Read Makassar Version – KITTA' MATANGKASA KALAPPASSANG 1 Bible Online

KALAPPASSANG 1 - Makassar Version – KITTA' MATANGKASA bible

KALAPPASSANG 1

¹ Yakub, nigallaraka Israel, a'lampai mange ri Mesir siagang sikamma ana'na kammayatompa massing kaluargana ana'-ana'na. Anjo ana'-ana'na Yakub iamintu:

²Ruben Simeon Lewi Yehuda

³Isakhar Zebulon Benyamin

⁴Dan Naftali Gad Asyer.

⁵Kabusu'na anjo turunganna Yakub, nia' tujupulo tau jaina. Yusuf, nia' memammi la'bi riolo ri Mesir.

⁶Siapa are wattu ribokoanganna matemi Yusuf siagang sikamma sari'battanna. Kammayatompa sikamma tau naaganga ke'nanga a'julu jammang, mate ngaseng tommi.

⁷ Mingka anjo turunganna tu Israel a'bija-bijami a'jari sanna' jaina. Teai sipato' linta'na katambang jaina ke'nanga, sa'genna ero'mi rassi pa'rasangang Mesir napakamma ke'nanga.

⁸ Nampa nia'mo sitau karaeng beru appakkaramula ammarenta ri Mesir. Anne karaeng berua tanaassengai Yusuf.

⁹Nakanamo ri ra'ya'na, “Anjo tu Israelka akkullei a'jari bahaya mae ri katte, lanri teai sipato' jaina ke'nanga, siagang kassakangngangi ke'nanga na ikatte.

¹⁰ Ebara' angkana a'jari bunduka, akkullei ke'nanga agang mae ri musua untu' ambaliangki', nampa lari ke'nanga ampilari anne pa'rasanganga. Musti a'boyaki' akkala' sollanna tena napila' katambang jaina ke'nanga.”

¹¹Jari angngangka'mi tu Mesir siapa are jaina pajaga mae ri bansa Israel untu' ampakasukkaraki katallassanna ke'nanga, iamintu nasuroi tu Israel anjama terasa'. Nipassai ke'nanga ambangungi kota Pitom siagang Raamses, untu' karaeng Mesir untu' a'jari pammolikang barang-barang.

¹²Mingka pila' nijallakkangi ke'nanga ri tu Mesir, pila' katambangi jaina anjo tu Israel. Pila' a'la'bammi ke'nanga mae ri sikontu anjo pa'rasanganga, sa'genna a'jari malla'mo tu Mesir ri ke'nanga.

¹³Jari pila' sekke'mi ke'nanga anjallakkangi tu Israel,

¹⁴siagang nasusaimi katallassanna anjo tu Israelka. Tena sikalimo pangngamaseanna anjo tu Mesir ampassai tu Israel anjama terasa' ri sikamma usaha bangunanga siagang panjama-jamang ri sikamma kokoa.

¹⁵Appassulu'mi parenta Karaeng Mesir mae ri sanro pamana' niarenga Sifra siagang Pua; anne ruaya sanro pamana' biasai natulung bai'-baine tu Ibrania punna lammana' ke'nanga.

¹⁶Nakana Karaeng Mesir, “Punna nutulung tubaine Ibrania ammana', u'rangi anne: Punna ana' bura'ne anjo nalassukanga, bunoi! Punna baine anjo nalassukanga, lappassammi attallasa'.”

¹⁷Mingka anjo ruaya sanro pamana', tau malla' ngaseng mae ri Allata'ala. Taerokai ke'nanga anggaukangi anjo apa naparentakanga karaenga; nalappassanji attallasa' sikamma ana' lolo bura'nea.

¹⁸Jari nikio'mi anjo ruaya sanro pamana' ri karaenga. Akkuta'nammi karaenga angkana, “Angngapa nulappassangi attallasa' ana'-ana' lolo bura'nea?”

¹⁹Appialimi ke'nanga angkana, “Anjo bai'-baine tu Ibrania tena nasangkamma bai'-baine tu Mesirka. Anjo ke'nanga lammoro' sikali punna ammanaki. Tenapa nabattu sanro pamanaka, nalassu' memammo ana'na ke'nanga.”

²⁰Jari nibarakkakimi anjo ruaya sanro pamana' ri Allata'ala, lanri napakalompoi ke'nanga Allata'ala. Siagang pila' katambang napila' kassa' tommo tu Israel.

²² Appasulu'mi parenta karaenga mae ri sikontu ra'ya'na angkana, “Sikontu ana' bura'ne beru lassuka ri tu Ibrania musti nipelaki antama' ri Binanga Nil, mingka sikontu ana'na bainea akkullei nilappassang attallasa'.”