Read Makassar Version – KITTA' MATANGKASA NEHEMIA 9 Bible Online

NEHEMIA 9 - Makassar Version – KITTA' MATANGKASA bible

NEHEMIA 9

¹Ri tanggala' ruampulo angngappa' anjo todong bulanga, a'rappungammi ra'ya' Israel. Appuasai ke'nanga untu' pammatei ri assesse' lalanna lanri dosa-dosana ke'nanga. Nasa'la'mi kalenna ke'nanga battu ri bansa-bansa maraenga. Untu' a'jari pammatei ri si'nana pa'mai'na ke'nanga, ammakemi ke'nanga kaeng karung siagang nakiorimi butta ulunna ke'nanga. Nampa ammenteng siagang namangakui dosana ke'nanga siagang dosana boe-boena ke'nanga.

³Nia' kutadeng tallunjang sallona nibaca anjo Kitta' HukkunNa Batara, Allata'alana ke'nanga mae ri ke'nanga. Nampa nia' todong tallunjang ri bokona namangakui dosa-dosana ke'nanga. Le'baki anjo su'ju'mi ke'nanga anynyomba ri Batara, Allata'alana ke'nanga.

⁴Anjoreng nia' podiung untu' tu Lewi nampa ammentemmo rate Yesua, Bani, Kadmiel, Sebanya, Buni, Serebya, Bani siagang Kenani. Assa'ra lompomi ke'nanga appala' doang mae ri Karaeng Allata'alana ke'nanga.

⁵Passambayanganga anjo alloa napakaramulai tu Lewi, iamintu: Yesua, Kadmiel, Bani, Hasabneya, Serebya, Hodia, Sebanya, siagang Petahya. Nakana ke'nanga, “Ammentengko nampa nipuji Karaeng Allata'alata! Mammujiko mae ri Ia sa'genna satunggu-tungguna! Nipujimi arenNa sukkuka ri kala'birang, hebaki arenNa, la'biangngangi nasikontu pammujia!”

⁶Nampa appala' doammo ra'ya' Israel kamma anne, “IKattemi Batara, iKattemi tena ruanTa; Kipa'jari bintoenga na sikontu langika, kammayatompa tamparang, butta siagang sikontu bonena, nampa Kisare katallassang siagang Kiparakai. Ri Kattemi anynyomba sikamma koasaya ri langi'; akkulantuki ke'nanga, tundu' mae ri Katte.

⁷ IKattemi Allata'ala, Batara tenaya ruanna Kipilei Abram battu ri tangnga-tangnga bansana. Nabokoimi Ur ri Babel, lanri kalenTa ampimpingi. Nampa Kisare areng beru: Abraham, iaminjo arenna appakkaramula anjo wattua.

⁸ Kigappai majarre' siagang mappilangngeri ri Katte. Nampa apparekKi' parjanjiang majarre' siagang ia. Butta Kanaan, Het siagang Amori, butta Feris, Yebus siagang Girgasi, yangasenna anjo laKipassareangi ri ia a'jari pammantangang sikontu turunganna. Nampa Kirupai anjo janjinTa ri ia. Nasaba' adele' siagang majarrekKi' ri janjinTa.

⁹ Kiciniki pa'risi'na boena ikambe ri wattu allaloa; Kipilangngeri karru'na ri Mesir siagang ri Tamparang Teberau.

¹⁰ Kigaukangi gau' mahebaka ri karaeng Mesir kamma todong ri pagawena siagang ri ra'ya'na pa'rasanganna, nasaba' Kiassengi antekamma batena ampa'risi ummatTa. Nampa masahoro'mo arenTa sa'genna anne alloa.

¹¹ Untu' Kiparekang oloang ummatTa, kipuei tamparanga; Kipalimbangi ke'nanga ri butta kalotoro'na tamparanga. Tallang ngaseng lalang je'ne' sikamma tau angngondanga, sanrapang batu tallang ri tamparang karrasaka.

¹² Kipimping ke'nanga siagang allung ri wattu singara' alloa. Ri wattunna bangngi Kisingari oloanna siagang benteng pepe'.

