Read Makassar Version – KITTA' MATANGKASA AYUB 10 Bible Online

AYUB 10 - Makassar Version – KITTA' MATANGKASA bible

AYUB 10

¹Lanrea' siagang erokka' ta'langnge kukasia' ri tallasakku, nakupasulu' ngasemmo pa'risi'na nyawaku.

²O, Allata'ala, teaKi' salakangia' inakke; Kipisingarianga' angngapa na inakke Kibaliang.

³Apa Kisawala' punna Kijallakkanga' kamma anne, siagang Kipela' bate pa'jari kalenTa? Apa Kisawala' punna Kiiyoang panggappana siagang rancanana tau ja'dalaka?

⁴PikkiranTa tena nasangkamma pikkiranna rupataua

⁵siagang umurutTa tena nasimbodo umuru'na ke'nanga.

⁶Punna kamma, angngapa naKiboya sikontu dosaku? Angngapa Kiondangi sikontu kasalangku?

⁷Sitojenna Kiassengi siagang Kipahangi, angkana tena kusala, mingka annaba'. Kiassengi angkana manna sitau tania' akkulle ampasalamaka' battu ri limanTa.

⁸Inakke anne bate pare' limanTa', masa' laKipanrakia' kamma-kamma anne?

⁹Kiu'rangi angkana battu ri butta pi' nakiparekka'! Masa' laKipa'jari limbu'buka' ammotere'?

¹⁰Lanri pangngellainTa nakkulle manggeku ampa'jaria' Kipakalompoa' lalang ri battanna ammakku.

¹¹Kipareki tubuku a'jari buku-buku siagang ura'-ura'; Kisarei bukungku dageng nampa Kiroko' bukkuleng.

¹²Kisarea' katallassang; Kikamaseanga', Kijagai nyawaku lalang pammarakainTa.

¹³Mingka anne kamma kuassemmi angkana siapa sallona tamakkana-kanaKi' anrancangi kacilakangku.

¹⁴Kijannangngia' gassingka appareka' kasalang sollanna tena Kiero' ampamopporanga'.

¹⁵Punna a'gau' doraka', a'jari cilakami sarengku! Mingka punna tena callana panggaukangku, tuli nikana tonja' tau a'gau' dosa! Tena kubarani angngangkaki ulungku, lanri si'nai pa'maikku siagang tunai kusa'ring.

¹⁶Punna nia' wassele' bajikku, manna tena siapa, Kiondanga' sanrapang singa. Nampa Kipappicinikang ammotere' koasaTa, poro untu' ampakamallaka'.

¹⁷Tuli appa'niakKi' sa'bi untu' ambalianga'; siagang pila' lompomi larroTa mae ri nakke. Kipagioki sikamma pasukang beruTa untu' ambakkaia' siagang ambundukia'.

¹⁸Angngapa Kilappassanga' lassu' ri lino? Bajikangngang matema' ri tenanapa nacinikka' taua!

¹⁹Jari sangkamma' kusa'ring tau tale'ba' nilassukang, saba' lalangija' ri battanna ammakku kunitarawammo.

²⁰Ah, tenamo nasallo kulamate, jari lappassamma' kale-kalengku, sollanna akkulle kukasia' wattungku niaka tassesa anne.

²¹Tasalloami ku'lampa na kutammoteramo pole, mange ri pa'rasangang sassang siagang anremeng dudua,

²²pa'rasangang makkapu', rassi bayang-bayang siagang karicuang, sangkammayaji singaraka siagang sassanga.”