Read Makassar Version – KITTA' MATANGKASA KALAPPASSANG 16 Bible Online

KALAPPASSANG 16 - Makassar Version – KITTA' MATANGKASA bible

KALAPPASSANG 16

¹Nampa a'lampa anjo sikontu umma' Israel battu ri Elim. Na ri tanggala' sampulona allima bulang makarua le'ba'namo nabokoi ke'nanga Mesir, battumi ke'nanga mange ri parang lompo niarenga Sin, niaka ri alla'na Elim siagang Moncong Sinai.

²Anjoreng ri parang lompoa anjo, a'moro-moro ngasemmi ke'nanga mae ri Musa siagang Harun.

³Nakana ke'nanga, “Bajikangngangi ebara' angkana matemi ikambe nibuno ri Batara ri butta Mesir. Anjoreng kaminang sike'de'na akkullei ikambe ammempo angnganre dageng siagang roti sa'genna bassoro' ikambe. Mingka ikau sipa'rua nuerangi ikambe mae anrinni sollanna mate cipuru' ngaseng ikambe anrinni.”

⁴ Nakanamo Batara ri Musa, “Kamma-kamma anne lappaturungA' kanre alla'bi-la'bi rapang bosi untu' ikau ngaseng. Tunggala' allo musti appasse'reko kanre untu' siganna'na nukanre siallo. Kammaminjo bateKu ero' anso'ri ummakKu, sollanna akkulle Kuasseng angkana apaka ma'nassa mannuruki tojenji ke'nanga ri sikamma parentaKu yareka tena.

⁵Ri maka annanna alloa musti appasse'rei ke'nanga kanre a'lappi rua jaina.”

⁶Jari nakanamo Musa siagang Harun mae ri sikontu tu Israel, “Anne karuenga lanuassengi angkanaya KalenNa Batara angngerangko assulu' battu ri Mesir.

⁷Ammuko lanucini' ngasengi singara' kahaderanNa Batara. Nalangngereki Batara angkanaya larro-larro ngasengko mae ri Ia; iyo, Batara nukalarroi, nasaba' anne ikambe poro parentaNaji nagaukang ikambe.

⁸LaNasareko Batara dageng punna karueng, siagang roti punna bari'basa' sa'gennu bassoro', lanri Nalangngere'mi Batara angkana a'larro-larro ngasengko ri Ia. Sitojenna punna a'larro-larroko mae ri kambe, Batara nukalarroi.”

⁹Nampa nakanamo Musa mae ri Harun, “Suro ngasengi ke'nanga battu andallekang ri Batara, nasaba' Nalangngereki ke'nanga a'moro-moro.”

¹⁰Lalang a'bicarana Harun mae ri yangasenna ke'nanga, accini'mi ke'nanga mae ri parang lompoa na ti'ring nacini'mi ke'nanga cayaNa Batara lalang ri rammanga.

¹¹Nakanamo Batara ri Musa,

¹²“Kulangngereki pa'moro-morona ke'nanga tu Israel. Pauammi ke'nanga angkana punna karueng langgappami ke'nanga dageng, siagang punna bari'basa' langnganrei ke'nanga roti sa'genna bassoro'. Jari lanaassemmi ke'nanga angkanaya iNakkemi Batara, Allata'alana ke'nanga.”

¹³Ri wattunna karueng battumi jangang-jangang puroa sa'genna sanna' jaina na natongko' sikontu pakkemaanna ke'nanga, siagang punna bari'basa' naummi saliuka ri tammulilina pakkemaanga.

¹⁴Ri wattunna nai'mo anjo saliuka, sikali nia'mo nicini' ri tompo'na anjo parang lompoa apa-apa kamma sissi' alusu'.

¹⁵ Wattunna nacini' tu Israel anjo kammaya, tanaassengai ke'nanga angkana apa anjo. Jari massing sikuta'nammi ke'nanga angkana, “Apa anjo?” Nakanamo Musa ri ke'nanga, “Iaminjo kanre Napassareanga Batara mae ri kau ngaseng.

¹⁶Naparentakangi Batara sollanna massing angngalle taua situru' massing naparalluanga, iamintu ruang litere' untu' tasse're anggota kaluarga.”

¹⁷Kammaminjo nagaukang tu Israel; mingka nia' appasse're la'bi ri ruaya litere' untu' sitau na nia' todong kurang.

