Read Makassar Version – KITTA' MATANGKASA KALAPPASSANG 25 Bible Online

KALAPPASSANG 25 - Makassar Version – KITTA' MATANGKASA bible

KALAPPASSANG 25

¹Nakana Batara ri Musa,

²“Suroi tu Israel angngerang passare mae ri Nakke. Inai-nai ta'gio' atinna, musti angngerangi passare

³a'rupa: bulaeng, pera' siagang tambaga;

⁴kaeng lenang alusu', kaeng wol gau', lame butung siagang eja, kaeng bulu bembe,

⁵kukkulu' gimbala' laki nikasumba ejaya, kukkulu' alusu', kayu akasia,

⁶minynya' untu' lampu, rampa-rampa minynya' upacara siagang untu' dupa mabau',

⁷a'rupa-rupa batu paramata untu' nipabelo-belo ri baju efod siagang pattongko' barambanna Imang Lompoa.

⁸Suroi anjo bansaya appare' se're kema untu' iNakke, sollangKu akkulle ammantang ri tangnga-tangngana ke'nanga.

⁹Anjo kemaya siagang pakkakasa'na musti napareki ke'nanga situru' rancana le'baka Kupicinikiangko.”

¹⁰“Apparekko se're patti battu ri kayu akasia; la'buna 110 sentimetere', sangkara'na siagang tinggina massing-massing 66 sentimetere'.

¹¹Lapisi bageang lalanna siagang bageang pantara'na siagang bulaeng ti'no' siagang papparekangi les battu ri bulaeng.

¹²Untu' kayu pa'bule'na, apparekko appa' ponto bulaeng nampa nupakai' ri appaka bangkenna, ta'ruai ponto ri massing sa'rinna.

¹³Appare' tongko pa'bulekang battu ri kayu akasia na nulapisi' siagang bulaeng,

¹⁴nampa nupantama' anjo kayu pa'buleka antama' ri pontona ri massing sa'rinna anjo pattia.

¹⁵Anjo kayu pa'buleka musti tuli lalanna ri anjo ponto-pontoa, siagang takkulleai nipasulu'.

¹⁶Nampa musti nupadongkoki lalang ri anjo pattia anjo ruaya batu niaka tattulisi' lalang sikamma parenta Kupassareanga mae ri kau.

¹⁷ Papparekangi pattongko' bulaeng ti'no' anjo pattia; la'buna 110 sentimetere' siagang sangkara'na 66 sentimetere'.

¹⁸Apparekko rua malaeka' akka'nyi' battu ri bulaeng de'de',

¹⁹tasse'rei massing ri cappa'na anjo pattia. Anjo ruaya malaeka' akka'nyi' musti nipa'jari se'rei bageang siagang pattongko'na,

²⁰siagang musti nipasidallekangi na takka'rang ka'nyi'na irateanna anjo pattia.

²¹Padongkoki anjo ruaya batu lalang ri anjo pattia siagang patabai anjo pattongko'na irateanganna.

²²AnjorengA' ri tampaka lasibuntulu' siagang ikau; siagang battu rate ri pattongko'na, ri alla'na anjo ruaya malaeka' akka'nyi', laKusareko hukkung-hukkungKu untu' bansa Israel.”

²³“Apparekko se're mejang battu ri kayu akasia; la'buna 88 sentimetere', sangkara'na 44 sentimetere', siagang tinggina 66 sentimetere'.

²⁴Lapisi bulaeng ti'no' siagang patabai les bulaeng ri tammulilina.

²⁵Pareki biring mejang 7,5 sentimetere' siagang sarei passimbang bulaeng tammulilina anjo birinna.

²⁶Apparekko appa' ponto bulaeng nampa nupataba ri appaka panyingkulu' bangkenna, ri ampi'na birinna.

²⁷Anjo pontoa untu' antahangi kayu pa'bule'na sollanna akkulle anjo mejanga nibule'.

²⁸Anjo kayu pa'buleka musti kayu akasia nipare' siagang nilapisi bulaeng.

²⁹Apparekko piring-piring, cangkiri'-cangkiri', bongki-bongki, siagang mangko'-mangko' untu' passare je'ne' anggoro'. Sikontu pakkakasa'na anjo mejanga musti battu ri bulaeng ti'no' ngaseng nipare'.

³⁰ Anjo mejanga musti niboliki ri dallekanna Patti Parjanjianga, siagang musti tuli nia' sadia roti tattala irate ri anjo mejanga.”

³¹“Apparekko bangkeng lampu battu ri bulaeng ti'no'. Pa'lapa'na siagang panna'gallanna musti bulaeng nide'de'; bunga-bunga belo-belona, kammayatompa pucu'na siagang pammantangngang pucu'na musti a'jari se'rei siagang pa'lapa'na siagang panna'gallanna.

³²Anjo panna'gallanna musti nipareki annang tangkenna, tattallu tangke ri massing sa'rinna.

³³Ri tunggala' tangkenna musti nipareki belo-belo a'rupa tallu bunga siagang pucu'na na pammantangngang pucu'na.

³⁴Ri panna'gallanna musti nipareki belo-belo a'rupa appa' bunga siagang pucu'na na pammantangngang pucu'na.

³⁵Irawanganna anjo tunggala' tangkenna musti nipareki se're pucu'.

³⁶Sikontu bangkenna anjo lampua siagang pucu'-pucu'na kammayatompa tangke-tangkenna musti nipareki battu ri sipolong bulaeng ti'no' nide'de'.

³⁷Apparekko tuju lampu ri bangkenna anjo lampua siagang pataba bajiki sa'genna tassioro' mae ri dallekang singara'na.

³⁸Apparekko pakkakasa' untu' antangkasi sumbuna anjo kanjolia nampa pa'dongkokanna bulaeng ti'no' todong nipare'.

³⁹Ammakeko tallumpulo allima kilo battala'na bulaeng untu' ampareki bangkenna anjo lampua siagang sikontu pakkakasa'na.

⁴⁰ Jagai sollanna nipare' anjo lampua situru' conto le'baka Kupicinikiangko irate ri anne monconga.”