Read Makassar Version – KITTA' MATANGKASA KALAPPASSANG 32 Bible Online

KALAPPASSANG 32 - Makassar Version – KITTA' MATANGKASA bible

KALAPPASSANG 32

¹ Ri wattunna nacini' bansa Israel angkanaya sallo dudumi Musa natanaungapa ammotere' Musa battu ri monconga, mingka tuli ammantanna rate, battumi ke'nanga allipungi Harun na nakana ri ia, “Taniassengai angkana apa kajariang ri Musa, anjo tau angngerangaki' assulu' battu ri Mesir; jari papparekammi ikambe se're rewata akkullea ampimpingi ikambe.”

²Nakanamo Harun ri ke'nanga, “La'gasa' ngasengi sikamma anting-anting bulaeng niaka napake sikamma tubai'-bainenu siagang ana'-ana'nu nampa nuerang mae ri nakke.”

³Jari massing nala'gasa' ngasemmi anting-anting bulaenna ke'nanga nampa naerang mae ri Harun.

⁴ Naallemi Harun anjo sikamma anting-antinga, nampa napasolong nampa napatiri' antama' ri katarang nappare' se're patung sapi. Nakanamo anjo bansaya, “He, Israel iaminne rewatanta, ia angngantarakki' assulu' battu ri Mesir!”

⁵Nampa appaenteng Harun se're tampa' pakkoro'bangngang ri dallekanna anjo sapi bulaenga nampa napa'la'bang napau angkana, “Ammuko nia' passua'-suarrang untu' ampakalompoi Batara.”

⁶ Ammukona bari'basa' dudu, angngerammi tu Israel pirangkayu are olo'-olo' untu' a'jari koro'bang nitunu, na pirangkayu are pole untu' koro'bang passiamakkang. Ammempomi ke'nanga angnganre siagang angnginung, nampa ammenteng untu' assannang-sannang.

⁷Jari Nakanamo Batara ri Musa, “Naungko linta', saba' anjo bansa nupimpinga assulu' battu ri Mesir a'gau' ja'dala'mi.

⁸Ammengkami ke'nanga battu ri parenta-parentaKu. Appareki ke'nanga patung sapi bulaeng, nampa nasomba siagang nasare passare koro'bang. Nakana ke'nanga, iaminjo rewata angngerangai ke'nanga assulu' battu ri Mesir.

⁹Kuassengi angkanaya anjo bansaya sanna' kapala batuna.

¹⁰Teako coba-cobai anghalangiA'. LarroA' ri ke'nanga siagang erokKa' angngancuruki ke'nanga. Mingka ikau siagang jari-jarinu laKupa'jari se're bansa malompo.”

¹¹ Napala'mi Musa mae ri Karaeng Allata'alana, nakana, “O, Batara, angngapa namusti kamma anjo Kigaukang mae ri ke'nanga? Sai iKatte ampasalamaki ke'nanga battu ri Mesir siagang kakoasanTa na kagassingang lompoTa?

¹²Punna Kiancuruki ke'nanga, lanakanamo tu Mesirka angkana Kipimpingi anjo bansaya assulu' battu ri Mesir sollanna akkulle Kibuno ke'nanga ri monconga siagang Kiancuru' taba sikali ke'nanga. TeaKi' appakammai, o Batara; Kipinra laloi anjo pattujunTa ero' ancilakai anjo bansaya.

¹³ Kiu'rangi sikamma atanTa Abraham, Ishak siagang Yakub. Kiu'rangi angkanaya assumpaKi' a'janji untu' assarei ke'nanga jari-jari rapang bintoeng ri langi' jaina, kammayatompa angkanaya sikontu anjo butta Kipa'janjianga lanapatangi jari-jarina ke'nanga sa'genna satunggu-tungguna.”

¹⁴Jari Napinrami Batara pattujunNa siagang ta'jariami Nagaukang anjo bala laNapabattua mae ri anjo bansaya.

¹⁵Naummi ammotere' Musa battu ri anjo monconga na naerang anjo ruaya batu niaka tattulisi' lalang sikamma parentaNa Allata'ala.

¹⁶KalenNa Allata'ala ampareki anjo batua siagang angngukiriki lalang sikamma parentaNa.

¹⁷Lalang a'jappana naung, nalangngere'mi Yosua ammarrang-marrang tu Israel. Nakanamo ri Musa, “Nia' karicuang pa'bundukang ri kemaya.”

