Read Makassar Version – KITTA' MATANGKASA KALAPPASSANG 27 Bible Online

KALAPPASSANG 27 - Makassar Version – KITTA' MATANGKASA bible

KALAPPASSANG 27

¹“Apparekko se're tampa' pakkoro'bangngang battua ri kayu akasia. Assulapa appaki pare'na; la'buna siagang sangkara'na massing-massing 2,2 metere' na tinggina 1,3 metere'.

²Massing panyingkulu' bageang iratena musti niparekangi tanru'-tanru' a'jari se'rea siagang tampa' pakkoro'bangnganga. Yangasenna musti nilapisi siagang tambaga.

³Apparekko siapa are pamaja', sikopang, mangko'-mangko', garpu-garpu siagang tampa' pepe'. Sikontu anjo pakkakasaka musti tambaga nipare'.

⁴Apparekko anyangngang kawa' battu ri tambaga siagang patabai appa' ponto untu' kayu pa'bule' ri appa' panyingkulu' bageang irawana.

⁵Tinggina anjo anyangngang kawaka musti bageruanna tinggina anjo tampa' pakkoro'bangnganga. Anjo anyangngang kawaka musti nipakaluki ri bageang rawana tampa' pakkoro'bangnganga.

⁶Apparekko rua kayu pa'bule' battu ri kayu akasia nilapisika tambaga,

⁷nampa nupantama' ri ponto-ponto niaka ri rua sa'rinna anjo tampa' pakkoro'bangnganga ri wattunna nibule' anjo tampa' pakkoro'bangnganga.

⁸Anjo tampa' pakkoro'bangnganga papang nupare' ia akkali'bonga bageang lalanna, situru' rancana le'baka Kupicinikiangko irate ri anne buluka.”

⁹“Apparekko paranglakkeng ri tammulilina anjo KemaKu ia nisimbanga siagang layara' battu ri kaeng lenang alusu'. Ri bageang timboro', anjo layaraka la'buna 44 metere',

¹⁰nitahang ri ruampulo benteng tambaga, massing nilapa' ri tambaga, na pakkai'na siagang pa'gentunganna battu ri pera'.

¹¹Kammatommi anjo nupareka ri bageang wara'.

¹²Ri bageang lau', anjo layaraka 22 metere' la'buna, siagang sampulo benteng na sampulo pa'lapa'.

¹³Ri bageang timboro'na, ia niaka pakke'bu'na, la'buna anjo layaraka 22 metere' todong.

¹⁴Ri kairinna siagang ri kananna anjo pakke'buka musti nipataba anjo layaraka, massing-massing 6,6 metere' la'buna, ammake tallu benteng siagang tallu pa'lapa'.

¹⁶Untu' pakke'bu'na musti nipatabai gordeng 9 metere' la'buna, iamintu kaeng lenang alusu' nipare', ia nitannunga siagang wol gau', lame butung siagang eja tanja'na, na nibelo-belo siagang sulang. Untu' antahangi anjo kaeng pintua musti niparekangi appa' benteng siagang appa' pa'lapa'.

¹⁷Sikontu bentenga ri tammulilina anjo paranglakkenga musti nipasiallei tasse'rea mae ri maraenga siagang pakkai' pera'; Anjo pakkai'na musti battu ri pera' nipare' siagang pa'lapa'na battu ri tambaga.

¹⁸Layaraka ri tammulilina anjo paranglakkenga la'buna 44 metere', sangkara'na 22 metere' siagang tinggina 2,2 metere'. Layara'na musti kaeng lenang alusu' nipare' nampa pa'lapa'na tambaga.

¹⁹Sikontu pakkakasa'na anjo lalang ri Kemaya, sikontu patto'na siagang untu' layara'na musti tambaga nipare'.”

²⁰“Suroi tu Israel angngerang minynya' zaitun tenaya campuranna siagang kaminang bajika untu' lampu lalanga ri KemaKu sollanna niparinra nakkulle a'rinra tulusu'.

²¹Harun siagang sikamma ana'na musti angngurusuki anjo lampua battu ri karueng sa'genna bari'basa' ri tampa' kahaderangKu, pantaranna kaeng ta'gentunga ri dallekanna Patti Parjanjianga. Anjo parentaya musti nigaukangi untu' satunggu-tungguna ri tu Israel siagang sikontu jari-jarina.”