Read Makassar Version – KITTA' MATANGKASA KALAPPASSANG 39 Bible Online

KALAPPASSANG 39 - Makassar Version – KITTA' MATANGKASA bible

KALAPPASSANG 39

¹Bezaleel siagang Aholiab appareki pakeang ibada battu ri kaeng wol gau', lame butung siagang eja, untu' sikamma imanga ri wattunna nagaukang tugasa'na ke'nanga ri Kamara' Matangkasaka. Pakeanna Imang Harun nipareki situru' apa le'baka Naparentakang Batara mae ri Musa.

²Anjo nikanaya Efod nipareki battu ri kaeng lenang alusu', kaeng wol gau', lame butung siagang eja, kammayatompa bannang bulaeng.

³Ande'deki ke'nanga la'ba'-la'ba' bulaeng, nampa nipolong-polong a'jari bannang nipisi', nampa nitannung siagang kaeng lenang alusu' siagang kaeng wol gau', lame butung siagang eja.

⁴Le'baki anjo nipare' tongi rua otere' salangga passikko' efod ia nijaika ri sa'rinna.

⁵Ia passikko' aya' tannung alusuka, ia nipareka battu ri bahang sangkammaya, siagang nijaika ri anjo efodka sa'genna assialle sangkamma Naparentakanga Batara mae ri Musa.

⁶Angngalusimi ke'nanga batu paramata delima nampa napataba lalang ri les bulaenga. Naukiri' baji'mi ke'nanga areng-arenna sampuloa anrua ana'na Yakub ri anjo batu-batu paramataya.

⁷Nampa nipataba anjo batu-batu paramataya ri otere' efodka salaku pappiu'rangi mae ri sampuloa anrua suku Israel, sangkamma Naparentakanga Batara mae ri Musa.

⁸Appareki Bezaleel siagang Aholiab pa'lapa' barambang battu ri bahang sangkammaya siagang bahanna efodka, siagang sangkammaya todong sulanna.

⁹Appasagi pare'na na nilappa' rua, sangkara'na siagang la'buna massing-massing 22 sentimetere'.

¹⁰Ri anjo pa'lapa' barambanga nipatabai patambarrisi' batu paramata. Ri barrisi' makase'rea iamintu batu paramata delima, topasa' siagang baiduri.

¹¹Ri barrisi' makaruaya iamintu batu paramata samru', batu nilang siagang intang.

¹²Ri barrisi' makatallua iamintu batu paramata lasuardi, batu aki' siagang batu kacubung.

¹³Ri barrisi' makaappaka iamintu batu paramata pirusu', yaku' siagang ratna campaka. Anjo sampuloa anrua batu paramata nisikkoki siagang bulaeng.

¹⁴Ri tunggala' batu paramataya anjo niukiriki arenna kalase'renna sampuloa anrua ana'na Yakub a'jari pammatei pangngu'rangi mae ri suku-suku Israel.

¹⁵Nampa nipare' rua rante battu ri bulaeng ti'no' ia niotereka sangkamma otere'.

¹⁶Nipare' tongi rua ponto bulaeng, ia nipatabaya ri rua cappa' ratena anjo pa'lapa' barambanga.

¹⁷Nampa nipantama' anjo ruaya rante bulaeng ri anjo ponto-pontoa,

¹⁸nampa ruaya cappa' maraenna nisikkokangi mae ri anjo ruaya les, sa'genna akkulle anjo pa'lapa' barambanga nipasialle siagang bageang dallekanna otere' salangganna efodka.

¹⁹Nampa nipare' rua ponto bulaeng pole, ia nipatabaya ri anjo pa'lapa' barambanga, ri cappa' rawana bageang lalanga ia nitabaya ri efodka.

²⁰Le'baki anjo nipare'mi rua ponto bulaeng ia nipasanga ri bageang ri dallekanna anjo ruaya otere' salangganna efodka, ri ampi'na sambungang panjai'na irawa sike'de', irateanna passikko' aya' nitannung alusuka.

