Read Makassar Version – KITTA' MATANGKASA KALAPPASSANG 22 Bible Online

KALAPPASSANG 22 - Makassar Version – KITTA' MATANGKASA bible

KALAPPASSANG 22

¹“Inai-nai a'lukka' sapi yareka gimbala' nampa napolong yareka nabalukangi, musti nasambei tassikayua sapi siagang limang kayu sapi, kammayatompa tassikayua gimbala' nasambei siagang patangkayu gimbala'.

²Musti nasambei anjo barang nalukkaka. Punna tena apa-apanna, ia kalenna lanibalukang a'jari ata untu' ansambei anjo barang le'baka nalukka'. Punna sapi anjo barang nalukkaka, yareka keledai, yareka gimbala', nampa nipanggappai anjo taua nattallasa' ija anjo baranga, musti nasambei tassikayua olo'-olo' siagang ruang kayu olo'-olo'. Punna ri wattu bangngina nanijakkala' sitaua palukka' lalang balla', nampa nibuno anjo palukkaka, anjo tau ambunoai tena nasala. Mingka punna allo nakajariang anjo passalaka, anjo tau ambunoai salai.

⁵Inai-nai allambaraki olo'-olo'na a'ruku' ri kokonna yareka ri koko anggoro'na, nampa a'lampa anjo olo'-oloka angkanrei lamung-lamunna tau maraenga, anjo patanna olo'-olo' musti nabayaraki karugianna anjo patanna koko siagang wassele' kaminang bajika battu ri kokonna yareka battu ri koko anggoro' kalenna.

⁶Inai-nai apparinra pepe' ri kokonna nampa a'la'ba' anjo pepeka mae ri kokonna tau maraenga siagang nakanre gandunna taua sa'genna la'busu', baji gandung attimboa yareka kawarrang le'baka nikatto, anjo tau apparinraya pepe' musti a'bayaraki sambe karugiang.

⁷Ebara'na nia' tau assituju ammoli' apa-apa, kammayami a'rupa doe' yareka barang niaka anggaranna. Mingka ri bokoangallo nilukkaki anjo barang nibolika ri balla'na. Punna nigappa palukkaka, musti nabayaraki anjo baranga a'lappi rua.

⁸Mingka punna tanigappaya anjo palukkaka, anjo tau nipammolikia musti nierangi mae ri tampa' ibadaya, nampa musti assumpai anjoreng angkanaya teai ia allukkaki anjo barang nibolika ri ia.

⁹Lalang sikamma passisala-salanga ri passala' pa'barang-barangngang, baji' na'rupa sapi, keledai, gimbala', pakeang, yareka apa-apa mamo tappelaka nampa nigappa ammotere', anjo tau mangakua angkana ia pata musti nierangi mange ri tampa' ibadaya. Anjo tau nikanaya sala ri Allata'ala, musti a'bayaraki a'lappi rua mae ri anjo patanna barang.

¹⁰Ebara'na nia' tau ammarakai keledai, sapi, gimbala', yareka olo'-olo' piara maraengannaya, nampa anjo baranga paranna tau pata. Nampa mate anjo olo'-oloka, yareka lokoki, yareka nirampasaki ri musu, nampa tena tau akkulle ansa'bi.

¹¹Punna kamma anjo passalaka, musti a'lampai anjo taua mange ri tampa' ibadaya nampa assumpa lanri arenNa Batara angkanaya teai ia allukkaki anjo olo'-olo' nipappirannuanga mae ri ia. Punna teai tojeng ia allukkaki, anjo patanna musti antanggongi anjo karugianga, nampa anjo tau ammarakaia tena naparallu a'bayara' sambe karugiang.

¹²Punna tau maraeng allukkaki anjo olo'-oloka, anjo tau ammarakaia musti a'bayaraki sambe karugiang mae ri patanna.

¹³Punna nialle ri olo'-olo' sekke' anjo olo'-olo' piaraya anjo tau ammarakaia musti napappicinikangi sesa buku-bukunna untu' a'jari butti mae ri patanna; tena naparallu a'bayara' sambe karugiang untu' anjo olo'-oloka.

¹⁴Punna nia' tau angnginrang sikayu olo'-olo' nampa loko' yareka mate anjo olo'-oloka ri wattunna tena patanna ri anjo tampa' kajarianga, anjo tau angnginranga musti a'bayaraki sambe karugiang.

¹⁵Mingka punna nia' patanna ri anjo tampaka nakajariang anjo passalaka, anjo tau angnginranga tena naparallu a'bayara' sambe karugiang. Punna anjo olo'-oloka nisewai, sewanami antongkoki karugianna.”

¹⁶ “Inai-nai anynyonyoki sitau tulolo tenayapa bayuanna untu' naagang sikatinroang, musti a'bayaraki doe' panai' untu' pa'buntingang siagang musti nabuntingi anjo bainea.

¹⁷Mingka punna tena nikellai anjo bura'nea ri manggena anjo bainea a'bunting siagang ana'na, anjo bura'nea musti a'bayaraki mae ri manggena anjo bainea doe' pa'buntingang; ia jaina sinjai biasaya nipanai' punna nipala' se'rea tau lolo.

¹⁸ Sikontu baine pabale'-bale' mataya musti nibunoi.

¹⁹ Tau a'gau' bawanga siagang olo'-oloka musti nibunoi.

²⁰ Inai-nai assare koro'bang mae ri rewata-rewata maraenga pantaranganna mae ri Nakke, Batara, musti nihukkung matei.

²¹ Teako anjallakkangi yareka teako a'gau' tena naadele' mae ri bansa maraenga; u'rangi angkanaya ikau riolo bansa maraeng tonjako annompang ri Mesir.

²²Teako bawang-bawangngangi jandaya yareka ana' kukanga.

²³Punna ja'dalakko mae ri ke'nanga, iNakke, Batara lampilangngeri punna akkio' ke'nanga appala' tulung mae ri Nakke.

²⁴INakke lalarro siagang lambunoko lalang bundu', sa'genna a'jari janda bainennu, siagang tena manggena ana'nu.

²⁵ Punna appappinrangko doe' mae ri tu kasi-asia ri bansaKu, teako assingaraki sangkamma tau appappibungaya doe'.

²⁶ Punna nualle jubana parannu tau a'jari passikko' lanri inranna, anjo jubaya musti nupoterangi lalang tenanapa nalabu alloa,

²⁷nasaba' anjo jubaya tena ruanna lanapake untu' angkammuki kalenna. Punna tena nupoterangi mae ri ia, maka apa lanapake a'jari kalimbu' punna tinroi? Punna akkioki mae ri Nakke appala' tulung, laKupilangngeri pakkio'na lanri Kukamaseanna.

²⁸ Teako sumpai Allata'ala, siagang teako tunrai pamimpinna bansanu.

²⁹Ri allo le'baka nipattantu, angngerangko passare mae ri Nakke, iamintu bageang battua ri wassele' gandunnu, je'ne' anggoro'nu siagang minynya' zaitunnu. Passareangi mae ri Nakke ana' bura'ne bungasa'nu,

³⁰kammayatompa sapia siagang gimbalaka, ia uru-urua lassu'. Lappassangi anjo olo'-oloka ammantang ri anronna lalanna tuju allo, nampa ri makasagantujuna alloa passareangi mae ri Nakke.

³¹ Ikau ngasemmi ummakKu; lanri kammana, manna olo'-olo' apa mamo punna nikanrei ri olo'-olo' sekke', takkulleai nukanre dagenna; passareangi anjo dagenga mae ri kongkonga.”