Read Makassar Version – KITTA' MATANGKASA KALAPPASSANG 26 Bible Online

KALAPPASSANG 26 - Makassar Version – KITTA' MATANGKASA bible

KALAPPASSANG 26

¹“Apparekko Kema untu' iNakke; ia nupareka iamintu sampulo polong kaeng lenang alusu', nitannungi siagang wol gauka tanja'na, lame butung, siagang eja. Sulangi anjo kaenga siagang gambara' malaeka' akka'nyi'.

²Tunggala' tassipolonga sangkamma ngasengi ukkuranna; la'buna sampulo anrua metere' siagang sangkara'na rua metere'.

³Limam polong kaeng musti nisambungi a'jari se're layara', limam polong pole nipare' kamma tongi anjo,

⁴Apparekko panggentungang battu ri kaeng gau' ri birinna anjo ruaya layara'

⁵ta'limampulo pa'gentungang massing tasse'rea layara'.

⁶Apparekko limampulo pa'gentungang bulaeng untu' ansambungi anjo ruaya layara'.

⁷Untu' pattongko'na anjo Kemaya apparekko sampulo asse're polong kaeng battu ri bulu bembe.

⁸Tunggala' tassipolonga kaeng musti sangkammai ukkuranna; la'buna sampulo antallu metere', na sangkara'na rua metere'.

⁹Limam polong musti nisambungi a'jari se're layara', nampa annang polong maraenganga musti nipare' kamma tongi anjo. Sambungang makaannanga musti nilappa' ruai untu' antongkoki bageang dallekanna Kemaya.

¹⁰Patabai anjo limampuloa pa'gentungang mae ri birinna anjo layara' makase'rea siagang limampuloa pa'gentungang maraenganga ri birinna layara' makaruaya.

¹¹Apparekko limampulo pa'gentungang battu ri tambaga nampa nupakai' mae ri pa'gentunganga sollanna akkulle anjo ruaya layara' a'jari se're, anjari pattongko' Kema.

¹²Bageruanna anjo kaeng alla'bia iami untu' antongkoki bageang ri bokona Kemaya.

¹³La'binna kaenga iamintu limampulo sentimetere' sangkara'na silla'bua anjo Kemaya musti nipakei untu' antongkoki sa'rinna anjo Kemaya.

¹⁴Apparekko rua pattongko' untu' bageang pantara'na anjo Kemaya, se're battu ri kukkulu' gimbala' laki nisarea cura' eja na se'rea pole battu ri kukkulu' alusu'.

¹⁵Papparekangi rangka-rangka anjo Kemaya, ammenteng lambusuka nai' battu ri kayu akasia.

¹⁶Tungga'-tunggala' anjo rangkaya tinggina appa' metere' siagang sangkara'na 66 sentimetere'.

¹⁷Tasse're-se'rea rangka nia' patto' tassipasang, sa'genna akkulle nipasisambung anjo rangka-rangkaya battu ri se'rea mae ri maraenganga.

¹⁸Untu' bageang timboro'na Kemaya apparekko ruampulo rangka,

¹⁹siagang patampulo pa'lapa'na battu ri pera', ta'rua irawanganna tunggala' tasse'rea rangka untu' ruaya patto'na.

²⁰Untu' bageang wara'na anjo Kemaya apparekko ruampulo rangka

²¹siagang patampulo pa'lapa'na battu ri pera', rua irawanganna tasse'rea rangka.

²²Untu' bageang bokona Kemaya biring laukanga, apparekko annang rangka,

²³siagang rua rangka untu' sikamma panyingkulu'na.

²⁴Rangka-rangkana anjo bageang panyingkuluka musti nipasisambungi mae ri bageang bangkenna tulusu' nai' sa'genna bageang iratena. Anjo ruaya rangka appareka panyingkulu'na, musti nipare' kamma tongi anjo.

²⁵Jari yangasenna nia' sagantuju rangka siagang sampulo angngannang pa'lapa' pera', ta'rua irawanganna tasse'rea rangka.

²⁶Apparekko sampulo allima kayu pangngepe' battu ri kayu akasia, lima untu' rangka-rangka ri tasse'rea sa'rinna Kemaya,

²⁷siagang lima untu' sa'ri ba'leangannaya, kammayatompa lima todong untu' sa'ri bageang bokona Kemaya, iamintu sa'ri bageang lau'na.

²⁸Anjo kayu pangngepe' bageang tangngaya musti nipatabai sa'genna bageruanna rangkaya tinggina, battu ri massing cappa'na anjo Kemaya.

²⁹Anjo rangka Kemaya siagang sikamma kayu pangngepe'na musti nulapisi siagang bulaeng. Ponto-ponto untu' pannahanna anjo kayu-kayua musti bulaeng nipare'.

³⁰Paentengi anjo Kemaya situru' rancana le'baka Kupicinikiangko irate ri anne buluka.

³¹Apparekko se're kaeng pintu battu ri lenang alusu', ia nitannunga siagang kaeng wol gau', lame butung siagang eja tanja'na. Sulangi anjo kaenga siagang gambara' malaeka' akka'nyi'.

³²Gentungi anjo kaeng pintua mae ri appa' benteng kayu akasia nilapisika bulaeng siagang pakkai' bulaeng, siagang patabai ri appaka pa'lapa' pera'.

³³ Boliki anjo kaenga irawa ri jijiri'na pakkaika ri pattongko'na Kemaya. Ri bokona anjo kaenga musti nipadongkoki anjo Patti Parjanjiang niaka bonena lalang anjo ruaya batu. Anjo kaenga ansimbangi Kamara' Matangkasaka battu ri Kamara' Kaminang Matangkasaka.

³⁴Padongkoki anjo pattongko'na Patti Parjanjianga irateanna anjo Pattina.

³⁵Mejang passarea musti niboliki ri pantaranna Kamara' Kaminang Matangkasaka ri bageang wara', na bangkeng lampua ri bageang wara' ilalang ri anjo Kemaya.

³⁶Apparekko gordeng pakke'bu' Kema battu ri kaeng lenang alusu' ia nitannunga siagang wol gau', lame butung siagang eja, na nibelo-belo siagang sulang.

³⁷Untu' anjo gordenga musti niparekangi lima benteng battu ri kayu akasia ia nilapisika siagang bulaeng nampa nipasisambung siagang lima pakkai' bulaeng. Apparekko lima pa'lapa' battu ri tambaga untu' anjo sikamma bentenga.”