²¹Situru' parentaNa Batara mae ri Musa, anjo ponto pa'lapa' barambanga nipasiallei siagang otere' gau' niaka ri ponto efodka, sa'genna anjo pa'lapa' barambanga tuli niaki rateanna passikko' ayaka siagang tena nata'lappasa'.

²²Juba nipakea irate ri efodka, yangasenna nipareki battu ri wol gau'.

²³Kallonna nikassakki siagang pita nitannung sollanna tena nagampang kekke'.

²⁴Ri tammulilina bageang rawana nipapparekangi belo-belo rappo delima battu ri kaeng lenang alusu' siagang wol gau', lame butung, siagang eja, nipasialla'-allakki siagang lisere'-lisere' bulaeng, situru' Naparentakanga Batara mae ri Musa.

²⁷Appareki ke'nanga kameja untu' Harun siagang ana'-ana'na,

²⁸kammayatompa soro'bang, saluara' bodo battu ri kaeng lenang,

²⁹siagang passikko' aya' battu ri kaeng lenang alusu', wol gau', lame butung siagang eja, nibelo-beloi siagang kaeng nisulang, sangkamma Naparentakanga Batara mae ri Musa.

³⁰Kammayatompa nipare' tongi belo-belo battu ri bulaeng ti'no', a'jari pammatei angkanaya le'ba'mi ke'nanga nisa'la' untu' a'jari taunNa Batara. Ri anjo belo-beloa nia' tattulisi' kana-kana angkanaya, “Nisa'laki untu' Batara”.

³¹Anjo belo-beloa nipatabai ri bageang dallekanna soro'banga, situru' Naparentakanga Batara mae ri Musa.

³²Kala'busanna le'ba' ngasemmi anjo jama-jamang appareka KemaNa Batara. Le'ba'mi nagaukang tu Israel sikamma apa Naparentakanga Batara mae ri Musa.

³³Naerangi ke'nanga mae ri Musa Kemaya siagang sikontu pakkakasa'na, sikamma pakkai'na, kayu-kayu tappalanna, benteng-bentenga siagang pallanggana,

³⁴pa'rangka' battu ri kukkulu' bembe laki ia nikasumba ejaya, pa'rangka' battu ri kukkulu' alusu', kaeng pa'rangka',

³⁵Patti Parjanjiang pammantanganna ruaya batu nipannulisi Sampulo ParentaNa Allata'ala siagang kayu pa'bule' kammayatompa pa'rangka'na,

³⁶mejang siagang sikontu pakkakasa'na siagang roti nipatalaya,

³⁷bangkeng lampu battu ri bulaeng ti'no', lampu-lampuna siagang sikamma pakkakasa'na, minynya' untu' lampu,

³⁸tampa' pakkoro'bangngang battu ri bulaeng, minynya' upacara, dupa bau', gordeng pakke'bu' Kema,

³⁹tampa' pakkoro'bangngang battu ri tambaga siagang kawa' nianyang battu ri tambaga, kayu pa'bule' siagang sikamma pakkakasa'na; ba' pa'bissang siagang pa'lapara'na,

⁴⁰sikamma layara' untu' kalli' paranglakkeng siagang sikamma bentenna kammayatompa pallanggana, gordeng pakke'bu' lompona paranglakkenga siagang sikamma otere'na, patto'-patto' Kema; sikontu pakkakasa' parallua nipake lalang ri Kemaya,

⁴¹siagang pakeang ibada untu' sikamma imanga ri wattunna nagaukang tugasa'na ke'nanga lalang ri Kamara' Matangkasaka, kammayatompa pakeang nisa'laka untu' Harun siagang ana'-ana'na.

⁴²Le'ba'mi nagaukang tu Israel sikontu jama-jamanga anjo, situru' parentaNa Batara mae ri Musa.

⁴³Naparessami Musa yangasenna anjo jama-jamanga na nacini'mo angkanaya le'ba' ngasemmi napa'le'ba' ke'nanga anjo jama-jamanga situru' apa Naparentakanga Batara. Nampa nabarakkakimo Musa anjo ke'nanga.