¹⁸Nakanamo Musa, “Kamma nilangngere' teai gora pammetang yareka gora nibeta; anjo sa'ra tau akkelong.”

¹⁹A'reppese'namo Musa mae ri anjo pakkemaanga, nacini'mi anjo sapi bulaenga siagang tau sitabanga a'joge'-joge'; sanna'mi larrona. Anjoreng memanji, iamintu ri bangkenna anjo monconga, napatappasa' anjo batu naeranga sa'genna ancuru' tassimbung-simbung.

²⁰Nampa naalle anjo patung sapi bate pare'na anjo tu Israelka, na napasolong, nadengka sa'genna alusu' sangkamma limbu'bu', nampa nacampuru' siagang je'ne'. Nampa nasuro tu Israelka angnginungi.

²¹Nakanamo ri Harun, “Apa nagaukang ke'nanga mae ri kau sa'genna nulappassang ke'nanga doraka lompo?”

²²Appialimi Harun angkana, “Teako larroi ri nakke; baji' nuassenna ke'nanga antekamma lompona pattujunna ke'nanga anne untu' a'gau' ja'dala'.

²³Nakana ke'nanga ri nakke, ‘Taniassengai angkana apa kajariang ri Musa, anjo tau angngerangaki' assulu' battu ri Mesir; jari papparekammi ikambe rewata akkullea ampimpingi ikambe.’

²⁴Kusuromi ke'nanga ampassareangi belo-belo bulaenna, nampa napassareammo ke'nanga ri nakke. Kabusu'na anjo belo-belo bulaenga kupantamaki ri pepeka, nampa a'jarimo anne sapia!”

²⁵Nasadarimi Musa angkanaya nabalang parekangi Harun anjo bansa Israel rapang jarang lappasaka battu ri barana, sa'genna nikakkalimo ke'nanga ri musu-musunna ke'nanga.

²⁶Jari ammentemmi ri dallekanna pakke'bu' lompona kemaya nampa a'gora angkana, “Inai-nai agang mae ri Batara musti battui mae anrinni!” Jari battumi suku Lewi angkulilingi Musa;

²⁷na nakanamo Musa ri ke'nanga, “Karaeng Allata'alana Israel amparentakangi mae ri kau ngaseng untu' ambi'buki pa'dannu nampa a'jappa allalo ri anne pakkemaanga, appakkaramula battu ri anne pakke'bu' lompoa sa'genna mange ri pakke'bu' lompo maraengannaya, nampa nubuno sikamma sari'battannu, sikamma sahaba'nu siagang sikamma siampi' balla'nu.”

²⁸Nagaukammi suku Lewi anjo parentaya; anjo alloa nia' kira-kira tallussa'bu tau mate nibuno.

²⁹Nakana Musa mae ri suku Lewi, “Anne alloa nusa'la'mi kalennu untu' a'jari imang allayaniai Batara lanri nubunomi ana'-anaka siagang sikamma sari'battannu; jari Nasare mako barakka'Na Batara.”

³⁰Ammukona nakanamo Musa ri anjo bansaya, “Ikau doraka lompo ngaseng mako. Mingka kamma-kamma anne eroka' nai' poleang ri monconga untu' andallekang ri Batara; dasi-dasi na Napammopporanga' siagang Napammopporangi dosa-dosanu.”

³¹Nampa a'lampa poleammo Musa andallekang ri Batara, na nakana, “Anjo bansaya le'ba'mi a'gau' dosa lompo. Appareki ke'nanga rewata battu ri bulaeng.

³² Poro Kipammopporang laloi dosana ke'nanga; punna tena, lu'lu'mi arengku battu kitta'na sikamma tau attallasaka.”

³³Appialimi Batara angkana, “Tau dorakayaji bawang mae ri Nakke laKulu'lu' arenna battu ri anjo kittaka.

³⁴Kamma-kamma anne a'lampamako, nampa nuerang anjo ke'nanga mange ri tampa' le'baka Kupau mae ri kau. MalaekakKu lanrurungangko, mingka nia' se're wattu sallang na narapi' wattunna laKuhukkung ke'nanga lanri dosa-dosana ke'nanga.”

³⁵Nampa Napabattumo Batara balaya mae ri sikamma anjo taua, lanri napassana Harun ampareki anjo patung sapi bulaenga.