Read Makassar Version – KITTA' MATANGKASA KALAPPASSANG 29 Bible Online

KALAPPASSANG 29 - Makassar Version – KITTA' MATANGKASA bible

KALAPPASSANG 29

¹“Kammaminne carana nilanti' Harun siagang ana'-ana'na sollanna akkulle ke'nanga allayaniA' salaku imang. Angngalleko sikayu sapi laki rungkaya siagang ruang kayu gimbala' laki tenaya caca'na.

²Apparekko leokang battu ri tarigu kaminang bajika tenaya nammake pa'gambang. Sipa'gang anjo leokanga musti nipareki roti siagang minynya' zaitun, sipa'gang maraenga tena nammake minynya', nampa la'binna nipareki kanrejawa nisapua siagang minynya'.

³Boliki lalang ri baku' siagang passareangi anjo mae ri Nakke assama siagang koro'bang sapi laki na ruang kayu gimbala' laki.

⁴Suroi Harun siagang ana'-ana'na battu ri pakke'bu' KemaKu siagang natangkasi kalenna.

⁵Pipakei Harun anjo pakeang imanga: kameja, efod, juba antongkokai efodka, pa'lapa' barambang siagang passikko' aya'.

⁶Patabai anjo soro'banga ri ulunna siagang patabai anjo belo-belo bulaeng niaka ta'ukiri', ‘Nisa'laki untu' Batara’, mae ri anjo soro'banga.

⁷Nampa angngalleko minynya' upacara, patiriki nai' ri ulunna siagang minynyaki anjo Harun.

⁸Le'baki anjo, suroi ana'-ana'na battu nampa nupipakei kameja,

⁹siagang passikko' aya', nampa nupataba soro'banga irate ri ulunna ke'nanga. Kammaminjo carana nilanti' Harun siagang ana'-ana'na. Ke'nanga siagang jari-jarina ke'nanga musti allayaniA' salaku imang sa'genna satunggu-tungguna.

¹⁰Nampa musti nuerang anjo sapi lakia mae ri dallekanna KemaKu. Harun siagang ana'-ana'na musti napadongkoki limanna ke'nanga irate ri ulunna anjo sapia.

¹¹Polongi anjo sapi lakia ri dallekangKu, ri pakke'bu'na Kemaya.

¹²Allei sipa'gang cera'na anjo sapia pasapui siagang limannu mae ri tanru'-tanru'na tampa' pakkoro'bangnganga. La'binna anjo ceraka musti nupatiriki ri bageang rawana anjo tampa' pakkoro'bangnganga.

¹³Le'baki anjo allemi sikontu janna niaka antongkoki bone parru'na, bageang kaminang bajika battu ri atenna siagang ruaya lempanna kammayatompa jannana, nampa nupadongko' ngaseng anjo irate ri tampa' pakkoro'bangnganga, nampa natunu a'jari passare mae ri Nakke.

¹⁴Dagenna, kukkulu'na siagang parru' lolona anjo sapi lakia musti nitunui ri pantaranna kemaya. Iaminjo a'jari passare untu' nipammopporanna dosana sikamma imanga.

¹⁵Nampa nualle kalase'renna anjo gimbala' lakia. Harun siagang ana'-ana'na musti napadongkoki limanna ke'nanga irate ri ulunna anjo olo'-oloka.

¹⁶Nampa nupolong anjo gimbalaka. Allei cera'na nampa nupatiri' mae ri appaka sa'rinna anjo tampa' pakkoro'bangnganga.

¹⁷Anjo gimbala' lakia musti nikere'-kereki. Bone parru'na siagang bongganna musti nibissai nampa nipadongko' irate ri ulunna kammayatompa irate ri kere'-kere' maraenganga.

¹⁸ Passareang kabusuki anjo gimbala' lakia irate ri tampa' pakkoro'bangnganga untu' a'jari koro'bang nitunu. Rasanna anjo koro'banga lanapakasannangi pa'maikKu.

¹⁹Nampa nualle pole anjo gimbala' sikayua, iamintu gimbala' laki untu' upacara palantikang. Suroi Harun siagang ana'-ana'na ampadongkoki limanna ke'nanga irate ri ulunna anjo gimbalaka.

²⁰Nampa nupolong anjo gimbala' lakia; allei sike'de' cera'na nampa pasapui ri leko' tolinna bageang ri kananga Harun siagang ana'-ana'na, ri anrong karemeng bangkenna ri kananga siagang ri anrong karemeng lima kananna ke'nanga. Sesanna anjo ceraka musti nupatiriki mae ri appaka sa'rinna tampa' pakkoro'bangnganga.

²¹Allei sike'de' cera' niaka irate ri tampa' pakkoro'bangnganga siagang sike'de' minynya' upacara, nampa nupiracciki Harun siagang ana'-ana'na kammayatompa pakeanna ke'nanga. Kammaminjo carana Harun siagang ana'-ana'na kammayatompa pakeanna ke'nanga nisa'la' untu' iNakke.

²²Allei jannana anjo gimbala' lakia, ingkonna niaka jannana, lapisi' jannana battu ri parru'na, bageang kaminang bajika battu ri atenna, ruaya lempanna siagang jannana, siagang bongga kananna.

²³Battu ri karanjeng rotia le'baka nipassareang mae ri Nakke, allei se're roti massing tassirupaya; sibatu nipareka siagang minynya' zaitun, sibatu tenaya nammake minynya', siagang sibatu kanrejawa.

