Read Makassar Version – KITTA' MATANGKASA KALAPPASSANG 40 Bible Online

KALAPPASSANG 40 - Makassar Version – KITTA' MATANGKASA bible

KALAPPASSANG 40

¹Nakanamo Batara ri Musa,

²“Bangummi anjo KemaKu ri tanggala' se're bulang se're.

³Pantamaki anjo Patti Parjanjiang napammantangia anjo Sampuloa Parenta nampa nusarei kaeng passimbang ri dallekanna.

⁴Boliki mejanga ri tampa'na siagang sikamma pakkakasa'na. Pantama tongi bangkeng lampua siagang patabai lampuna.

⁵Boliki tampa' pattunuang dupa bulaenga ri dallekanna Patti Parjanjianga, siagang gentungi gordeng ri pakke'bu' Kemaya.

⁶Boliki tampa' pakkoro'bangngang untu' koro'bang nitunua ri dallekang pakke'bu'na Kemaya.

⁷Boliki ba' je'ne' pa'bissa-bissanga ri alla'na Kemaya siagang anjo tampa' pakkoro'bangnganga, nampa nubonei je'ne'.

⁸Nampa nupataba layaraka ri tammulilina paranglakkeng Kemaya, siagang gentungi gordeng pakke'bu' lompona paranglakkenga.

⁹Nampa anjo Kemaya siagang sikontu pakkakasa'na musti nupassareangi mae ri Nakke; minynyaki ngasengi siagang minynya' upacara sollanna a'jari matangkasa' ngaseng siagang nisa'la' untu' iNakke.

¹⁰Kamma tongi anjo batenu ampassareangi ri Nakke tampa' pakkoro'bangnganga siagang sikamma pakkakasa'na, sollanna nisa'la' ngaseng untu' iNakke.

¹¹Kamma tongi anjo nugaukang mae ri ba' je'neka siagang pa'lapa'na.

¹²Le'baki anjo, suroi Harun siagang ana'-ana'na battu ri pakke'bu' Kemaya na nabissai kalenna.

¹³Pipakei Harun siagang pakeang imang, siagang minynyaki sollanna nisa'la' untu' allayaniA' salaku imang.

¹⁴Nampa suroi ana'-ana'na a'reppese', na nupipakei kameja ke'nanga.

¹⁵Nampa minynyaki ke'nanga sangkamma batenu amminynyaki manggena ke'nanga, sollanna akkulle todong ke'nanga allayaniA' salaku imang. Lanri anjo upacara minynyaka, iami ke'nanga siagang jari-jarina anta'galaki jama-jamang kaimangnganga.”

¹⁶Nagaukammi Musa sikontu anjo apa Naparentakanga Batara.

¹⁷Jari ri tanggala' se'rena bulang se're ri taung makaruana nabokoi bansa Israel pa'rasangang Mesir, nipatabami anjo KemaNa Batara.

¹⁸Napadongko'mi Musa sikamma pallanggana, napaentengi sikamma rangka-rangkana, napatabai kayu-kayu tappalanna, siagang napaentengi sikamma bentenna.

¹⁹Nampa naka'rang pattongko'na Kemaya siagang pa'rangka' bageang pantara'na situru' Naparentakanga Batara.

²⁰Nampa nipantama' anjo ruaya batu nipannulisi siagang Sampulo ParentaNa Allata'ala ri Patti Parjanjianga. Nampa napataba Musa pa'rangka'na anjo Pattia siagang napantama kayu pa'bulekanga ri pontona.

²¹Nampa naboli' anjo Pattia lalang ri Kemaya siagang nagentungi gordeng passimbang ri dallekanna, situru' parentaNa Batara mae ri ia.

²²Nampa napadongko' Musa mejanga lalang ri Kemaya, ri bageang wara' pantaranganna kaenga,

²³nampa napadongko' roti nipatalaya irate ri anjo mejanga.

²⁴Napadongko'mi bangkeng lampua lalang ri Kemaya, ri bageang timboro', assidallekang siagang anjo mejanga,

²⁵nampa naparinra anjo lampu-lampua ri dallekanNa Batara.

²⁶Napadongkoki tampa' pattunuang dupa bulaenga lalang ri Kemaya, ri dallekanna kaenga,

²⁷nampa natunu dupa bauka situru' le'baka Naparentakang Batara mae ri Musa.

²⁸Nagentungi Musa gordenga ri pakke'bu' Kemaya,

²⁹nampa ri dallekanna pakke'buka napadongko'mi tampa' pakkoro'bangngang untu' koro'bang nitunua. Irate ri anjo tampa' pakkoro'bangnganga napassareammi koro'bang nitunua siagang koro'bang pappatalaya.

³⁰Ba' je'ne' tambagaya niboli'mi ri alla'na Kemaya siagang tampa' pakkoro'bangnganga, nampa nabonei je'ne'.

³¹Musa, Harun siagang ana'-ana'na, nabissaimi limanna siagang bangkenna anjoreng,

³²punna antama' ke'nanga ri KemaNa Batara yareka punna a'reppese' ke'nanga anjoreng ri tampa' pakkoro'bangnganga.

³³Ri tammulilina anjo Kemaya siagang tampa' pakkoro'bangnganga napatabai Musa layara' siagang nagentungi gordenga ri pakke'bu' lompona paranglakkenga. Jari le'ba' kabusu'mi anjo jama-jamanga.

³⁴ Nampa naummo rammanga antongkoki KemaNa Batara, siagang rassimi anjo Kemaya siagang caya kahaderanNa Batara.

³⁵Lanri kammana anjo takkulleami antama' Musa ri anjo Kemaya.

³⁶Punna nai' anjo rammanga battu ri KemaNa Batara, massing nabongkara'mi bansa Israel kemana untu' a'lette' mange ri tampa' maraenga.

³⁷Mingka punna tena nanai' anjo rammanga, tena todong na'lampa ke'nanga battu ri anjo tampaka.

³⁸Lalang a'la'ba'na a'jappa bansa Israel, tuli niaki Batara ri anjo Kemaya, a'rupa rammang punna allo siagang a'rupa pepe' punna bangngi.