Read Makassar Version – KITTA' MATANGKASA KALAPPASSANG 30 Bible Online

KALAPPASSANG 30 - Makassar Version – KITTA' MATANGKASA bible

KALAPPASSANG 30

¹Nakanamo pole Batara ri Musa, “Apparekko battu ri kayu akasia se're tampa' pattunuang dupa.

²Anjo pattunuang dupaya musti appasagi pare'na; la'buna siagang sangkara'na massing 45 sentimetere', na tinggina 90 sentimetere'. Ri appa' panyingkulu'na apparekko tanru'-tanru' assisambunga siagang anjo tampa' pa'dupanga.

³Bageang ratena siagang appa' sa'rinna kammayatompa sikamma tanru'-tanru'na musti nilapisiki siagang bulaeng ti'no' siagang niles bulaeng ri tammulilina.

⁴Apparekko rua ponto irawanganna anjo leska ri ruaya sa'rinna untu' antahangi kayu pa'bule'na anjo tampa' pa'dupanga.

⁵Anjo pa'bulekanga musti kayu akasia nupare' nampa nulapisi' siagang bulaeng.

⁶Padongkoki anjo tampa' pa'dupanga ri bageang pantara'na kaeng niaka ri dallekanna Patti Parjanjianga, iamintu ri tampa' laKupassibuntulia siagang ikau.

⁷Tunggala' bari'basa' ri wattunna battu Harun untu' appasadia lampu, musti natunui dupa mabauka rasanna irate ri anjo pattunuang dupaya.

⁸Anjo kammaya musti nagaukang tongi ri wattu naparinrana lampua ri wattu karuenga. Anjo passare dupaya musti nigaukangi situlusu'na sa'genna satunggu-tungguna.

⁹Teako assarei dupa nipappisangkanga irate ri anjo tampa' pattunuang dupaya, kammayatompa koro'bang olo'-olo' yareka apa-apa nipatala ia nipappisangkanga; tea tongko appatiriki je'ne' anggoro' irateanna.

¹⁰Tassikali sitaung Harun musti nagaukangi upacara annangkasi tampa' pattunuang dupa; carana iamintu napiracciki anjo appaka tanru'na siagang cera'na anjo olo'-olo' nikoro'bangkanga untu' nipammopporanna dosaya. Anjo kammaya musti nigaukangi tunggala' taung sa'genna satunggu-tungguna. Anjo tampa' pattunuang dupaya musti tangkasa' kabusuki siagang nisa'laki untu' iNakke.”

¹¹Nakana Batara ri Musa,

¹²“Ri wattunna nibilang bansa Israel, tunggala' tu bura'nea musti a'bayaraki mae ri Nakke, iamintu doe' pappasulu' untu' kalenna sollanna tena natujui bala ri wattunna nibilang ke'nanga.

¹³ Tunggala' tau amminawanga nibilang lalang anjo pammilangnganga, musti a'bayaraki situru' anggaranna doeka ri KemaKu, untu' a'jari sumbangang nisa'laka untu' iNakke.

¹⁴Sikamma tau nibilanga lalang anjo pammilangnganga, iamintu sikamma bura'ne narapikamo umuru'na ruampulo taung yareka la'bi, musti assarei anjo sumbangang nisa'laka.

¹⁵Tau kalumanynyanga takkulleai a'bayara' la'bi siagang tau kasi-asia takkulleai a'bayara' kurang ri wattunna nabayara' ke'nanga anjo doe' pappasuluka untu' kalenna.

¹⁶Pa'rappungi anjo doeka battu ri bansa Israel, siagang pakei untu' kaparalluang ibadaya lalang ri KemaKu. Yangasenna anjo doeka a'jari pappasulu' untu' kalenna ke'nanga, siagang latuli Kuu'rangi untu' anjagai ke'nanga.”

¹⁷Nakana Batara ri Musa,

¹⁸ “Apparekko se're ba' battu ri tambaga na dapara'na tambaga todong. Boliki anjo baka ri alla'na Kemaya siagang tampa' pakkoro'bangnganga, nampa nubonei je'ne'.

¹⁹Anjo je'neka untu' Harun siagang ana'-ana'na sollanna akkulle nabissai limanna siagang bangkenna ke'nanga.

²⁰Ri tenanapa nantama' ri Kemaya yareka nareppesi tampa' pakkoro'bangnganga untu' angngerang koro'bang nitunu. Musti nagaukangi anjo kammaya sollanna tena nibunoi ke'nanga. Anjo paratoranga musti nituruki ri ke'nanga siagang jari-jarina ke'nanga sa'genna satunggu-tungguna.”

²² Nakana Batara ri Musa,

²³“Angngalleko rampa-rampa kaminang baji', annang kilo mur assolonga, tallu kilo kayu te'ne, tallu kilo ta'bu bau',

²⁴siagang annang kilo kayu teja. Yangasenna anjo musti nitimbangi situru' timbangang niaka nipake ri KemaKu. Tambai appa' litere' minynya' zaitun,

²⁵siagang pareki minynya' untu' upacara, ia nileoka sangkamma minynya' mabau'.

²⁶Pakei anjo campuranga untu' amminynyaki KemaKu, Patti Parjanjianga,

²⁷mejanga siagang sikamma pakkakasa'na, bangkeng lampua siagang pakkakasa'na, tampa' pattunuang dupaya,

²⁸tampa' pakkoro'bangngang untu' koro'bang nitunua siagang sikontu pakkakasa'na, siagang ba' je'neka na dapara'na.

²⁹Kammaminjo carana musti nusa'la' sikamma anjo barang-baranga untu' iNakke, sollanna a'jari matangkasa' kabusu'. Apa-apa mamo anseroi anjo tampa' pakkoro'bangnganga musti nipassareangi mae ri Batara; siagang inai-nai anseroi anjo tampa' pakkoro'bangnganga lanitujui ri bala lanri kagassingang matangkasa'na.

³⁰Minynyaki tongi Harun siagang ana'-ana'na sollanna nilanti' ke'nanga a'jari imang untu' allayaniA'.

³¹Paui mae ri bansa Israel angkanaya sa'genna satunggu-tungguna anjo minynya' upacaraya nisa'laki untu' iNakke bawang.

³²Anjo minynyaka takkulleai nipatiri' mae ri tau biasaya. Teako appareki minynya' kammaya anjo na campurang kamma todong anjo nupake. Anjo minynyaka matangkasaki, siagang musti nipareki barang matangkasa'.

³³Tau appareka minynya' kamma anjo, yareka napakei untu' tau teai imang, tenamo nalanibilang anggota ummakKu.”

³⁴Nakana Batara ri Musa, “Angngalleko a'rupa-rupa rampa ia sangkammaya jaina, iamintu gatta damara', bi'bi' lokan, gatta rasamala siagang kamanynyang tenaya campuranna.

³⁵Pake kabusuki anjo untu' appare' campurang kamanynyang sannaka mabau'na. Tambai ce'la sollanna tuli baji'na anjo kamanynyanga nakkulle nipake untu' iNakke.

³⁶Anjo kamanynyanga musti nidengkai sipa'gang sa'genna alusu'. Erangi anjo mae ri KemaKu nampa nupakioro' ri dallekanna Patti Parjanjianga. Anjo kamanynyanga musti nipare' kammai barang matangkasa', ia nisa'laka untu' iNakke. Teako appareki kamanynyang ia nicampuru' kammaya anjo untu' kalennu.

³⁸Inai-nai appare' bau'-baukang kammaya anjo, tenamo nanibilang anggota ummakKu.”