Read Makassar Version – KITTA' MATANGKASA KALAPPASSANG 7 Bible Online

KALAPPASSANG 7 - Makassar Version – KITTA' MATANGKASA bible

KALAPPASSANG 7

¹Nakanamo Batara ri Musa, “LaKupa'jariko sanrapang Allata'ala ri dallekanna karaenga, siagang sari'battannu Harun la'bicara mae ri ia salaku na'binu.

²Pauangi Harun sikontu apa Kuparentakanga mae ri kau. Suroi Harun ampaui mae ri karaenga angkanaya musti nakellai tu Israel ambokoi pa'rasangang Mesir.

³ Mingka laKupa'jari anjo karaenga terasa' pa'mai'na. Tena nalanajampangiko, manna pole kuppabattu jai bala ri Mesir.

⁴Lanri kammana anjo laKuhukkungi Mesir siagang hukkungang-hukkungang battala', nampa Kuerang sikontu bansa Israel, ummakKu, assulu' battu ri anjo pa'rasanganga.

⁵Jari lanaassemmi tu Mesir angkanaya iNakkemi anne Batara, ri wattunna Kuhukkung ke'nanga siagang Kuerang tu Israel assulu' battu ri pa'rasanganna ke'nanga.”

⁶Nagaukammi Musa siagang Harun anjo apa Naparentakanga Batara.

⁷Anjo wattua 80 taung umuru'na Musa na Harun 83 taung umuru'na, na'lampa ke'nanga mange andallekang ri Karaeng Mesir.

⁸Nakana Batara mae ri Musa siagang Harun,

⁹“Punna nasuroko karaenga appa'nia' gau' malompo untu' a'jari butti, suroi Harun angngallei takkanna nampa nabuang naung ri buttaya ri dallekanna karaenga. Latappinrai anjo takkanga a'jari ulara'.”

¹⁰Jari a'lampami Musa siagang Harun andallekang ri karaenga siagang nagaukammi anjo apa Naparentakanga Allata'ala. Nabuangi Harun takkanna ri buttaya ri dallekanna karaenga siagang sikamma pagawena, nampa a'jari ulara'mo anjo takkanga.

¹¹Lanri kammana nasuro kio' tommi karaenga sikamma taunna niaka pangngissenganna siagang cara'deka a'bale'-bale' mata, nampa nagaukang todong kammaya siagang pangngissenganna ke'nanga.

¹²Napasambilai takkanna ke'nanga ri buttaya natappinramo anjo takkanga a'jari ulara'. Mingka nia'lu'mi ri takkanna Harun anjo sikamma takkanna ke'nanga.

¹³Mingka manna nakamma tuli kapala batuna karaenga taeroka anjampangi kana-kananna Musa siagang Harun, sangkamma le'baka Nakana Batara.

¹⁴Nampa Nakana Batara ri Musa, “Anjo karaenga sanna' kapala batuna; taerokai napassareang a'lampa bansa Israel.

¹⁵Lanri kammana, a'lampamako angngagangi sibuntulu' ammuko bari'basa', ri wattunna naung ri Binanga Nil. Erangi anjo takkang akkullea tappinra a'jari ulara', nampa nutayang kabattuanna ri biring binangaya.

¹⁶Pauangi anjo karaenga angkana: Batara, Allata'alana tu Ibrania, Nasuroa' ampabattui mae ri katte, sollanna kilappassang a'lampa umma'Na mange untu' anggaukangi ibadana mae ri Ia ri parang lompoa. Mingka sa'genna kamma-kamma anne tena kiero' appilangngeri.

¹⁷ Lanri kammana anjo, kammaminne kananNa Batara, ‘Battu ri apa Kugaukanga sallang, lanuassemmi angkanaya iNakkemi Batara.’ Anne takkanga laKupake antunrungi rateanna je'neka ri binangaya, nampa tappinra je'ne'na a'jari cera'.

¹⁸Lamate ngasengi jukuka, siagang anne binangaya la'rasa bottoki, sa'genna takkullea bansa Mesir angnginungi je'ne'na.”

¹⁹Nakana Batara ri Musa, “Suroi Harun angngallei takkanna nampa nupajonjo mae ri tompo'na sikontu binangaya, sikamma solonganga siagang sikamma kollanga ri Mesir. La'jari ceraki je'ne'na, siagang lania' cera' ri sikontu pa'rasanganga, ba'lalo manna lalang ri sikamma dorong kayua siagang sikamma katoang batua.”

²⁰Nagaukammi Musa siagang Harun anjo apa Naparentakanga Batara. Ri dallekanna karaenga siagang sikamma pagawena, naangka'mi Harun takkanna siagang natunrummi je'ne'na Binanga Nil, sa'genna tappinramo a'jari cera' je'ne'na.

²¹Mate ngasemmi sikamma juku' niaka lalang ri anjo binangaya. Sanna' botto'na rasanna, sa'genna takkulleamo tu Mesir angnginungi anjo je'neka. Nia'mo cera' ri sikontu butta Mesir.

²²Mingka nagaukang tommi kammaya anjo sikamma tucara'de'na tu Mesir, iamintu napakei pangngissenganna ke'nanga. Jari tuli kapala batuna karaenga. Kamma le'baka Napau Batara, taerokai karaenga ampilangngeri Musa siagang Harun.

²³Ba'lalo ammotere'mi mange ri balla' karaenga natena sikali najampangi manna sike'de' anjo apa kajarianga.

²⁴Angngeke ngasemmi bungung sikontu tu Mesir ri birinna binangaya untu' a'boya je'ne' inung, lanri takkullena niinung je'ne'na anjo binangaya.

²⁵Tuju allo allalona le'ba'na Natunra Batara anjo Binanga Nil.