Read Makassar Version – KITTA' MATANGKASA KALAPPASSANG 8 Bible Online

KALAPPASSANG 8 - Makassar Version – KITTA' MATANGKASA bible

KALAPPASSANG 8

¹Nampa Nakana Batara ri Musa, “A'lampako mange andallekang ri karaenga siagang pabattui mae ri ia pasangKu anne: Lappassangi ummakKu a'lampa untu' anggaukangi ibadana mae ri Nakke.

²Punna taerokako, anne pa'rasanganga laKupirassi siagang tumpang, a'jari hukkungang mae ri kau.

³Anne Binanga Nil larassi siagang tumpang, sa'genna lassulu' anjo olo'-olo' kammaya battu lalang ri je'neka nampa antama' ri balla' kakaraengannu, antama' ri kamara' katinroannu siagang sikamma kamara' katinroanga, antama' ri sikamma balla'na sikamma pagawea siagang balla'na ra'yaka, ba'lalo antama' ri pattunuang rotia siagang panci-pancia.

⁴Anjo tumpanga la'lumpaki siagang lanaambikko, siagang sikontu pagawea kammayatompa ra'yaka.”

⁵Nakana Batara ri Musa, “Suroi Harun ampajonjoi takkanna ri tompo'na sikamma binanga-binangaya, sikamma solonganga siagang kollang-kollanga, sollanna ammumba anjo tumpanga ri kere-keremae na napirassi butta Mesir.”

⁶Jari napajonjomi Harun anjo takkanna ri tompo'na sikontu je'neka, nampa ammumbamo tumpanga ampirassi sikontu pa'rasanganga.

⁷Mingka napajappa tommi pangngissenganna sikamma pabale'-bale' matana ke'nanga, nampa appaumba tommo tumpang ri anjo pa'rasanganga.

⁸Nakio'mi Karaenga Musa siagang Harun nampa nakana, “Appala' doang mako mae ri Batara sollanna Napa'lanynya' anne sikamma tumpanga, nampa kulappassang a'lampa bansanu untu' mange assare koro'bang mae ri Batara.”

⁹Appialimi Musa angkana, “Lappala' doanga' siagang te'ne pa'maikku, untu' ikatte karaeng. Kipattantumi wattunna, nampa kupappala' doangangki', kammayatompa untu' sikamma pagaweta siagang ra'yaka. Nampa nilappassangki' battu ri anjo sikamma tumpanga; tena latassesa pantaranganna Binanga Nil.”

¹⁰Appialimi anjo karaenga angkana, “Pappala' doangamma' ammuko.” Nakanamo Musa, “Lakugaukangi apa kipalaka karaeng. Na lakiassemmo angkanaya tena ruanna Allata'ala sangkammaya Batara, Allata'alana ikambe.

¹¹Iami lallappassangki', siagang sikamma pagawea kammayatompa ra'yaka battu ri anjo sikamma tumpanga. Talaniakkamo tumpang ri sikamma ballaka, pantaranganna ri Binanga Nil.”

¹²Nampa a'lampamo Musa siagang Harun ambokoi karaenga. Nampa appala' doang Musa mae ri Batara sollanna Napa'lanynya' anjo sikamma tumpang Napabattua mae ri karaenga.

¹³Naturukimi Batara anjo pappala'na Musa, sa'genna mate ngasemmo sikontu tumpang niaka ri sikamma ballaka, ri sikamma paranglakkenga, kammayatompa ri sikamma kokoa.

¹⁴Napasse'remi tu Mesir anjo sikontu tumpang matea, sa'genna attambung-tambung, na'rasamo botto'na ri sikontu pa'rasanganga.

¹⁵Ri wattunna nacini' karaenga angkanaya mate ngasemmi anjo tumpanga, kapala batumi pole. Na kamma le'baka Napau Batara, taerokai karaenga anjampangi kananna Musa siagang Harun.

