Read Makassar Version – KITTA' MATANGKASA NEHEMIA 5 Bible Online

NEHEMIA 5 - Makassar Version – KITTA' MATANGKASA bible

NEHEMIA 5

¹Siapa are wattu ribokoanganna, jai tu Yahudi, baji' nabura'ne yareka baine, appakkaramulami akkunrareng passala' julu bansana ke'nanga.

²Nia' angkana, “Jai anakku. Parallui gandung ikambe untu' nikatallassang.”

³Nia' tommo angkana, “Tarpassa kupappita'gallangi kokongku, koko anggorokku siagang balla'na ikambe untu' ammalli gandung sollanna tena namate cipuru' ikambe.”

⁴Siagang nia'mo pole angkana, “Le'baki ikambe angnginrang doe' untu' nipa'bayarrang ri sima napattantua karaenga untu' kokonna siagang koko anggoro'na ikambe.

⁵Sai ikambe anne tu Yahudi tonjaki'? Sai ana'na ikambe sangkamma tonji ana'-ana' tu Yahudi maraenga? Mingka manna nakamma tarpassa nalappassammi ana'-ana'na ikambe a'jari ata. Ba'lalo nia'mo ana' tulolonna ikambe le'ba' nibalukang a'jari ata. Tenamo pakkullena ikambe lanri le'ba'mi napappita'gallang kokonna siagang koko anggoro'na ikambe.”

⁶Kulangngere'na akkunrareng ke'nanga, teaimi sipato' larroku.

⁷ Kupattantumi angkana langngallea' tindakang. Nampa kupakainga'mo sikamma tutoa-toana ra'yaka siagang sikamma pamimpinna ra'yaka. Kukana ri ke'nanga, “Angngapa nanujallakkang sikamma sari'battannu tonji?” Nampa appare'ma passirapakkang siagang tau jaia untu' a'boya cara untu' ambantui ke'nanga ri kasusaanga.

⁸Kukanamo ri ke'nanga, “Nipikulle-kulleimi nakkulle nipasulu' sikamma sari'battanta tu Yahudi ia tarpassaya ambalukangi kalenna mae ri bansa maraenga. Mingka angngapa nakamma-kamma anne ikau ngaseng ba'lalo ampassai ke'nanga ambalukangi kalenna mae ri kau ngaseng, na ikau tu Yahudi ngaseng tonjako!” Tappialiami anjo sikamma pamimpinga manna sibuku kana.

⁹Nampa kukanamo pole, “Kodi anjo panggaukannu! Mustina mallakko lalang tallasa'nu mae ri Allata'ala. Lanri kammana, anjo musunta tenaya allata'alana, tenamo nusarei kasampatang untu' anghinaki'.

¹⁰Inakke kalengku, sikamma sari'battangku, kammayatompa agang-agangku ngaseng, nisaremi angnginrang doe' siagang gandung ra'yaka. Mingka tena nanapalaki ikambe ammotere'.

¹¹Ero'na ikau pole tea' mako pabayaraki inranna anjo ra'ya' angnginranga ri kau, baji' na'rupa doe', kammayatompa a'rupa anggoro' yareka minynya' zaitun. Poterangi linta' kokonna, koko anggoro'na, koko zaitunna kammayatompa balla'na ke'nanga!”

¹²Appialimi anjo sikamma pamimpinga angkana, “Anjo pappakaingatta lanaturukimi ikambe. Yangasenna lanapoterangi ikambe siagang tena nalappala' ikambe apa-apa battu ri ke'nanga.” Kukio'mi sikamma imanga nampa kusuro anjo sikamma pamimpinga sumpadeng untu' assumpa ri dallekanna anjo imang-imanga, angkanaya le'ba'mi akkana kamma anjo ke'nanga, siagang lanagaukang tojeng-tojengi anjo kananna ke'nanga.

¹³Nampa kusungke kaeng passikko' ayakku nampa kupabe'bese' siagang kukana, “Kammaminne caraNa Allata'ala lampabe'besekko ikau tau tenaya nurupai janjinnu. Anjo taua lasurokaui tallasa'na, balla'na kammayatompa sikontu pa'barang-baranganna lanaallei Allata'ala!” Appialimi sikamma tau hadereka ri anjo passirapakkanga angkana, “Aming!” Nampa ammuji ke'nanga ri Batara. Jari narupaimi janjinna sikamma anjo pamimpinga.

¹⁴Sampuloma' anrua taung a'jari guburnur ri Yehuda, iamintu appakkaramula ri taung makaruampulo sa'genna taung makatallumpulo anrua ammarenta Karaeng Artahsasta. Lalang anjo wattua inakke siagang sikamma sari'battangku tale'bakai kualle gajiku salaku guburnur.

¹⁵Sikamma guburnur rioloangnganga nainakke, nabattalli ra'yaka lanri natuntuki ke'nanga battu ri ra'yaka 40 jaina doe' pera' lalanna siallo untu' kanre siagang anggoro'na ke'nanga. Ba'lalo, manna pagawe-pagawena ke'nanga najallakkang tonji ra'yaka. Mingka inakke taeroka' appakamma lanri mallaka' ri Allata'ala.

¹⁶Sikontu pakkulleku kupamange ngasengi ri usaha untu' ambangungi anjo temboka nampa tena kunggappa tampa' manna sike'de' a'jari pa'balasa' mae ri nakke, manna pole nasikontu pambantuku anjama tongi untu' anjo pambangunanga.

¹⁷Nia' 150 tu Yahudi siagang tutoa-toana ke'nanga biasa kutoana angnganre ri ballakku, tenirekengapi toana battua ri bansa niaka ri ampi'na ikambe.

¹⁸Allo-allona kupasadia siagang ongkoso' kalengku sikayu sapi, annang kayu gimbala' co'moka kammayatompa jai jangang. Na pantaranganna anjo, lalanna tassampuloa allo kutambai jaina anggoro' biasaya kupasadia. Namanna kamma, taerokaja' antuntuki gajiku battu ri pangkakku a'jari guburnur, lanri kuassengi angkanaya ganna'mi battala'na tanggonganna ra'yaka.

¹⁹Kupalaki o, Allata'ala, Kiu'rangi anne sikamma apa le'baka kugaukang untu' anne bansaya, siagang poro Kibarakkakia'.