Read Makassar Version – KITTA' MATANGKASA ESTER 2 Bible Online

ESTER 2 - Makassar Version – KITTA' MATANGKASA bible

ESTER 2

¹Siapa are wattu ribokoanganna, manna nammarimo larrona karaenga, mingka tuli nanawa-nawa iji anjo panggaukanna Ratu Wasti siagang apa le'baka natappuki mae ri ia.

²Lanri kammana, nakanamo sikamma tumailalang ma'reppese'na, “Bajikangngangi punna nipa'boyang karaenga tulolo-tulolo ga'gaya.

³Kiangka'mi ri sikontu daera propinsia ri anne kakaraenganga siapa are pagawe untu' a'boya tulolo-tulolo ga'ga, nampa naerang ngaseng ke'nanga anjo tuloloa mae anrinni ri Susan, ri balla' karaeng bainea. Hegai, kapala palayanga ri balla' karaeng bainea langngurusuki ke'nanga siagang nasare ke'nanga sikamma apa-apa parallua untu' amparakai kaga'ganna ke'nanga.

⁴Le'baki anjo kipileimi tulolo kaminang kingaia karaeng, nampa kipa'jari karaeng baine untu' ansambeangi Ratu Wasti.” Nasitujuimi karaenga anjo napakkanaya ke'nanga.

⁵Anjoreng ri kota Susan, nia' se're tu Yahudi niareng Mordekhai, ana'na Yair. Ia turungang battu ri Kis siagang Simei, battu ri suku Benyamin.

⁶ Anjo Mordekhai nitahangi ri wattunna nibeta taua ri Yerusalem ri Karaeng Nebukadnezar battu ri Babel. Nipelaki Mordekhai mange ri Babel siagang Yoyakim, iamintu karaeng Yehuda, kammayatompa tunipela' maraengannaya.

⁷Nia' cikalinna tulolo, sannaka ga'gana tanja'na siagang sannaka baji'na kalenna. Arenna iamintu Ester, naareng Ibranina iamintu Hadasa. Matemi tau toana, nanipa'jari ana' piaramo ri Mordekhai, nipasangkamma ana' kalenna.

⁸Le'ba'na nipa'la'bang anjo parentana karaenga, jaimi tulolo nipasse're ri kota Susan. Nia' tommi Ester ri kalase'renna ke'nanga. Nierang tommi mange ri balla' karaenga, nampa nipassareang ri Hegai, kapala palayanga ri balla' karaeng bainea.

⁹Takkajannammi Hegai anciniki Ester siagang nangai nacini'. Nasaremi linta' anjo tuloloa apa-apa parallua napake a'mode, kammayatompa napanynya'lakkammi kanre. Nipalette'mi Ester ri tampa' kaminang bajika ri anjo balla' karaeng bainea. Nampa nisaremo tugasa' tuju baine kaminang laccirika untu' allayani.

¹⁰Nipakainga'mi Ester ri Mordekhai, sollanna tena napaui kalenna angkana tu Yahudi.

¹¹Allo-allona Mordekhai a'jappa-jappa ri paranglakkeng dallekanna balla' karaeng bainea untu' ampakkuta'nangngangi kaadaanna Ester siagang apa lakajariang ri kalenna.

¹²Manuru' paratorang, sitaungi sallona nisare sikamma bainea barang-barang naparalluanga untu' a'mode. Annang bulang nisare minynya'-minynya' accampuruka kamanynyang, nampa annang bulang pole nisare minynya'-minynya' accampuruka bau'-baukang maraeng. Le'baki anjo, a'le'basa'mi nisare kasampatang tasse're-se're anjo tuloloa mange andallekang ri Karaeng Ahasyweros.

¹³Ri wattunna andallekang ri karaenga tasse'rea tulolo, akkullei ammakeang situru' pangngai kalenna.

¹⁴Nierangi mange ri balla'na karaenga ri wattu bangngi, nampa ammukona nierangi mange ri balla'na karaenga maraenganga, nampa niurusu' ri Saasgas, iamintu pangngurusu'na sikamma baine piarana karaenga. Takkulleami anjo tuloloa lamange andallekang pole ri karaenga punna tena nakaerokangi karaenga siagang nikioki na napau arenna.

¹⁵Na narapi'mo kasampatanna Ester untu' mange andallekang ri karaenga. Anjo Ester, ana'na Abihail, cikalinna Mordekhai ia angngangkakai a'jari sangkamma ana' kalenna. Takkajannang ngasemmi sikamma tau ancinikai Ester. Ri wattunna mange Ester andallekang ri karaenga, ammakeangi situru' pattujunna siagang pangngajara'na Hegai, kapala palayanga ri balla' karaeng bainea.

¹⁶Kammaminjo, ri makatujuna taung ammarenta Karaeng Ahasyweros, ri bulang sampulo, iamintu niarenga bulang Tebet, nierammi Ester mange andallekang ri Karaeng Ahasyweros ri balla' karaenga.

¹⁷Napa'jari sannammi siagang napakasunggumi nyawana karaenga la'biangngang natulolo maraengannaya. Lanri kammana, iami kaminang ningai ri karaenga. Jari nipipakeimi ri karaenga songko' karaeng, iamintu nipadongkoki ri ulunna Ester. Nipa'jarimi ratu ansambeangi Ratu Wasti.

¹⁸Le'baki anjo appare'mi acara passua'-suarrang lompo karaenga, untu' ampakalompoi Ester. Naundang ngasemmi sikamma pagawena siagang tumalompona. Napa'la'bammi mange ri sikontu daera kakaraenganna angkana allo perei anjo alloa, siagang a'bage-bagemi hadia sanna' jaina.

¹⁹Na ilalanna anjo wattua niangka'mi Mordekhai ri karaenga a'jari pagawe.

²⁰Tenapa napaui Ester angkana kalenna tu Yahudi, saba' tena nipa'biangi ri Mordekhai. Mannuruki Ester ri Mordekhai sangkamma ri wattu ca'dina ija siagang niparakai ri anjo cikalinna.

²¹Ri se'reang allo, ri wattunna nagaukang tugasa'na Mordekhai, nia'mo rua pagawe kalenna karaenga, iamintu niarenga Bigtan siagang Teres, assikongkoloki ero' ambunoi Karaeng Ahasyweros, lanri sanna' birisi'na ke'nanga ri ia.

²²Naassengi Mordekhai anjo rancanana ke'nanga, siagang linta'mi napauang Ester anjo passalaka. Akkaro-karomi Ester ancaritai ri karaenga anjo apa naassenga Mordekhai.

²³Nisalidikimi anjo passalaka, nampa a'nyatamo angkana kammatojengi anjo kabaraka. Nihukkummi iamintu mate nigentummi anjo tau ruaya. Situru' parentana karaenga, nicata'mi anjo kajarianga antama' ri kitta' riwaya' kakaraenganga.