¹⁸ Ri wattunna nalitere' ke'nanga, a'nassami angkanaya tau jaia napasse're tena nakala'biang, siagang tau sike'deka napasse're tena nakakurangang. Massing appasse'rei ke'nanga situru' siapa jaina naparalluanga.

¹⁹Nakana Musa ri ke'nanga, “Manna inai takkulleai naboli' anjo kanrea manna sike'de' untu' ammuko.”

²⁰Mingka nia' siapa are tau ri ke'nanga tanajampangiai kananna Musa. Kamma tonji naboli'na sipa'gang anjo kanrea. Ammukona, olokammi siagang botto'mi anjo kanrea; jari larromi Musa mae ri ke'nanga.

²¹Tunggala' bari'basa' napasse'remi ke'nanga anjo kanrea naparallukanga ke'nanga; napunna appakkaramulamo bambang alloa, anjo kanre tassesaya ri anjo buttaya assolommi.

²²Ri makaannanna alloa napasse'remi ke'nanga anjo kanrea a'lappi rua jaina, iamintu patang litere' untu' sitau. Sikontu pamimpinna ke'nanga battumi ampaui anjo passalaka mae ri Musa.

²³ Nakanamo Musa mae ri ke'nanga, “Iaminne parentaNa Batara: Ammuko iamintu allo le'ba' nisa'la' untu' ammari-mari, allo Pammari-mariang, allo nisa'laka nanipassareang mae ri Batara. Apa eroka nulangga anne alloa, langga memammi, siagang apa eroka nupallu, pallu memammi. Apa la'bia untu' kaparalluang anne alloa, sa'laki siagang boliki untu' ammuko.”

²⁴Jari naboli'mi ke'nanga anjo kanre alla'bia untu' ammuko situru' Naparentakanga Musa; anjo kanrea tena na'jari bari siagang tena naolokang.

²⁵Nakanamo Musa, “Iaminne kanrenu untu' anne alloa, saba' anne alloa iamintu Allo Pammari-mariang, allo pammari-mariang untu' ampakalompoi Batara; siagang tena nukkulle anggappa kanre kammaya anjo pantaranganna kemanu, manna sike'de'.

²⁶Annang allo sallona nupasse're untu' kanrenu, mingka allo makatujua iamintu allo pammari-mariang, siagang tena kanre lanaung ri anjo alloa.”

²⁷Ri makatujuna alloa nia' siapa are tu Israel ero' appasse're kanre, mingka tena apa-apa nagappa ke'nanga.

²⁸Nakanamo Batara mae ri Musa, “Siapapi sallonu taeroka mannuruki ri sikamma parentaKu?

²⁹U'rangi angkanaya Kusareko wattu siallo untu' ammari-mari. Iaminjo saba'na naKusareko kanre anggannaka untu' ruangallo ri makaannanna alloa. Ri makatujuna alloa yangasenna taua musti ammantangi ri balla', takkulleai assulu'.”

³⁰Lanri kammana minjo natanjamaya ke'nanga ri makatujuna alloa.

³¹ Anjo kanrea naarengi tu Israel manna. Tanja'na kammai lisere'-lisere' ca'di, keboki, nakasia'na kammai kanrejawa ammakea je'ne' bani.

³²Nakana Musa, “Nasuroki' Batara angngalle kira-kira rua litere' manna untu' nibolikang jari-jarita, sollanna akkulle nacini' ke'nanga anjo kanre Napassareanga Batara mae ri katte ri parang lompoa, ri wattunta Naerang assulu' battu ri Mesir.”

³³ Nakana Musa ri Harun, “Angngalleko se're uring, appantamakko kira-kira rua litere' manna nampa nupadongko' ri dallekanNa Batara untu' nibolikang jari-jarita.”

³⁴Jari napadongko'mi Harun anjo uringa ri dallekanna Patti Parjanjianga untu' niboli' situru' parentaNa Batara mae ri Musa.

³⁵ Anjo mannaya a'jari kanrena tu Israel patampulo taung ribokoanganna, sa'genna battu ke'nanga mange ri Kanaan, tampa' pammantangang situlina ke'nanga. (

³⁶Ukkurang biasaya napake taua anjo jammanga, nia' ruampulo litere' bonena.)