Read Makassar Version – KITTA' MATANGKASA KALAPPASSANG 18 Bible Online

KALAPPASSANG 18 - Makassar Version – KITTA' MATANGKASA bible

KALAPPASSANG 18

¹Yitro, matoanna Musa, imang Midian, nalangngereki kabara'na sikontu apa le'baka Nagaukang Allata'ala untu' Musa siagang bansa Israel, ri wattunna napimping ke'nanga assulu' battu ri pa'rasangang Mesir.

² Jari a'lampami Yitro mange angkunjungi Musa, na naerang todong Zipora, bainenna Musa niaka ija ammantang ri Midian,

³ siagang Gersom na Eliezer, rua ana' bura'nena. Ana' bungasa'na niarengi Gersom lanri nakana Musa, “Inakke tubattu-battua' ri pa'rasanganga”;

⁴ana' makaruaya niarengi Eliezer, lanri nakanana Musa, “Allata'ala nipakalompoa ri boe-boeku le'ba' antulunga' siagang ampasalamaka' sa'gengku tanibunoa ri karaeng Mesir.”

⁵Battumi Yitro siagang bainenna Musa kammayatompa rua ana'na mange ri parang lompoa, tampa'na Musa akkema, ri ampi'na moncong matangkasaka.

⁶Nisaremi kabara' Musa angkanaya niaki ke'nanga battu,

⁷jari assulu'mi Musa mange ambuntuli ke'nanga. Su'ju'mi ri dallekanna Yitro nampa nabau anjo matoanna. Massing sikuta'nammi ke'nanga angkana antekamma kaadaanna ke'nanga, nampa antama' ri kemana Musa.

⁸Nacaritami Musa mae ri matoanna sikontu apa le'baka Nagaukang Batara mae ri Karaeng Mesir siagang sikontu bansaNa untu' ampasalamaki tu Israel. Nacarita tommi mae ri ia ri passala'na sikamma kasukkarang nadallekanga bansa Israel ri tangngana aganga, siagang antekamma bateNa Batara ampasalamaki ke'nanga.

⁹Nalangngere'na ngaseng Yitro sikamma anjo caritaya, sanna'mi rannuna,

¹⁰siagang nakanamo, “Nipujimi Batara le'baka ampasalamakko battu ri limanna Karaeng Mesir siagang ra'ya'na. Nipujimi Batara le'baka allappassangi bansa Israel battu ri nipare' ataya.

¹¹Kamma-kamma anne kuassemmi angkanaya malompoangngangi Batara na sikontu rewataya, lanri yangasenna anjo Nagaukangi ri wattunna tampo sikali tindakanna tu Mesir mae ri tu Israel.”

¹²Nampa angngerang Yitro siapa are koro'bang nitunu siagang koro'bang nipolong, a'jari passare mae ri Allata'ala. Battumi Harun siagang sikontu pamimpinna bansa Israel na sipangnganreang siagang Yitro lalang kahaderanNa Allata'ala.

¹³Ammukona bari'basa' naadelimi Musa siapa are passisala-salang niaka ri tu Israel. Anjo jama-jamang kammaya angngallei wattu appakkaramula battu ri bari'basa' sa'genna bangngi.

¹⁴Nacini'na Yitro anjo sikamma jaina apa nagaukang Musa, akkuta'nammi ri Musa angkana, “Apa-apa ngaseng musti nujama untu' anne bansaya? Apaka musti ikau ngaseng kalennu anjamai anjo sikammaya jaina jama-jamang, sa'genna manna eroka appala' tangara'nu taua, musti ammentengi anrinni ke'nanga battu ri bari'basa' sa'genna bangngi?”

¹⁵Appialimi Musa angkana, “Anjo taua ngaseng battui mae ri nakke untu' ampakkuta'nangngangi ero'Na Allata'ala.

¹⁶Punna nia' passisala-salanna ke'nanga, battui ke'nanga mae ri nakke sollanna kutappuki parkarana ke'nanga, siagang kupauangi ke'nanga sikamma parentaNa siagang hukkung-hukkunNa Allata'ala.”

¹⁷Nakanamo Yitro, “Tabajikai kammaya anjo.

¹⁸Nuballassi kalennu punna kamma anjo batenu, siagang anjo taua nuballassi ngaseng tongi. Jai dudui anjo jamanga untu' se'rea tau.

¹⁹Pilangngeri anne kanangku na Natulungko Allata'ala. Memang bajiki punna nuwakkeli anne bansaya ri dallekanNa Allata'ala siagang nuerang parkarana mae ri dallekanNa.

²⁰Musti nuajaraki ke'nanga situru' sikamma parentaNa Allata'ala siagang nupangngajarrang antekamma nikanaya attallasa' baji' siagang apa musti nagaukang ke'nanga.

²¹Mingka pantaranganna anjo musti ammileko siapa are tu bura'ne cara'deka, nampa nuangka' ke'nanga a'jari pamimping mae ri sisa'bu tau, sibilangngang tau, limampulo tau, siagang sampulo tau. Anjo ke'nanga musti tau malla' siagang mannuruki ri Allata'ala, akkullei nipatappa' siagang taerokai annarima doe' pammuccu'.

²²Suroi ke'nanga a'jari haking mae ri anne bansaya, massing-massing mae ri kalompo'na ke'nanga. Anjo tugasaka musti ta'atoroki batena ke'nanga anggaukangi. Sikamma parkara parallu lompoa akkullei naerang ke'nanga mae ri kau, mingka punna passisala-salang ca'diaja akkullei ke'nanga tommo alle'bakangi. Anjo kammaya akkulleko naringangngi lanri amminawang tongi ke'nanga ampisangi battala'na.

²³Punna kamma anjo nugaukang, siagang Naparentakang Allata'ala anjo passalaka mae ri kau, akkullei nugaukang tugasa'nu, siagang akkullemi taua ammotere' siagang sannang pa'mai'na lanri lintaki nile'bakang parkarana ke'nanga.”

²⁴Naturukimi Musa anjo tangara'na Yitro.

²⁵Ammilemi siapa are tu cara'de' battu ri bansa Israel. Naangka'mi ke'nanga a'jari pamimping mae ri sisa'bu tau, sibilangngang tau, limampulo tau, siagang sampulo tau.

²⁶Nagaukammi tugasa'na ke'nanga salaku haking-haking mae ri bansa Israel. Ia parkara-parkara lompoa naerangi ke'nanga mae ri Musa, mingka passisala-salang ca'dia kalenna tonji ke'nanga alle'bakangi.

²⁷Nampa nalappassammo Musa a'lampa Yitro ammotere' mange ri pa'rasanganna.