Read Makassar Version – KITTA' MATANGKASA ESTER 6 Bible Online

ESTER 6 - Makassar Version – KITTA' MATANGKASA bible

ESTER 6

¹Anjo memang bangngia takkulleai attinro karaenga. Jari nasuro allemi kitta' catatang riwaya'na kakaraenganga nampa nasuro baca ri taua.

² Nia'mo nigappa lalang nicata' angkanaya le'baki nalaporo' Mordekhai usaha eroka ambunoi karaenga, ia narancanakanga Bigtan siagang Teres, iamintu ruaya tau nisare tugasa' anjagai kamara'na karaenga.

³Akkuta'nammi karaenga angkana, “Pappakala'biri' apa siagang pa'balasa' jasa apa le'ba' nisareangi Mordekhai?” Appialimi sikamma anjo palayanga angkana, “Tena apa-apa nisareangi.”

⁴Akkuta'nammi karaenga angkana, “Inai pagaweku nia' kamma-kamma anne ri balla' karaenga?” Anjo wattua sitabangi beru antama Haman ri parang lakkenna balla' karaenga; eroki appala' ising ri karaenga untu' anggentungi Mordekhai ri anjo tampa' panggentungang le'baka napaenteng.

⁵Appialimi anjo sikamma palayanga ri karaenga, angkana, “Niakai Haman ri balla' karaenga siagang eroki andallekang ri katte.” Nakanamo karaenga, “Suroi antama.”

⁶Antama'na Haman, nakanamo karaenga ri ia, “Nia' tau ero' kusare pammatei pappakala'biri' lompo. Apa musti kugaukang untu' ia?” Nakanamo ri nawa-nawanna Haman, “Inai maraeng lanisare pammatei pappakala'biri' kammaya anjo lompona ri karaenga? Mattantu inakke!”

⁷Jari appialimi angkana, “Kipangngalleangi anjo taua pakeang kalompoang biasaya kipake kalenta. Nampa anjo jaranta nibelo-beloi siagang gambarang-gambarang kakaraengang.

⁹Se're tumalompona pa'rasanganga, ia battua ri golongang karaenga, musti ampipakei anjo tau eroka kipakala'biri'. Nampa nierang anjo taua nirurungang ri taua andongkoki jaranna karaenga allalo ri parang lompona kotaya. Anjo tumalompona pa'rasanganga la'jappai ri dallekanna akkiok-kio' angkana, ‘Kammaminne batena karaenga ambilang lompoi tau napakala'birika!’ ”

¹⁰Nampa nakanamo karaenga ri Haman, “Lintakko, allemi anjo pakeanga siagang jaranga, nampa nusare anjo sikamma pappakalala'birika mae ri Mordekhai, anjo tu Yahudia. Gaukammi sangkamma anjo nupaua sumpadeng, teako kurangngi manna sike'de'. Akkullei nubuntulu' sitabang ammempo kamma-kamma anne ri dallekang pakke'bu' lompona balla' karaenga.”

¹¹Mangemi Haman angngallei anjo pakeanga siagang jaranga, nampa napipakei anjo Mordekhai siagang anjo pakeanga. Le'baki nai' Mordekhai ri anjo jaranga, a'lampami Haman anrurungangi siagang tau jaia allalo ri paranna kotaya. Akkiok-kio'mi angkana, “Ciniki, kammaminne carana karaenga ambilang lompoi tau napakala'birika!”

¹²Le'baki anjo ammotere'mi Mordekhai mange ri pakke'bu' lompona balla' karaenga. Mingka anjo Haman, akkaro-karomi ammotere'. Taerokai nicini' ri tau jaia lanri sanna' siri'-siri'na. Jari nabombo'mi rupanna.

¹³Nacaritami mae ri bainenna siagang sikamma aganna apa le'baka nagaukang. Jari nakanamo bainenna siagang sikamma anjo agang-aganna appikkiri' bajika, “Appakkaramula mako nabeta gassing Mordekhai. Ia tu Yahudi, nampa takkulleako angngewai. Mattantu lanabetako.”

¹⁴Lalang a'bicarana ija ke'nanga siagang Haman, nia'mi battu karo-karo sikamma palayanga ri balla' karaenga untu' angngantaraki Haman mange ri parjamuang napareka Ester.