¹⁶Nakana Batara ri Musa, “Suroi Harun antunrungi buttaya siagang takkanna, nampa tappinra ngaseng sikontu limbu'bu' niaka ri Mesir a'jari lamu'.”

¹⁷Nampa natunrummo Harun buttaya siagang takkanna, sa'genna tappinramo sikontu limbu'buka ri Mesir a'jari lamu' angkatulungai taua siagang olo'-oloka.

¹⁸Ero' tommi sikamma tau niaka pangngissenganna ampajappai pangngissenganna appa'nia' lamu', mingka takkulleai ke'nanga. Kemae-kemae nia' lamu',

¹⁹ sa'genna nakanamo anjo sikamma tau niaka pangngissenganna mae ri karaenga, “Anne panggaukanNa Allata'ala.” Mingka kapala batui anjo karaenga. Na kamma le'baka Napau Batara, taerokai anjo karaenga anjampangi kananna Musa siagang Harun.

²⁰Nakanamo Batara ri Musa, “A'lampako ammuko bari'basa' dudu andallekang ri karaenga ri wattunna naung ri binangaya, nampa nupauang anne kanangKu: Lappassangi ummakKu a'lampa mange anggaukangi ibadana mae ri Nakke.

²¹Punna taerokako, lappabattuA' katingalo mae ri kau, mae ri sikamma pagawenu siagang ra'yaka. Sikamma balla'na tu Mesir, ba'lalo sikontu pa'rasanganga larassi siagang katingalo.

²²Mingka pantaranganna anjo, daera Gosyen tena nalanituju, lanri anjo pammantanganna ummakKu. Anjoreng tena nalania' katingalo, sollanna nuasseng ngaseng angkanaya iNakke, Batara, anggaukangi anjo kammaya.

²³Lania' passisalanna ummakKu siagang ra'ya'nu. Anjo gau' malompoa lakajariangi ammuko.”

²⁴Napabattumi Batara katingaloa, sannaka jaina, mange ri balla' karaenga, siagang ri balla'na sikamma pagawena karaenga. Sanna'mi sessana sikontu pa'rasangang Mesir napakamma anjo katingaloa.

²⁵Nampa nakio'mi karaenga anjo Musa siagang Harun, na nakana, “A'lampamako mange assare koro'bang ri Allata'alanu, mingka anrinni mako bawang ri pa'rasanganga.”

²⁶Appialimi Musa angkana, “Tabajikai punna kamma, lanri lakasi'rikangi tu Mesir punna nacini' anjo passarena ikambe, siagang mattantu lanasambilai ikambe siagang batu sa'genna mate ikambe.

²⁷Musti a'lampai ikambe mange ri parang lompoa, kira-kira bellana tallungalloi nijappai battu anrinni. Anjorengi ikambe lassare koro'bang mae ri Karaeng Allata'alana ikambe, sangkamma niparentakanga mae ri kambe.”

²⁸Nakanamo karaenga, “Baji'mi, kulappassangko a'lampa mange ri parang lompoa untu' assare koro'bang mae ri Batara, Allata'alanu, assala' tenaja nu'lampa bella. U'rangi, na nupappala' doanganga'!”

²⁹Appialimi Musa angkana, “Punna a'lampama', lappala' doamma' linta' sollanna a'lampa anjo sikontu katingaloa ammuko ambokoiki', kammayatompa sikamma pagaweta siagang ra'yaka. Mingka teaki' annipui pole, siagang teaki' rompai tu Israel a'lampa untu' assare koro'bang mae ri Batara.”

³⁰A'lampami Musa ambokoi karaenga, nampa appala' doang ri Batara,

³¹na niturukimo ri Batara anjo pappala' doanna Musa. Anri'ba' ngasemmi anjo katingaloa na nabokoi karaenga, sikamma pagawea siagang ra'yaka. Tena manna sikayu ammantang.

³²Mingka anne kamma kapala batumi sedeng karaenga siagang tanakellaiyai a'lampa anjo bansaya.