¹³ Kipaturung battu ri langi' mae ri tompo'na Moncong Sinai, Kinampa a'bicara siagang umma' kalenTa. Kisarei hukkung, atorang siagang parenta adeleka, tojenga siagang a'matu-matua.

¹⁴Allo Pammari-mariang matangkasaka musti napakalompoi ke'nanga, na tete ri Musa Kipassareang hukkunTa.

¹⁵ Ri wattu cipuru' siagang kurang kanre, Kipaturungi rotia battu rate ri langi'. Battu ri batu terasa', kassa' siagang jarre' Kipasolong sarring je'neka untu' passau turere. Kisuroi ke'nanga angngempoi buttaya ia le'baka Kipa'janjiang ri ia lalang sumpa.

¹⁶ Mingka boena ikambe tampoi siagang ka'doro' nyawai; tanaturukiai sikamma parentaTa.

¹⁷ Tamannurukiai ke'nanga, nakaluppai sikontu kabajikanTa, tenai ri pangngu'ranginna sikamma gau' mappakalannasatTa. Tampomi ke'nanga ammile sitau pamimping, untu' angngerangi ke'nanga ri Mesir, ammotere' a'jari ata. Mingka iKatte Allata'ala mangngai mappammopporang, sarro sa'bara', lammoro' pa'mai', sukku' pangngamaseang. Teai sipato' heba'na pangngamaseanTa; tena naKibokoi ke'nanga.

¹⁸ Appareki ke'nanga barhala sangkamma sapi. Nampa nakana ke'nanga, ‘Iaminne allata'alanu, angngerangko battu ri Mesir, ri tampa'nu nipare' ata.’ O, Allata'ala, iKatte kalenTa nahina ke'nanga!

¹⁹ Mingka manna ri paranga taKibokoiai ke'nanga, lanri sukkutTa ri pangngamaseang. TaKipalesangngai ammotere' benteng allung siagang pepe', angngului ri jappana ke'nanga allo bangngi.

²⁰Lalang koasa mabajitTa Kiajara' ke'nanga. Angnganrei manna[7] siagang angnginung ke'nanga siganna'na.

²¹Patampulo taung sallona ri parang lompoa, Kipa'gannaki sikamma kaparalluanna ke'nanga. Pakeanna ke'nanga tale'bakai panra'; bangkenna ke'nanga tapa'risai yareka takkambangai.

²² Kisarei ke'nanga pammetang mae ri jaia kakaraengang siagang bansa ri pa'baeng-baeng pa'rasanganna ke'nanga. Hesybon, pa'rasanganna Karaeng Sihon, naempoimi ke'nanga; Basan, pa'rasanganna Karaeng Og, natampakkimi ke'nanga.

²³ Kipa'jari turunganna ke'nanga sanrapang bintoeng ri langi' jaina, Kisarei butta ke'nanga untu' napammantangngi, butta le'baka Kipa'janjiang ri boena ke'nanga.

²⁴ Turunganna ke'nanga nabetai butta Kanaan; Kipatunduki pandudu' niaka anjoreng. Kisarei koasa ummatTa angngalle tindakang situru' ero'na ri bansa-bansa Kanaan siagang sikamma karaenna.

²⁵ Naallei ummatTa sikamma tembo' pattahanganga, butta copponga siagang balla' sangga kalumanynyanga. Sikamma bungung siagang timbuseng je'ne' narampasaki ke'nanga, koko anggoro', poko' zaitun na rappo-rappoang maraeng. Co'moki ke'nanga lanri angnganre ri ero'-ero' pa'mai'na. Sikontu passare bajitTa nakasiaki ke'nanga.

²⁶ Mingka apparicui ummatTa na tamannurukia, nabawang-bawangngangi hukkunTa siagang paratoranTa, nabunoi na'bi-na'bi ampakaingakai ke'nanga, assuroai ke'nanga ammotere' ri Katte, Allata'alana. O, Batara, a'mole-mole tongKi' nihina ri ke'nanga.