²⁴Padongko' kabusuki anjo kanre-kanreanga ri limanna Harun siagang ana'-ana'na siagang suroi ke'nanga ampajonjoi mae ri Nakke a'jari passare nipajonjo.

²⁵Nampa allemi anjo rotia battu ri ke'nanga siagang tunui irate ri tampa' pakkoro'bangnganga. Rasanna anjo koro'banga lanapakasannangi pa'maikKu.

²⁶Allei barambanna anjo gimbala' lakia siagang passareangi untu' a'jari koro'bang nipajonjo mae ri Nakke. Nampa iaminjo bageannu.

²⁷Punna upacara palantikang, barambanna siagang bongganna anjo gimbala' lakia nipakea lalang anjo upacaraya musti nipassareangi a'jari passare nipajonjo mae ri Nakke siagang nisa'laki untu' sikamma imanga.

²⁸Iaminne kaputusangKu tenaya nakkulle nipinra: Ri wattunna battu ummakKu ampassareangi anjo koro'bang passiamakkanga, barambanna siagang bongganna anjo olo'-oloka iami bageanna sikamma imanga. Iaminjo passarena ummakKu untu' iNakke.

²⁹Pakeang ibadana Harun musti nasossorangi mae ri ana'-ana'na, sollanna akkulle napake ke'nanga ri wattunna nilanti'.

³⁰Ana'na Harun ansambeangai manggena a'jari imang siagang antamaka ri KemaKu untu' anggaukangi ibadana ri Kamara' Matangkasaka, musti napakei anjo pakeanga tuju allo sallona.

³¹Allei anjo dagenna gimbala' laki nipakea lalang upacara palantikanna Harun siagang ana'-ana'na nampa nupallu anjo dagenga ri se'rea tampa' matangkasa'.

³²Anjo dagenga musti nakanrei ke'nanga ri pakke'bu' KemaKu siagang sesa roti niaka ri bakuka.

³³Musti nakanrei ke'nanga kanre nikoro'bangkanga lalang ri upacara pammopporang dosa ri wattunna palantikang. Imangaji bawang akkulle angkanrei kanre le'baka nisa'la' untu' iNakke.

³⁴Punna ammukona bari'basa' anjo dagenga yareka anjo rotia tassesa iji, anjo sesana musti nitunui sa'genna la'busu', siagang takkulleai nikanre lanri le'ba'mi nisa'la'.

³⁵Anjo upacara palantikanna Harun siagang ana'-ana'na musti tuju alloi nigaukang, kamma le'baka Kuparentakang mae ri kau.

³⁶Tunggala' allo musti nipassareangi sikayu sapi laki untu' nipammopporanna dosaya. Kammaminjo lanrinna, iamintu lanri anjo koro'banga nanipakatangkasa' anjo tampa' pakkoro'bangnganga. Nampa musti numinynyaki anjo tampa' pakkoro'bangnganga siagang minynya' zaitun sollanna nisa'la' untu' iNakke.

³⁷Gaukangi anjo kammaya tunggala' allo lalang tuju allo sallona. Jari kabusu'na anjo tampa' pakkoro'bangnganga a'jari matangkasa'mi; apa-apa mamo anseroai anjo tampa' pakkoro'bangnganga musti nipassareangi mae ri Batara, siagang inai-nai anseroi, lanitujui ri bala lanri kagassingang matangkasa'na.”

³⁸“Tunggala' allo untu' satunggu-tungguna irate ri anjo tampa' pakkoro'bangnganga musti nikoro'bangkangi ruang kayu gimbala' umuru' sitaunga.

³⁹Sikayu untu' passare bari'basa', na sikayu untu' passare karueng.

⁴⁰Siagang anjo ana' gimbala' untu' passare bari'basaka, musti nipassareang tongi se're kilo battala'na tarigu kaminang bajika, ia nipasileoka siagang silitere' minynya' zaitun tenaya campuranna. Pantaranganna anjo nipassareang tongi silitere' je'ne' anggoro'.

⁴¹Nampa anjo ana' gimbala' passare untu' karuenga, musti kamma tongi anjo batena nikoro'bangkang, nipasiagang labu', minynya' zaitun siagang je'ne' anggoro'. Anjo rasanna koro'bang nitunua napakasannangi nyawaKu.

⁴²Nampa pole untu' tunggala' jammang, anjo koro'bang nitunua musti nipassareangi ri dallekangKu ri pakke'bu' KemaKu. AnjoremMa' lasibuntulu' siagang ummakKu siagang a'bicara mae ri kau.

⁴³AnjorengA' lasibuntulu' siagang bansa Israel, na cayana kahaderangKu lampa'jari matangkasaki anjo tampaka.

⁴⁴LaKupa'jari matangkasaki anjo kemaya siagang tampa' pakkoro'bangnganga. Harun siagang ana'-ana'na laKusa'laki battu ri tau maraengannaya sollanna nalayaniA' ke'nanga salaku imang.

⁴⁵LammantangA' ri tangnga-tangngana bansa Israel, siagang iNakke a'jari Allata'alana ke'nanga.

⁴⁶Lanaassengi ke'nanga angkana iNakkemi Karaeng Allata'alana ke'nanga, ia angngerangai ke'nanga assulu' battu ri Mesir, sollangKu akkulle ammantang ri tangnga-tangngana ke'nanga. INakke Karaeng Allata'alana ke'nanga.”