Read Makassar Version – KITTA' MATANGKASA KALAPPASSANG 37 Bible Online

KALAPPASSANG 37 - Makassar Version – KITTA' MATANGKASA bible

KALAPPASSANG 37

¹Bezaleel appareki Patti Parjanjiang battu ri kayu akasia; la'buna 110 sentimetere', sangkara'na siagang tinggina massing-massing 66 sentimetere'.

²Bageang lalanna siagang pantara'na nilapisiki siagang bulaeng ti'no', nampa nipareki les bulaeng ri tammulilina.

³Nampa appare' appa' ponto bulaeng untu' kayu pa'bule'na; nampa napataba ri appaka bangkenna anjo pattia, ta'ruai ponto ri tasse'rea sa'rinna.

⁴Appare' tongi kayu untu' pa'bulekang battu ri kayu akasia, na nalapisi bulaeng,

⁵nampa napantama' anjo kayu pa'buleka ri ponto niaka ri massing sa'rinna anjo pattia.

⁶Nampa appare' se're pa'rangka' battu ri bulaeng ti'no'; la'buna 110 sentimetere' na sangkara'na 66 sentimetere'.

⁷Appare' tongi rua malaeka' akka'nyi', iamintu gambara' malaeka' akka'nyi' battu ri bulaeng ti'no' nide'de',

⁸tasse'rei ri massing cappa'na anjo pa'rangkaka. Anjo ruaya malaeka' akka'nyi' nipasiallei siagang pa'rangka'na anjo pattia,

⁹nampa nipasidallekang, takka'rang ka'nyi'na antongkoki anjo pa'rangka'na pattia.

¹⁰Appareki Bezaleel mejang battu ri kayu akasia; la'buna 88 sentimetere', sangkara'na 44 sentimetere' siagang tinggina 66 sentimetere'.

¹¹Anjo mejanga nilapisi siagang bulaeng ti'no' nampa ri tammulilina nisarei les bulaeng.

¹²Nampa napare' birinna anjo mejanga 7,5 sentimetere' la'ba'na. Anjo birinna nasarei les bulaeng ri tammulilina.

¹³Appareki appa' ponto untu' kayu pa'bule'na nampa napataba ri appaka panyingkulu'na anjo mejanga.

¹⁴Anjo ponto untu' pannahang pa'bulekanga nipatabai ri ampi'na biring mejanga.

¹⁵Anjo kayu pa'bulekanga kayu akasia nipare' nampa nilapisi siagang bulaeng.

¹⁶Appare' tongi piring-piring, cangkiri'-cangkiri', bongki-bongki siagang mangko'-mangko' untu' passare je'ne' anggoro'. Yangasenna pakkakasa'na anjo mejanga sangnging bulaeng ti'no' ngaseng nipare'.

¹⁷Appareki Bezaleel bangkeng lampu battu ri bulaeng ti'no'. Pa'lapa'na siagang panna'gallanna battu ri bulaeng nide'de' nipare'. Bunga-bunga pa'belo-belo, kammayatompa pucu'na siagang pammantangang pucu'na assiallei siagang panna'gallanna.

¹⁸Ri panna'gallanna nipareki annang tangke; tallu tangke ri massing tasse'rea sa'rinna.

¹⁹Ri tunggala' tangkenna nipareki belo-belo iamintu tallu bunga badang, siagang pucu'na na pammantangang pucu'na.

²⁰Ri panna'gallanna nipareki belo-belo iamintu appa' bunga badang siagang pucu'na na pammantangang pucu'na.

²¹Irawanganna anjo massing tassipasang tangkenna nipareki se're pucu'.

²²Sikontu bangkenna anjo lampua siagang pucu'-pucuka kammayatompa tangke-tangkenna, yangasenna nipareki battu ri sipolong bulaeng ti'no' nide'deka.

²³Ri bangkenna anjo lampua nipareki tuju lampu siagang pakkakasa' untu' nipake antangkasi sumbu lampua siagang baki bulaeng ti'noka.

²⁴Nia' 35 kilo battala'na bulaeng ti'no' niparalluang untu' ampareki anjo bangkeng lampua siagang sikamma pakkakasa'na.

²⁵Appareki Bezaleel se're tampa' pattunuang dupa battu ri kayu akasia. Anjo pattunuang dupaya appasagi pare'na; la'buna siagang sangkara'na massing-massing 45 sentimetere' na tinggina 90 sentimetere'. Ri appa' panyingkulu' bageang ratena nipareki tanru', ia assiallea siagang anjo pattunuang dupaya.

²⁶Bageang ratena, anjo appaka sa'ri siagang tanru'-tanru'na nilapisi siagang bulaeng ti'no', nampa ri tammulilina nipareki les bulaeng.

²⁷Appare' tommi rua ponto irawanganna les bulaenga, iamintu ri ruaya sa'ri untu' antahangi kayu pa'bule'na anjo pattunuang dupaya.

²⁸Anjo pa'bulekanga battu ri kayu akasia nipare' siagang nilapisi bulaeng.

²⁹ Appare' tommi Bezaleel minynya' upacara siagang dupa kaminang bajika siagang bauka, nicampuru' sangkamma minynya' wangi.