²⁷Jari Kipassareammi ke'nanga mae ri musunna sekkeka angkoasai siagang anjallakkangi ke'nanga. Mingka lalang nijallakkanna lalang kasusaang, akkio'mi ke'nanga appala' bantuang. Mappilangngeri maKi' battu ri suruga; sanna' mangngamaseanTa nakipiali. Kipabattui pamimping siagang pahlawang allappassangai ke'nanga battu ri musu.

²⁸Mingka ri wattu amang ammotere' pa'rasanganna, linta'mi doraka ke'nanga ammotere'. Jari Kipassareammi pole ke'nanga mae ri musu anjallakkangai. Mingka ri wattu angngu'rangi siagang sanna' assesse' lalanna, akkio'mi ri Katte appala' nipasalama'. Jari mappilangngeriKi' battu ri suruga, naKitulung ma'mole-mole, lanri mangngamaseanTa siagang Kisayanna ke'nanga.

²⁹ Kipakaingaki ke'nanga sollanna naturuki pangngajaratTa, mingka borroi ke'nanga na natolla' hukkunTa. Nama'nassana, punna nigaukang hukkunTa, mattantu lanikatutui katallassanga. Kapala batui na terasa' nyawa ke'nanga, taeroka mappilangngeri, taeroka mannuruki.

³⁰ Attaung-taungKi' sa'bara' ampakaingaki; tete ri sikamma na'bia, nama'bicara RohTa ri ke'nanga. Mingka natongkoki tolinna ummatTa, jari Kipassareammi ke'nanga mae ri bansa-bansa sikamma pa'rasangang.

³¹Mingka lanri teai sipato' lompona pangngamaseanTa, tena Kibokoi yareka tena Kiancuruki ke'nanga. Memang iKattemi Allata'ala tenaya sangkammanTa; lompoi pangngarimanginTa, sukkuki pangngamaseanTa!

³² O, Allata'ala, Allata'alana ikambe magassinga! Allata'ala malompoa siagang hebaka! MajarrekKi' anta'galaki sikontu parjanjianTa; Kirupai siagang Kigaukangi janji-janjinTa. Battu ri jammang sikamma karaeng Asyur anjallakkangi ikambe sa'genna kamma-kamma anne jaimi pa'risi' nakasia' ikambe. Sikamma karaenna ikambe, imang, na'bi siagang tutoa-toaya, kammayatompa boena ikambe siagang ra'yaka pa'risi' ngaseng. Teaki' kaluppai anjo pa'risika! Teaki' pelakki ri pangngu'ranginTa!

³³Adeleki tindakanTa, Kihukkungi anne ikambe dorakaya; tuli majarrekKi', manna jai callanna ikambe.

³⁴Boena ikambe, karaeng, imang, siagang sikamma tutoa-toaya, nadakkai hukkunTa siagang nabawang-bawangngangi. Sikontu parenta siagang pappakainga' Kipassareanga, tanajampangiai, tena todong napilangngeri.

³⁵Kibarakkaki sikamma karaeng ammarentaya ri ummatTa, ri wattunna ammantang ri butta luara' na coppong, passareTa. Mingka tanabokoiai ke'nanga tallasa' ja'dalaka, taerokai a'matu-matu siagang anynyomba mae ri Katte.

³⁶Jari a'jari atami ikambe kamma-kamma anne ri butta Kipassareanga a'jari pisaka. Anne butta copponga, jai wassele'na, mustina nakabajikangi nakasia' ikambe.

³⁷Sikontu wassele' nigappaya ri anne buttaya musti nipassareangi mae ri sikamma karaenna pa'rasangang. Sikamma anjo tukoasaya Kiangkaki irateanna ummatTa, a'jari hukkungang dosana ikambe mae ri Katte. Ammarentai ke'nanga ri ero'-ero' pa'mai'na mae ri kambe siagang olo'-olo' piarana ikambe. Lanri kammana minjo nasessamo ikambe, sangnging pa'risi' siagang kasusaang nikasia'!”

³⁸Lanri sikamma anjo apa kajarianga, ikambe ra'ya' Israel appare' maki' parjanjiang majarreka siagang tattulisi', nampa nisare sitempele' battu ri sikamma pamimpinna ikambe, tu Lewi, siagang sitau imang battu ri kambe.