Read Makassar Version – KITTA' MATANGKASA NEHEMIA 4 Bible Online

NEHEMIA 4 - Makassar Version – KITTA' MATANGKASA bible

NEHEMIA 4

¹Nalangngere'na Sanbalat angkana ikambe tu Yahudia nipakabajiki tembo' kalli'na kotaya, a'jari sanna'mi larrona siagang appakkaramulami ancau-caui ikambe.

²Ri dallekanna agang-aganna ngaseng siagang tantara Samaria nakanamo, “Apa anjo nagaukang tu Yahudi cilakaya, tenaya apa-apa akkulle nagaukang? Apaka eroki ke'nanga ambangung poleangi anne kotaya? Maka nakana kapang ke'nanga akkullei le'ba' lalang siallo anjo jama-jamanga, lanri assarena bawang koro'bang ke'nanga? Maka akkullei anjo tambungang loro ammutunga le'ba' nakanre pepe' napa'jari batu-batu untu' anjo tembo' kallika?”

³Nampa akkana tommo Tobia niaka ammenteng ri sa'rinna, “Ciniki anjo tembo' nabangunga ke'nanga! Kamanna kongkong romanga akkulle tonji narumbang anjo!”

⁴Jari appala' doamma' angkana, “O, Allata'ala, Kilangngere'mi antekamma batena nihina ikambe! Kipitujuimi ri ulunna ke'nanga hukkunganna anjo kana-kana anghinayai ikambe. Lappassammi naniella' barang-baranna ke'nanga siagang nanierang todong kalenna ke'nanga nipela' mange ri pa'rasanganna tau maraenga.

⁵TeaKi' pammopporangi kaja'dallanna ke'nanga siagang teaKi' kaluppai dosana ke'nanga, lanri le'ba'na nahina ikambe ambangunga kamma-kamma anne.”

⁶Na ilalanna anjo wattua anjama tulusu'mi ikambe ampakabajiki anjo temboka. Na tasalloai anjo le'ba'mi sikontu anjo temboka nibajiki sa'genna bageruanna tinggina, saba' lompo sikali sumanga'na ra'yaka anjama.

⁷Ri wattunna nalangngere' Sanbalat, Tobia siagang tu battua ri Amon, tu battua ri Asdod kammayatompa tu Arab, angkana pila' majumi pakabajikanna anjo tembo' kallika ri Yerusalem, kammayatompa appakkaramulami nitongko' sikamma kali'bonna anjo temboka, a'jari teaimi sipato' larrona ke'nanga.

⁸Assitujumi ke'nanga ero' ambunduki Yerusalem untu' appare' karicuang.

⁹Lanri kammana appala' doammi ikambe mae ri Allata'ala, siagang nijagaimi anjo kotaya allo bangngi.

¹⁰Mingka appakkaramulami tu Yahudi akkunrareng lalang kelong nakana, “Dodommi ikambe angngangka' nampa jaina ija loro attambung. Takkullea maki' anjama kamma anne untu' ambangungi tembo'na anne kotaya.”

¹¹Na ilalanna anjo wattua narancanakammi musua untu' ambunduki silalonnai ikambe nampa nabuno ngaseng ikambe, sollanna ammantang anjo jama-jamanna ikambe.

¹²Mingka anjo tu Yahudi niaka ammantang siampi' siagang ke'nanga, a'mole-molemi battu mae ri kambe untu' ampabattui anjo rancanana musua.

¹³Lanri kammana, kubage-bageimi ra'yaka pa'dang, poke, siagang pana, nampa kuatoro' tampa'na ke'nanga manuru' massing golongang bijanna ke'nanga anjoreng ri bokona temboka, iamintu tembo'-tembo' tenayapa nale'ba' nipakabaji'.

¹⁴Kucini'na angkana mallaki ra'yaka, kukanamo ri ke'nanga siagang ri tutoa-toana kammayatompa sikamma pamimpinna ke'nanga, “Teako mallaki ri musua! Angngu'rangiko mae ri Batara makassaka siagang sannaka heba'na, siagang barjuangko untu' sikamma sari'battannu, ana'-ana'nu, bainennu kammayatompa balla'nu.”

¹⁵Nalangngereki musu-musunna ikambe angkana naassemmi ikambe rancanana ke'nanga. Jari sadara'mi ke'nanga angkana nihalangi ri Allata'ala anjo rancanana ke'nanga. Nampa ammotere'mo ikambe anjama ampakabajiki anjo tembo' kallika.

¹⁶Mingka appakkaramula anjo alloa bageruanna mami ana' buaku anjama, nasaba' bageruanna maraenga a'jaga-jagai siagang ammakei baju pa'bundukang kammayatompa angngerangi poke, pa'lapa' barambang siagang pana. Sikamma pamimping ra'yaka nabantumi siagang nasaremi sumanga' ra'yaka,

¹⁷ia anjamaya ampakabajiki temboka. Tau a'lembaraka bahang, siali limanna anna'gala' lembarang nasiali limanna maraenga anna'galaki sanjata.

¹⁸Tukang-tukang batua anjama tommi nassele' pa'dang ri aya'na. Patui' tarompe' pammatei nia' bahaya, tuli niaki ri sa'ringku.

¹⁹Nampa kukanamo ri ra'yaka, ri tutoa-toana ra'yaka siagang sikamma pamimpinga, “Anne jamanga pila' bellami narapi'. Pila' sikabellaiki', sa'genta tassia'-siara'mo ri silla'buna anne temboka.

²⁰Jari, punna allangngerekko tarompe', karo-karoko a'rappung ri tammulilina ikambe anrinni. Allata'alata la'bundu' untu' ikatte.”

²¹Kammaminjo nappakkaramulamo anjama ikambe ri subu-subua sa'genna ammumba bintoenga ri langi' ri bangngia. Bageruanna ra'yaka ampakabajiki temboka, nampa maraenganga a'jaga-jagai anna'gala' poke ri limanna.

²²Lalanna anjo wattua sikontu patugasaka siagang pambantuna ke'nanga kusuroi a'bangngi ri Yerusalem. Lanri kammana, akkullemi ikambe anjagai kotaya punna bangngi nampa punna allo ambangungi temboka.

²³Inakke kalengku, agang-agangku, ana'-ana' buaku siagang sikamma pangawalakku tuli ammakeang pajama', baji' naallo kammayatompa bangngi. Tuli a'jaga-jagai ikambe, siagang sanjata massing ri limanta.