Read Makassar Version – KITTA' MATANGKASA KALAPPASSANG 31 Bible Online

KALAPPASSANG 31 - Makassar Version – KITTA' MATANGKASA bible

KALAPPASSANG 31

¹Nakana Batara ri Musa,

²“Kupilemi Bezaleel ana'na Uri, cucunna Hur battu ri suku Yehuda,

³siagang Kusaremi kakoasang. Kusarei pangngassengang, kacara'dekang siagang pakkulle mae ri sangka' rupaya kacara'dekang:

⁴untu' appare' rancana na tau cara'dekaji bawang akkulle anggaukangi; battu ri bulaeng napare', pera' siagang tambaga;

⁵untu' angkantisiki batu paramata eroka nipare' belo-belo; untu' angngukiriki kayua siagang sikamma belo-belo kayu maraengannaya.

⁶Oholiab, ana'na Ahisamakh battu ri suku Dan, Kupile tommi untu' ambantui Bezaleel. Kusare tongi kacara'dekang lompo sikamma tukang-tukang cara'deka, sollanna akkulle napare' ke'nanga sikamma apa Kusuro pareka:

⁷KemaKu, Patti Parjanjiang siagang pattongko'na, sikontu pakkakasa' Kemaya,

⁸iamintu mejanga siagang pakkakasa'na, bangkeng lampu nipareka battu ri bulaeng ti'no' siagang pakkakasa'na tampa' pattunuang dupaya,

⁹tampa' koro'bang nitunua siagang sikontu pakkakasa'na, ba' je'ne' siagang dapara'na,

¹⁰pakeang ibada untu' Harun siagang ana'-ana'na, ia mustia napake ke'nanga punna nagaukang tugasa'na ke'nanga salaku imang,

¹¹minynya' upacara, siagang kamanynyang mabau' untu' Kamara' Matangkasaka. Yangasenna anjo musti napareki ke'nanga situru' apa Kupauangako.”

¹²Naparentakangi Batara ri Musa

¹³untu' ampa'la'bangi napau mae ri bansa Israel, angkana, “Pakalompoi Allo Pammari-marianga, iamintu allo le'baka Kupattantu a'jari allo pammari-mariang. Sa'genna satunggu-tungguna anjo alloa a'jari pappiu'rangi mae ri kau siagang iNakke, sollanna nuasseng angkana iNakke Batara, kammayatompa angkanaya le'ba' mako Kupa'jari bansa KalengKu.

¹⁴ Musti nupakalompoi anjo Allo Pammari-marianga a'jari allo matangkasa'. Kusareko annang allo untu' anjama, mingka allo makatujua iami allo lompo nisa'laka untu' iNakke. Inai-nai tena napakalompoi, mingka anjamai ri anjo alloa, musti nihukkung matei.

¹⁶Bansa Israel musti napakalompoi anjo alloa sa'genna jari-jarina salaku pammatei parjanjiang.

¹⁷ Anjo alloa iami a'jari pappiu'rangi tamattappu' ri bansa Israel siagang iNakke, lanri iNakke, Batara, le'ba' ampa'jari langika siagang buttaya lalang annang allo sallona, na ri makatujuna alloa ammariMa' anjama nampa ammari-mari.”

¹⁸Le'baki a'bicara siagang Musa irate ri Moncong Sinai, Napassareammi Allata'ala anjo ruaya batu le'baka Napannulisi Allata'ala siagang sikamma parentaNa.