Read Makassar Version – KITTA' MATANGKASA KALAPPASSANG 36 Bible Online

KALAPPASSANG 36 - Makassar Version – KITTA' MATANGKASA bible

KALAPPASSANG 36

¹Bezaleel, Aholiab, siagang sikontu pajama-jama alusuka anggappai kacara'dekang siagang kaporeang battu ri Batara; naassengi ke'nanga antekamma batena nigaukang anjo jama-jamang niparalluanga ampareki KemaNa Batara. Sikontu anjo apa napareka ke'nanga musti situruki siagang apa le'baka Naparentakang Batara.”

²Nakio'mi Musa anjo Bezaleel, Aholiab siagang sikontu tau anggappaya kacara'dekang battu ri Batara siagang eroka ambantu, nampa nasuro ke'nanga ampakaramulai anjo jamanga.

³Napassareammi Musa mae ri ke'nanga anjo sikontu apa napassareanga tu Israel untu' ambangungi KemaNa Batara. Mingka tulusu' angngeranna ija bansa Israel passare tunggala' bari'basa' mae ri Musa.

⁴Nampa a'laporo'mo mae ri Musa anjo sikamma tau anjamaya angkana, “La'bimi anjo bahang-bahang nasumbangkanga taua untu' pambangunanna anjo jamang Naparentakanga Batara.”

⁶Jari napa'la'bammi napau Musa ri sikontu kemaya angkanaya ganna'mi anjo sumbanganga untu' KemaNa Batara; jari tenamo nangngerang pole apa-apa taua.

⁷Alla'bi anjo bahang-bahang le'baka nasumbangkang ke'nanga untu' ampa'le'baki anjo sikontu jama-jamanga.

⁸Nampa kaminang cara'deka ri sikamma anjo pajamaya napare'mi anjo KemaNa Batara. Anjo Kemaya napareki ke'nanga battu ri sampulo polong kaeng lenang alusu', ia nitannunga siagang wol gau', lame butung siagang eja, nampa nisulang siagang gambara' malaeka' akka'nyi'.

⁹Tassipolong-polonga sangkamma ngasengi ukkuranna; la'buna sampulo anrua metere', na sangkara'na rua metere'.

¹⁰Limam polong kaeng dipasisambungi a'jari se're layara', na limam polong maraengannaya nipakamma tongi anjo.

¹¹Ri birinna anjo ruaya layara' nipapparekangi pa'gentungang battu ri kaeng gau',

¹²ta'limang puloi pa'gentungang ri massing se'rea layara', sa'genna a'jari sipasang.

¹³Nampa nipapparekang limampulo pakkai' battu ri bulaeng untu' ampa'jari se'rei anjo ruaya layara'.

¹⁴Le'baki anjo appare'mi ke'nanga pattongko'na anjo Kemaya battu ri sampulo asse're kaeng battu ri bulu bembe.

¹⁵Tassipolonga sangkammai ukkuranna; la'buna sampulo antallu metere' na sangkara'na rua metere'.

¹⁶Limam polong nisambungi a'jari se're layara', na annang polong maraengannaya nipare' kamma tongi anjo.

¹⁷Anjo layara' makase'rea nisarei birinna limampulo pa'gentungang na anjo layara' makaruaya nisare tongi limampulo pa'gentungang.

¹⁸Nampa nia' limampulo pakkai' nipare' battu ri tambaga untu' ampa'jari se'rei anjo ruaya layara', a'jari pattongko' Kema.

¹⁹Le'baki anjo nipapparekangi rua pa'rangka' untu' bageang Kemaya; anjo se'rea battu ri kukkulu' gimbala' laki nipare' na nikasumba eja, nampa se'reanga battu ri kukkulu' alusu' nipare'.

²⁰Nampa appare' ke'nanga rangka-rangka Kema battu ri kayu akasia, nipaenteng lambusuka nai'.

²¹Tasse'rea rangka ta'appa' metere' tinggina na sangkara'na ta'annampulo sentimetere'.

²²Ri tasse'rea rangka nipapparekangi ta'rua patto' assipasang, sa'genna anjo rangka-rangkaya akkullei nipasisambung.

²³Bageang timboranga ri anjo Kemaya niparekangi ruampulo rangka,

²⁴siagang patampulo pallangga battu ri pera', ta'rua irawanganna tunggala' rangkaya untu' ruaya patto'na.

²⁵Untu' bageang warakkang ri anjo Kemaya niparekangi ruampulo rangka,

²⁶siagang patampulo pallanggana battu ri pera', ta'rua irawanganna tunggala' rangkaya.

²⁷Untu' bokona Kemaya ri bageang lau', niparekangi annang rangka

²⁸nampa rua rangka untu' panyingkulu'na.

²⁹Rangka-rangkana anjo panyingkuluka nipasiallei appakkaramula battu rawa ri bangkenna sa'genna nai' ri bageang ratena. Anjo ruaya rangka appa'jaria panyingkulu' nipare' kammatommi anjo.

³⁰Jari yangasenna nia' sagantuju rangka siagang sampulo angngannang pallangga battu ri pera', ta'rua ri massing tasse'rea rangka.

³¹Nampa appare' ke'nanga sampulo allima kayu tappalang, iamintu battu ri kayu akasia; lima untu' rangka-rangka ri tasse'rea sa'rinna Kemaya,

³²lima untu' sa'ri maraengannaya, nampa lima pole untu' bokona Kemaya ri bageang laukang.

³³Kayu tappalang ammantang tangngaya, nipatabai bageruanna tinggina anjo rangkaya, battu ri cappa' se'rena sa'genna ri cappa' maraengannaya anjo Kemaya.

³⁴Anjo rangka Kemaya siagang sikamma kayu tappalanga nilapisi siagang bulaeng, nampa nipatabai ponto-ponto bulaeng untu' antahangi anjo kayu-kayua.

³⁵Appare' tongi ke'nanga kaeng pintu battu ri kaeng lenang alusu' ia nitannunga siagang wol gau', lame butung siagang eja, nampa nisulang siagang gambara' malaeka' akka'nyi'.

³⁶Untu' panggentunganna anjo kaenga nipapparekangi appa' benteng battu ri kayu akasia ia nilapisika bulaeng, siagang pakkai' bulaeng siagang nipatabaya irate ri appa' pallangga battu ri pera'.

³⁷Nampa nipare' gordeng untu' pakke'bu' Kemaya battu ri kaeng lenang alusu' ia nitannunga siagang wol gau', lame butung siagang eja, siagang nibelo-beloi kaeng sulang.

³⁸Anjo kaeng pintua nipapparekangi lima benteng ia nipasiallea siagang pakkai'-pakkai'. Sikamma cappa'na siagang panynyambunginna anjo limaya benteng nilapisiki siagang bulaeng, nampa limaya pallanggana tambaga nipare'.