Read Makassar Version – KITTA' MATANGKASA KALAPPASSANG 17 Bible Online

KALAPPASSANG 17 - Makassar Version – KITTA' MATANGKASA bible

KALAPPASSANG 17

¹ Nampa a'lampamo bansa Israel ambokoi parang lompo Sin, nampa a'lette'-lette' battu ri se'reang tampa' mange ri tampa' maraenga situru' Naparentakanga Batara. Ri se'reang wattu akkemami ke'nanga ri Rafidim, mingka tena je'ne' inung anjoreng.

²Jari a'moro-moromi ke'nanga ri Musa nakana, “Sarei ikambe je'ne' inung.” Appialimi Musa angkana, “Angngapa nu'moro-moro anso'ri Batara?”

³Mingka sanna' ngaseng turerena ke'nanga siagang tuli a'moro'-moromi ke'nanga ri Musa. Nakana ke'nanga, “Angngapa nuerangi ikambe assulu' ri butta Mesir? Nukellai ikambe siagang ana'-ana'na ikambe kammayatompa olo'-olo'na ikambe mate napakamma turere?”

⁴Jari akkio'mi Musa mae ri Batara, angkana, “Apa musti kugaukang mae ri anne taua? Ciniki, eroki ke'nanga ansambila' batu.”

⁵Nakanamo Batara ri Musa, “Kioki siapa are pamimpinga siagang a'jappa mako siagang ke'nanga, a'jappa riolo ri dallekanna anjo bansaya. Erang tongi takkannu le'baka nupake untu' antunrungi Binanga Nil.

⁶LammentengA' ri dallekannu irate ri se'reang batu lompo ri Moncong Sinai. Tunrungi anjo batua, nampa lassulu' je'neka battu ri anjo batua sollanna akkulle anjo taua angnginung.” Nagaukammi Musa anjo kammaya nisa'bi ri sikamma pamimpinna tu Israel.

⁷Anjo tampaka niarengi Masa, lanri anjorengi ri tampaka tu Israel naso'ri Batara wattunna akkuta'nang ke'nanga angkana, “Apaka Narurungangki' Batara yareka tena?” Anjo tampaka niareng tongi Meriba, lanri anjoremmi ri tampaka akkunrareng tu Israel.

⁸Nampa battumo tu Amalek ambunduki tu Israel ri Rafidim.

⁹Nakanamo Musa ri Yosua, “Pilei siapa are jaina tau untu' ambunduki anjo tu Amalek. Ammuko lammentenga' irate ri coppo'na buluka anta'galaki takkang Nasuro eranga Allata'ala.”

¹⁰Nagaukammi Yosua anjo apa naparentakanga Musa mae ri ia. A'lampami mange ambunduki tu Amalek, nampa Musa, Harun siagang Hur nai'mi ri buluka sa'genna ri coppo'na.

¹¹Lalang naangka'na limanna Musa, ammetai tu Israel. Mingka punna napanaung limanna Musa, tu Amalek ammeta.

¹²Ri wattunna mangngammo Musa, angngallemi Harun siagang Hur se're batu sollanna akkulle Musa ammempo; ammentemmi Harun siagang Hur ri sa'ri kairinna siagang ri sa'ri kananna Musa untu' antumpaki limanna sollanna tuli ta'angka'na nai' sa'genna labu alloa.

¹³Kale'bakkanna nibetami tu Amalek ri Yosua.

¹⁴ Nakanamo Batara ri Musa, “Tulisiki anne passala' pammetanga sollanna tuli niu'rangi. Paui mae ri Yosua angkanaya iNakke ampanraki anjo tu Amalek.”

¹⁵Nampa appaentemmo Musa se're tampa' pakkoro'bangngang na naareng “Batarami Banderaku”.

¹⁶Nakana Musa, “Ta'galaki tinggi-tinggi banderaNa Batara! KalenNa Batara a'bundu' angngewai tu Amalek sa'genna satunggu-tungguna!”