Read Makassar Version – KITTA' MATANGKASA KALAPPASSANG 6 Bible Online

KALAPPASSANG 6 - Makassar Version – KITTA' MATANGKASA bible

KALAPPASSANG 6

¹ A'bicarami Allata'ala mae ri Musa nakana, “INakkemi Batara.

²Kupappicinikangi KalengKu mae ri Abraham, Ishak siagang Yakub, salaku Allata'ala Kaminang Koasaya, mingka tena Kupappiassengangi KalengKu mae ri ke'nanga lalang areng ‘Batara’.

³Appare' tongA' parjanjiang siagang ke'nanga. A'janjiA' angkana laKusarei ke'nanga pa'rasangang Kanaan, iamintu pa'rasangang le'baka napammantangngi ke'nanga riolo salaku tau battu-battu.

⁴Kulangngere'mi kunrarenna tu Israel, nipare' ataya ri bansa Mesir, nampa Kuu'rangimo anjo janjingKu.

⁵Jari pa'la'bammi pabattu mange ri bansa Israel angkanaya Kukana ri ke'nanga: iNakke Batara; laKulappassangko battu bansa Mesir, ampare' atayako. LaKupappicinikangi kakoasangKu malompoa untu' ampasalamakko siagang Kuhukkung battala' bansa Mesir.

⁶LaKupa'jariko ummakKu, siagang iNakke a'jari Allata'alanu. Na lanuassemmo angkanaya iNakkemi anne Batara, Allata'alanu, le'baka allappassangko battu ri Mesir, ampare' atayako.

⁷LaKuerangko mange ri pa'rasangang Kupa'janjianga ammake sumpa mae ri Abraham, Ishak siagang Yakub; Kupassareangi anjo buttaya mae ri kau a'jari ikau ampatangi. INakkemi Batara.”

⁸Sikontu anjo pasanNa Batara napabattui Musa mae ri bansa Israel, mingka taerokai ke'nanga anjampangi Musa, lanri tappu' minasami ke'nanga napakamma anjo sessanamo ke'nanga nipare' ata.

⁹Nampa Nakanamo Batara mae ri Musa,

¹⁰“A'lampamako mange andallekang ri Karaeng Mesir na nupauang angkanaya musti nasarei ising bansa Israel ambokoi pa'rasanganna.”

¹¹Mingka appialimi Musa angkana, “Kalenna tu Israel nataeroka ampilangngeria'. La'biangampa, antekamma batena lakkulle Karaeng Mesir ampilangngeri tau tenaya nacara'de' a'bicara kammaya nakke?”

¹²Kammaminjo naNasuromo Batara anjo Musa siagang Harun mange ampabattui mae ri bansa Israel siagang mae ri Karaeng Mesir angkanaya nisarei tugasa' ke'nanga ri Batara untu' ampimpingi anjo bansa Israelka assulu' battu ri Mesir.

¹³Iaminne pattottoranna Musa siagang Harun: Ruben, ana' toana Yakub, nia' appa' ana'na bura'ne, iamintu: Henokh, Palu, Hezron siagang Karmi. Iaminjo ke'nanga boe-boena sikamma golongang niaka lalang ri suku Ruben.

¹⁴Simeon siagang bainenna tu Kanaan, nia' annang ana'na bura'ne, iamintu: Yemuel, Yamin, Ohad, Yakhin, Zohar siagang Saul. Iaminjo ke'nanga boe-boena battua ri golongang niaka lalang ri suku Simeon.

¹⁵Lewi nia' tallu ana'na bura'ne, iamintu: Gerson, Kehat, siagang Merari; iaminjo ke'nanga boe-boena sikamma golongang niaka lalang ri suku Lewi. Lewi narapiki 137 taung umuru'na.

¹⁶ Gerson nia' rua ana'na bura'ne, iamintu: Libni siagang Simei; anne ke'nanga jai jari-jarina.

¹⁷Kehat nia' appa' ana'na bura'ne, iamintu: Amram, Yizhar, Hebron, siagang Uziel. Kehat narapiki 133 taung umuru'na.

¹⁸Merari nia' rua ana'na bura'ne, iamintu: Mahli siagang Musi. Iaminjo ke'nanga sikamma golongang niaka lalang ri suku Lewi siagang massing jari-jarina ke'nanga.

¹⁹Amram a'buntingi siagang Yokhebed, andi' bainena manggena, naia ana'na ke'nanga iamintu Harun siagang Musa. Amram 137 taung sallona attallasa'.

²⁰Yizhar nia' tallu ana'na bura'ne, iamintu Korah, Nefeg, siagang Zikhri.

²¹Uziel nia' todong tallu ana'na bura'ne, iamintu: Misael, Elsafan, siagang Sitri.

²²Harun a'buntingi siagang Eliseba, ana' bainena Aminadab; Eliseba nia' todong sari'battanna iamintu Nahason. Eliseba allassukangi Nadab, Abihu, Eleazar, siagang Itamar.

²³Korah nia' tallu ana'na bura'ne, iamintu: Asir, Elkana, siagang Abiasaf. Iaminjo ke'nanga boe-boena golongang kaluargana Korah.

²⁴Eleazar, ana' bura'nena Harun, a'buntingi siagang kalase'renna ana'na Putiel, na ia ana'na ke'nanga iamintu Pinehas. Yangaseng anjo sikammaya kapala golongang siagang kapala kaluargaya lalang ri suku Lewi.

²⁵Iaminjo Harun siagang Musa Naparentakanga Batara untu' angngerangi tu Israel assulu' battu ri Mesir.

²⁶Iaminjo ke'nanga sipa'rua andallekang ri Karaeng Mesir sollanna nalappassang tu Israel.

²⁷Ri wattunna a'bicara Batara siagang Musa ri Mesir,

²⁸Nakana Batara, “INakkemi Batara. Pabattuangi Karaeng Mesir sikontu apa le'baka Kupau mae ri kau.”

²⁹Mingka appialimi Musa angkana, “O, Batara, Kiassengi angkanaya tena kucara'de' a'bicara. Antekamma batena lakkulle karaenga ampilangngeria?”