Read Makassar Version – KITTA' MATANGKASA KALAPPASSANG 38 Bible Online

KALAPPASSANG 38 - Makassar Version – KITTA' MATANGKASA bible

KALAPPASSANG 38

¹Angngallei Bezaleel kayu akasia, nampa appare' tampa' pakkoro'bangngang untu' koro'bang nitunua. Anjo tampa' pakkoro'bangnganga appasagi pare'na; la'buna siagang sangkara'na massing-massing 2,2 metere', siagang tinggina 1,3 metere'.

²Ri tunggala' panyingkulu' bageang ratena nipareki tanru' assiallea siagang anjo tampa' pakkoro'bangnganga. Yangasenna nilapisi siagang tambaga.

³Appare' tongi pamaja'-pamaja', sikopang, garpu-garpu, mangko'-mangko', siagang pammantangngang pepe'. Yangasenna anjo pakkakasaka sangnging battu ri tambaga nipare'.

⁴Appareki kawa' nianyang battu ri tambaga, ia nipakaluka mae ri bageang rawana anjo tampa' pakkoro'bangnganga, tinggina bageruanna battu ri tinggina anjo tampa' pakkoro'bangnganga.

⁵Nampa appare' appa' ponto untu' kayu pa'bulekang ri appa' panyingkulu' bageang rawana.

⁶Anjo kayu pa'bulekanga battu ri kayu akasia nipare' nampa nilapisi siagang tambaga.

⁷Nampa anjo ruaya kayu pa'bule' nipantamaki ri ponto-ponto niaka ri rua sa'rinna anjo tampa' pakkoro'bangnganga. Anjo tampa' pakkoro'bangnganga battu ri papang nipare' siagang kosongi bageang lalanna.

⁸ Appareki Bezaleel ba' tambaga; pa'lapa'na irawa tambaga nipare'. Anjo tambagaya battu ri carammenna ngaseng sikamma bai'-baine allayania ri pakke'bu' KemaNa Batara.

⁹Nakalliki Bezaleel anjo paranglakkenna KemaNa Batara siagang layara' battu ri kaeng lenang alusu'. Ri bageang timboro', la'buna 44 metere',

¹⁰nipatabaya ri ruampulo benteng tambaga, massing-massing nilapaki siagang tambaga, nampa pakkai'na siagang pa'gentunganna battu ri pera'.

¹¹Ri bageang wara' kamma tomminjo pare'na.

¹²Ri bageang ilau' nipatabai layara' 22 metere' la'buna, siagang sampulo benteng kammayatompa sampulo pa'lapa'; pakkai'na siagang panynyambunna battu ri pera' nipare'.

¹³Ri bageang rayana, ia niaka pakke'bu'na, sangkara'na layara'na nia' todong 22 metere'.

¹⁴Ri kairinna siagang ri kananna anjo pakke'buka nisarei layara', massing-massing 6,6 metere', ammakea tallu benteng siagang tallu pa'lapa'.

¹⁶Sikontu layara' nipatabaya ri tammulilina anjo paranglakkenga, battu ri kaeng lenang alusu' nipare'.

¹⁷Pallanggana sikamma anjo bentenga battu ri tambaga nipare', nampa pakkai'na, panynyambunna, siagang coppo'na bentenga battu ri pera' nipare'. Sikontu bentenga ri tammulilina anjo paranglakkenga nipasiallei battu ri se'reanga mae ri maraengannaya siagang pakkai' peraka nipare'.

¹⁸Gordeng pakke'bu' lompona anjo paranglakkenga battu ri kaeng lenang alusu', ia nitannunga siagang wol gau', lame butung siagang eja, kammayatompa nibelo-beloi siagang kaeng nisulang. La'buna nia' salapang metere' na tinggina rua metere'; jari sangkammai siagang layara'na paranglakkenga.

¹⁹Anjo kaeng pintua nipatabai ri appa' benteng siagang appa' pa'lapa' tambaga. Sikontu pakkaika, pattongko'na coppo'na siagang pa'gentunganna sangnging pera' ngaseng nipare';

²⁰mingka sikamma patto'-patto' untu' Kemaya siagang untu' kalli'na battu ri tambaga nipare'.

²¹Iaminne dattara'na sikamma apa-apa niaka nipake lalang ri KemaNa Batara, siagang pammantanganna ruaya batu nipannulisi siagang Sampulo ParentaNa Allata'ala. Anjo dattaraka nipareki lanri parentana Musa, siagang nisusunga ri sikamma tu Lewi anjamaya nipimping ri Itamar, ana'na Imang Harun.

²²Bezaleel ana'na Uri, cucunna Hur battu ri suku Yehuda, ampareki sikontu apa Naparentakanga Batara.

²³Pambantuna, iamintu Aholiab ana'na Ahisamakh battu ri suku Dan, iami tau cara'de' angngukiri', anrancang siagang attannung kaeng lenang alusu', kammayatompa kaeng wol gau', lame butung siagang ejaya tanja'na.

²⁴Ia bulaeng nipassareanga mae ri Batara untu' Kema Matangkasaka yangasenna nia' sisa'bu kilo battala'na, nitimbanga situru' timbangang niaka nipake ri KemaNa Batara.

²⁵ Pera' nigappaya battu ri wattu nibilanna tu Israel nia' 3.430 kilo battala'na, nitimbanga situru' timbangang niaka nipake ri KemaNa Batara.

²⁶ Anjo jaina sangkammai jaina siagang apa nabayaraka sikontu tau le'baka nitulisi' arenna ri wattunna nigaukang anjo pammilangnganga. Tunggala' taua a'bayaraki situru' anggarang le'baka nipattantu, nitimbanga situru' timbangang niaka nipake anjo wattua. Ri wattunna nibilang taua nia' 603.550 jaina tu bura'ne umuru' ruampulo taunga na rateanna.

²⁷Battu ri anjo peraka, nia' 3.400 kilo battala'na nipake untu' appare' sibilangngang pallanggana siagang pa'lapa'na benteng KemaNa Batara siagang kaeng pintuna. Tunggala' pallanggaya nia' 34 kilo battala'na.

²⁸Battu ri sesanna anjo peraka, iamintu 30 kilo battala'na, napareki Bezaleel panynyambung-panynyambung siagang pakkai'-pakkai' untu' benteng-bentenna, siagang pattongko'na anjo sikamma bentenga.

²⁹Na ia tambaga nipassareanga mae ri Batara yangasenna nia' 2.425 kilo battala'na.

³⁰Anjo tambagaya nipakei untu' appare' pallanggana pakke'bu'na KemaNa Batara, tampa' pakkoro'bangngang siagang kawa' nianyang battu ri tambaga, sikontu pakkakasa'na tampa' pakkoro'bangnganga,

³¹pa'lapa'na layara' ri tammulilina paranglakkenga siagang pakke'bu' lompona, sikontu patto'na Kemaya siagang paranglakkeng ri tammulilina.