Read Makassar Version – KITTA' MATANGKASA ESTER 5 Bible Online

ESTER 5 - Makassar Version – KITTA' MATANGKASA bible

ESTER 5

¹Ri makatalluna allo puasana, napakemi Ester pakeang ratuna, nampa a'lampa mange ri paranglakkeng lalanna balla' karaenga. Ammentengi ri dallekang pakke'bu'na balla' luara' passe'reang taua ri dallekanna karaenga. Anjo wattua sitabangi ammempo karaenga irate ri empoang kala'biranna, a'dalle' mange ri anjo pakke'buka.

²Ri wattunna nacini' Ratu Ester ammenteng pantarang, tu'guru'mi pangngamaseanna ri ia. Napajonjomi takkang bulaenna mae ri ia. Jari majumi Ester mae ri dallekang, nampa najama cappa'na anjo takkang bulaenga.

³Akkuta'nammi karaenga nakana, “Apa kutadeng ratuku? Apa nukaeroki? Manna nupala' bageruanna kakaraengangku, lakusare tonjako.”

⁴Appialimi Ester angkana, “Punna kierokangi karaeng, kuminasai kibattu anne bangngia siagang Haman, mae ri parjamuang napareka atanta untu' ikatte.”

⁵Nasuromi karaenga battu Haman linta', sollanna mange ke'nanga anghaderi anjo undanganna Ester. Battumi ke'nanga ri anjo parjamuang napareka Ester.

⁶Ri wattunna angnginung anggoro', akkuta'nammi karaenga angkana, “Kamma-kamma anne paumi apa nukaerokia. Manna apa nupala' tena takusarenu, manna pole nabageruanna anne kakaraengangku!”

⁷Appialimi Ester angkana,

⁸“Punna kierokangi karaeng anturukiangi pappala'na atanta, kuminasai nakibattu pole siagang Haman ri parjamuang lakupareka pole ammuko ri bangngia. Lalampi ri anjo parjamuanga nakupauangki' pappalakku ri katte.”

⁹Ammotereki Haman battu ri parjamuang napareka Ester. Sannang sikali pa'mai'na siagang sanna' rannuna anjo ammotere'na. Mingka ri wattunna nacini' Mordekhai ri pakke'bu' lompona balla' karaenga nataeroka ammenteng untu' ansombai, a'jarimi sanna' larrona.

¹⁰Mingka naparrangngi anjo larrona nampa ammotere' ri balla'na. Battui mange ri balla'na, nasuromi battu sikamma agang-aganna. Nakio'mi bainenna, iamintu Zeres, battu ammempo siagang ke'nanga.

¹¹Nampa akkana borromo Haman ri ke'nanga siagang napattampo-tampoammi kakalumanynyangnganna, jaina ana' bura'nena, porena empoang natarimaya battu ri karaenga, kammayatompa bellana tinggina pangka'na napagawe-pagawe maraengannaya.

¹²Nakanamo pole, “Ba'lalo manna Ratu Ester, inakkeji bawang siagang karaenga naundang mange ri parjamuang napareka untu' ikambe. Nampa naundang maki' pole untu' ammuko ri bangngia.

¹³Mingka yangasenna anjo tena matu-matunna punna kucini' ija Mordekhai, anjo tu Yahudi niaka ammempo ri pakke'bu' lompona balla' karaenga.”

¹⁴Nalangngereki bainenna siagang sikamma agang-aganna akkana kamma anjo Haman, nakanamo ke'nanga, “Assuro pare' mamako tampa' pa'gentungang ruampuloa metere' tinggina. Nampa ammukona, ri bari'basaka, appala' isingko mae ri karaenga untu' anggentungi Mordekhai ri anjo tampa' panggentunganga. Lanri kammana anjo akkulle mako mange ri anjo parjamuanga siagang sannang pa'mai'.” Baji' sikali panggappana anjo ke'nanga turu' ri panggappana Haman. Jari nasuromi linta' taua ampareki anjo tampa' panggentunganga.