka ri allo Juma' bangngi.

²¹Kukanamo ri ke'nanga, “Sia-siajako attayang anjoreng sa'genna bari'basa'. Jagako, punna nugaukang ija sikali anjo kammaya, langngallea' tindakang terasa'!” Appakkaramula ri kamma-kammaya anjo tale'bakami battu ke'nanga punna allo Pammari-mariang.

²²Nampa kusuro tu Lewia appare' upacara pannangkasi kale siagang sikamma pajaga pakke'bu' lompoa untu' anjannangngi sollanna napakalompo taua anjo allo Pammari-marianga. Appala' doanga' angkana, “O, Allata'ala, Kiu'rangia' lanri anjo todong passalaka, siagang kamaseanga' situru' lompona pangngamaseanTa.”

²³ Anjo wattua nia' todong kucini' angkana jai tu Yahudi a'bunting siagang baine battua ri bansa Asdod, Amon, siagang Moab.

²⁴Bageruanna ana'-ana'na ke'nanga tanaassengami bicara Yahudia, mingka bicara Asdod mami yareka bicara bansa maraengannaya.

²⁵Kupakaingaki ke'nanga siagang kutunrai ke'nanga. Nia' todong kuba'ji siagang kuparuntang uu'na. Nampa kusuro ke'nanga assumpa lalang arenNa Allata'ala angkana ke'nanga siagang ana'-ana'na ke'nanga tenamo nalasicampuru' a'bunting pole.

²⁶ Kukana, “Sai iatommi anne dosa kammaya nagaukang Karaeng Salomo? Tena karaeng lompoangngang naia ri anne linoa. Nikamaseangi ri Allata'ala siagang nipa'jari karaeng ri sikontu bansa Israel. Mingka manna nakamma, ninyonyo'mi ri bai'-baine bansa maraeng untu' a'gau' dosa.

²⁷Teai sipato' ja'dala'na ngaseng panggaukannu. Baraniko angngewai Allata'ala lanri a'buntingko siagang bai'-baine battua ri bansa maraeng!”

²⁸ Anjo Yoyada ana'na Imang Lompo Elyasib. Mingka nia' sitau ana'na Yoyada a'jari mintu ri Sanbalat battu ri kota Bet-Horon. Lanri kammana kubongkai Yoyada battu ri Yerusalem.

²⁹Appala' doanga' angkana, “O, Allata'alaku, Kiu'rangi antekamma batena anjo taua anra'massi tugasa' imanga siagang parjanjianTa siagang sikamma imanga na tu Lewia pole!”

³⁰Kammaminjo nakutangkasi bansa Israel battu ri sikontu apa-apa battu pantaraka ri bansa maraenga. Kupattantumi atorang-atoranga untu' sikamma imanga siagang tu Lewia, sa'genna massing nia' ngaseng tugasa'na ke'nanga.

³¹Kuatoro' tommi sollanna ri wattu-wattu attantua, akkullei napasadia ra'yaka kayu tunua untu' koro'bang nitunua siagang akkulle angngerang passare battu ri wassele' bungasa'na lamung-lamunna ke'nanga. Kala'busanna appala' doamma' angkana, “O, Allata'alaku, Kiu'rangi ngasengi anne siagang Kibarakkakia'.”