Read Makassar Version – KITTA' MATANGKASA AYUB 1 Bible Online

AYUB 1 - Makassar Version – KITTA' MATANGKASA bible

AYUB 1

¹Ri butta Us, nia' sitau bura'ne ammantang, niareng Ayub. Anynyombai siagang majarreki tappa'na mae ri Allata'ala. Baji' akkalaki siagang tena na'gau' kodi manna sike'de'.

²Nia' ana'na tuju bura'ne siagang tallu baine.

³Pantaranganna anjo jai suro-surona, nia' 7.000 gimbala'na, 3.000 untana, 1.000 sapinna, siagang 500 keledaina. Bodona kana, iami kaminang kalumanynyang ri sikontu pandudu' niaka bageang iraya.

⁴Anjo lapung tujua ana' bura'nena napa'biasai a'le'ba'-le'basa' massing appare' pa'gaukang ri balla'na. Na naundang todong anjo tallua ana' bainena Ayub mae ri anjo pa'gaukanga. Nampa assama ke'nanga angnganre siagang angnginung-nginung ngaseng.

⁵Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

⁶ Ri se'reang allo battumi sikamma apa attallasaka ri suruga andallekang ri Batara; na nia' todong lapung Panggoda ri alla'na ke'nanga.

⁷Akkuta'nangi Batara mae ri anjo lapung Panggoda angkana, “Battu kemaeko?” Appialimi lapung Panggoda angkana, “Silalonna atanTa a'lampa a'la'bang kere-keremae, anjappai sikontu linoa.”

⁸Nakanamo Batara, “Apaka nuparhatikangi atangKu Ayub? Ri sikontu linoa, tena tau sangkammanna baji' pa'mai' siagang majarre'na tappa'na. Anynyombai mae ri Nakke, siagang tena sikali na'gau' kodi.”

⁹ Mingka appialimi lapung Panggoda angkana, “Tantumi anynyombana Ayub mae ri Katte, saba' annarimai pa'balasa'.

¹⁰Ia, bone balla'na, siagang sikontu kakalumanynyanganna tuli Kijagai. Jama-jamanna Kibarakkaki siagang Kisarei jai olo'-olo' katuo angganaka untu' sikontu pa'rasanganga.

¹¹Mingka ebara' angkana Kialle ngasengi anjo sikontu kakalumanynyanganna mattantu lanatunrai memang maKi' lalang silalonna.”

¹²Nakanamo Batara ri lapung Panggoda, “Baji'mi, gaukammi apa eroka nugaukang mae ri sikontu kakalumanynyanganna Ayub, assala' teako pa'risi'!” A'lampami lapung Panggoda battu ri dallekanNa Batara.

¹³Siapa are wattu ribokoanganna, sitabangi ana'-ana'na Ayub appare' pa'gaukang ri balla'na daenna kaminang toaya.

¹⁴Ti'ring nia'mo suro battu lari mae ri balla'na Ayub na napabattu angkana, “O, karaeng, niaki battu tu Syeba ambakkai ikambe ri wattunna sitabang nipake appa'jeko sikamma sapia siagang sitabanna a'ruku' sikamma keledaia ri ampi'na. Narampasa' ngasemmi ke'nanga sikontu anjo olo'-oloka, siagang nabunomi sikamma atanta niaka anjoreng. Inakke mami anne atanta ta'lappasa' sanggengku akkulle battu a'laporo' mae ri katte.”

¹⁶Lalang a'bicarana ija anjo taua, battumi atanna makaruaya angkana, “Sikamma gimbalatta siagang sikamma pakalawakinna nitabai ri kila' sa'genna mate ngaseng. Inakke mami anne atanta ta'lappasa' sa'gengku akkulle battu a'laporo' mae ri katte.”

¹⁷Tenapa nale'ba' a'bicara anjo taua, nania' tommo battu ata makatallua ampabattui angkana, “Nia' tallung pa'gompoang pasukang paella' tu Kasdim battu anrampasaki sikamma untata siagang nabuno ngaseng sikamma atanta. Inakke mami anne atanta ta'lappasa', sa'gengku akkulle battu a'laporo' mae ri katte.”

¹⁸Lalang a'bicarana ija anjo taua, battumi pole atanna maraenga angngerang kabara' angkana, “Sitabangi ana'-anatta appare' pa'gaukang ri balla'na ana' toata.

¹⁹Ti'ring battumi anging puttusuka battu ri parang lompoa nampa natuju anjo ballaka sa'genna rumbang nampa mate ngasemmo anatta. Inakke mami anne atanta ta'lappasa', sa'gengku akkulle battu a'laporo' mae ri katte.”

²⁰Nampa ammentemmi Ayub na nakekke' pakeanna tanra susana. Nacukkuru'mi ulunna, nampa su'ju' na nakana,

²¹“Nilassukkanga' natena apa-apangku, siagang punna matea' tena todong apa-apangku. Batara assarea' nampa Batara todong angngallei ammotere'. Nipujimi arenNa!”

²²Jari, manna pole nanituju Ayub ri sikontu anjo balaya, mingka tena na'gau' dosa siagang tena nasalakangi Allata'ala.