Read Makassar Version – KITTA' MATANGKASA KALAPPASSANG 15 Bible Online

KALAPPASSANG 15 - Makassar Version – KITTA' MATANGKASA bible

KALAPPASSANG 15

¹ Nampa nakelongammo Musa siagang tu Israel anne kelonga untu' mammuji mae ri Batara, “Eroka' mammuji mae ri Batara, saba' le'ba'mi ammeta lompo. Sikontu jaranga siagang tu'baena nipasambilai antama' ri tamparang.

² Batara angngalleia', Ia makkassa'; Iami ampasalamakka'. Ia Allata'alaku, erokka' mammuji mae ri Ia, Allata'alana boe-boeku, kupakkelongangi kala'biranNa.

³Batara tubarani makassaka, Batara, iaminjo arenNa.

⁴Tantara Mesir siagang sikontu karetana nipasambilai antama' ri tamparang. Perwira-perwira tantarana kaminang gammaraka tallangi naung ri Tamparang Alara'.

⁵Nia'luki ke'nanga ri tamparang lantang, rapangi batu naunga ri dapara'na.

⁶Tamaka mappakalannasa'na kagassinganTa, o Batara, Kipaccappuki musunTa tasimbung-simbung.

⁷Lanri kala'birang malompoTa Kipanraki sikontu angngewaya ri Katte. A'rinrai larroTa rapang pepe', na natunu ke'nanga rapang rarame.

⁸Kituiki tamparanga, ta'gulung tinggi je'neka, ammenteng kassa' rapang tembo', sa'genna akkulle niolo dapara'na tamparanga.

⁹Nakana musua, ‘Lakuondangi ke'nanga nampa kujakkala', kubi'buki pa'dangku, nampa kutumpasa' ke'nanga. Nampa kurampasa' sikamma barang-baranna ke'nanga, kubage-bage siagang kukasia' baji'na sa'genna sukku' kusa'ring.’

¹⁰Mingka sikaliji a'mai' Batara na Napabattu balaya mae ri tu Mesir. Tallangi ke'nanga rapang tima battala' lalang ri gamarrunna je'ne' lompoa.

¹¹Kereangami Allata'ala sangkammanTa, o Batara Kaminang Tinggia siagang matangkasaka? Inai akkulle appare' gau' malompo siagang gau' appakalannasa' kamma Batara?

¹²Kiangkaki lima kananTa, nalanynya'mo musua nia'lu' ri butta.

¹³Kipimpingi anne bansa le'baka Kipasalama', lanri majarrekKi' mae ri janjinTa. Lanri koasa malompoTa naKila'langi, siagang Kirurungang mae ri butta matangkasatTa.

¹⁴Sikamma bansa mallangngereka annekkere'mi; gegere'mi tu Filistin siagang sikamma pamimpinna Edom.

¹⁵Annekkere'mi tu baranina Moab, ca'dimi pa'mai'na tu Kanaan.

¹⁶Tamaka malla'na ke'nanga ansa'bikangi kagassinganNa Batara. Ammalona ummatTa, takkulleai musua antahangi; ta'lappasa'mi bansa le'baka Kilappassang.

¹⁷Nampa Kiantara' tu Israel mange ri tampa' Kipilea untu' pammantanganTa. Ammantang tulimi ke'nanga ri bulu' matangkasatTa, ri Balla' Kibangunga KalenTa.

¹⁸IKattemi Batara, Karaeng, ammarentaya satunggu-tungguna.”

¹⁹Ri wattunna a'limbang ri tamparanga tu Israel, a'jappai ke'nanga ri dapara' kalotoro'na tamparanga. Mingka sikamma karetana tu Mesir siagang jaranna kammayatompa tuma'baena, ri wattunna antama' ngaseng ke'nanga ri je'neka, Napa'lo'loro'mi Batara ammotere' anjo je'neka assialle ammotere' sa'genna tallang ngaseng ke'nanga.

²⁰Nampa anjo Miryam, sitau na'bi baine, daenna Harun, angngallemi rabana, kammayatompa sikontu bainea annunrung ngasemmi rabana nampa a'joge'.

²¹Akkelommi Miryam, nirurungang ri rabana; na nakana kelong-kelonna, “Akkelongko mae ri Batara, saba' le'ba'mi ammeta lompo. Sikontu jaranga siagang tu'baena nipasambila ngaseng antama' ri tamparang.”

²²Nampa naerammo Musa anjo bansa Israel battu ri Tamparang Alara' mange ri parang lompo niarenga Syur. Tallungalloi ke'nanga a'jappa allalo ri parang lompoa, natale'baka ammuntulu' je'ne'.

²³Nampa battumo ke'nanga ri se'reang tampa' niarenga Mara, mingka paiki anjoreng je'neka, sa'genna takkullea niinung. Lanri kammana minjo naniaremmo anjo tampaka Mara, battuanna pai'.

²⁴A'moro-moromi anjo taua mae ri Musa siagang akkuta'nammi ke'nanga ri ia angkana, “Apamo laniinung?”

²⁵Appala' doang dudumi Musa mae ri Batara. Nampa nipicinikiammo ri Batara sipolong kayu. Naallemi Musa anjo kayua nampa napasambila antama' ri je'neka, sa'genna a'jari la'ba anjo je'neka, nakkullemo niinung. Anjoremmi ri tampaka assare Batara paratorang-paratorang mae ri ke'nanga, siagang anjoreng tommi Naso'ri ke'nanga.

²⁶Nakana Batara, “Mannuruki tojeng-tojeng mako mae ri Nakke, siagang gaukangi apa Kukanaya baji'; turuki sikamma parentaKu. Punna nugaukang anjo kammaya, tena nulaKuhukkung sangkamma garring le'baka Kupabattu mae ri tu Mesirka. INakkemi Batara ampamolleako.”

²⁷Le'baki anjo battumi ke'nanga mange ri se'reang tampa' niarenga Elim. Anjoreng nia' sampulo anrua timbuseng je'ne' siagang tujupulo poko' korma. Appare'mi ke'nanga kema ri ampi'na anjo je'neka.